Yakubu 1 - Nyaa Shɔɔ Ɓɔɔ Laa a Ɓɛɛ

¹ Nkɔ Yakub zang shonang Laa nɛɛ ɓɔɔ Kpanti Yeesɔ Kirisi, n bèé nɔɔ labeenang keɓe, nɔɔ nyaa zang Isirela, laa gãa kopi tu ziti, ɓɔɔ zang tantɛ nɔɔ ka koo nandon ɓɛɛ. N jee nɔɔ nyaa.

Danggn shinnang nɛɛ zũnang

² Rɛɛ manzung, nɔɔ tãa manɛ tĩnang kɔ jong, naa zang gãsɛ nɔɔ nɛɛ vuu ka zɔ̃ng zɔ̃ng ɓɛɛ.

³ Ka ruu ɓɔɔ, nɔɔ zi tɔ nɛɛ, danggn shinnang manɛ kɔ zang gãsɛ ɓee, kɔ shingnɛ nɔɔ zunung danggn mãnang kati ɓɛɛ.

⁴ Nɔɔ mã danggn nɔngkɔ sasak. Tɔ̀ɔ, nɔ́ɔ nwang kaa naa ɓɔɔ Laa kasɛ nɛɛ nɔɔ nwang ɓɛɛ, vuu tɔ̃ɔ ɓɔɔ yaa kagn ka nwannang manɛ kpang.

⁵ Zang ɓɔɔ nɛɛ zũng kpang, wu gàa Laa, Laa a wu zũnang katɔ, ka ruu ɓɔɔ Laa a zang piti vuu katɔ, ti a zang naa ka zingzing ɓɛɛ. Zãa zang vuu ɓɔɔ zang gaa ɓɛɛ kpang.

⁶ Zang ɓɔɔ nɛɛ gaa vuu ka naa Laa, wu shing gn gbãng gbãng nɛɛ Laa a wu katɔ. Wu yaa gn naa kpang, ka ruu ɓɔɔ, zang ɓɔɔ gaa vuu yaa gn naa katɔ, nwang ɓi naa mii waapo ɓɔɔ gɔnsɔ zɔɔ a jasung ti rãa wu ɓɛɛ.

^7-8 Zang ɓɔɔ naa weɓe, ɓɔɔ ta yeti ziti ka tĩng Laa. Rɛ̃rɛ ɓi jong gbete ka yuu vuu kpang. Zang keɓe wu tɔɔ kpang nɛɛ Laa a wu vuu ɓɔɔ katɔ kpang.

Zang ɓɔɔ zang ying kpang nɛɛ zang ying

⁹ Zang ɓɔɔ wu zang ying kpang, ɓɔɔ dũng Laa, wu tãa tĩnang, ka ruu ɓɔɔ ka tĩng Laa wu ɓi zang bang ɓɛɛ.

¹⁰ Zang ying ɓɔɔ nɛɛ dũng Laa, Laa nɛɛ sɔɔrɔ wu yuu ka dii, wu tãa tĩnang dòo nɔngkɔ, ka ruu ɓɔɔ, zang ying shaarɛ ɓi katɔ naa mangwaa ɓɔɔ nyaa kɔ dòo naa ɓee, waatɛ kaa tɔ ɓɛɛ.

¹¹ Naa ɓɔɔ laa nɛɛ tuu tɔ, wisi tɔɔrɔ kaa tɔ. Mangwaa ɓiɓɛ ri ti lɔɔrɔ ri watɛ. Shinang ɓarɛ wu lasɛ. Zang ying lasɛ doo nɔngkɔ, ka ɓɔɔ wu shòngtó ka nɔng vuu naa ɓiɓɛ kãanang ɓɛɛ.

Zang gãsɛnang

¹² Zang ɓɔɔ zang nɛɛ gãsɛ wu, nɛɛ watɛ kpang wukɔ tãa tĩnang. Ka ruu ɓɔɔ, nɛɛ shìi kakata, nɛɛ watɛ kpang, naa ta vuu ɓɔɔ Kpanti Laa tɔɔ wu a zang ɓɔɔ kasɛ wu katɔ ɓɛɛ. Vuu keɓe wukɔ suru bii ɓɔɔ waa nyaa kpang ɓɛɛ.

¹³ Zang ɓɔɔ zang nɛɛ gãsɛ wu, wu tɔɔ kpang nɛɛ “Ɓi Laa gãsɛ m” kpang, ka ruu ɓɔɔ, vuu ɓɔɔ gãsɛ Laa nɛɛ wu palɛ vuu shi kpang ɓi kagn kpang. Laa nɛɛ yuu ɓiɓɛ gãsɛ zang ɓi kpang.

¹⁴ Ɓi rɛ̃rɛnang shi kpang ɓɔɔ ka yeti zang kɔ, shing zang, zang kasɛ vuu. Wu shing zang, zang palɛ vuu shi kpang.

¹⁵ Rɛ̃rɛnang keɓe nɛɛ ɓaa mɔɔ saara tɔ ka yeti, wu shing mɔɔ, mɔɔ palɛ vuu shi kpang. Vuu shi kpang nɛɛ nwang vuu bii ɓaaɓɛ tɔ, wu nwàng mɔɔ vɔrɔ kati.

¹⁶ Rɛɛ manzung ɓɔɔ n kasɛ ruu manɛ dɔɔli ɓɛɛ, zang wu nwãarɛ nɔɔ kpang.

¹⁷ Vuu ɓɔɔ tɔ̃ɔ ɓɔɔ ti gbarɛ katɔ, ɓɔɔ zang a zang piti, a ɓi nɛɛ bii Laa. Vuu keɓe ri a ɓarɛ nɛɛ bii Laa ɓɔɔ wukɔ mãa vuu ɓɔɔ ri yakɛ nɔng ɓɔɔ ri ka lapa ɓɛɛ. Laa ɓɔɔ kɔ̃sɔ bii ɓi jong kpang, ràa ruu yuu knti, wu yaa ruu ka nɔng tɔɔnang kpang.

¹⁸ Wukɔ kasɛ nɛɛ yuu ɓiɓɛ, a shing rùu, rùu nwang wujɛ ɓiɓɛ, nɛɛ yee ɓiɓɛ ɓɔɔ niizang ɓɛɛ. Nɛɛ tɔ̀ɔ, ruu nwang kaa naa jamari rɛɛ vuu ɓɔɔ wu mã́arɛ̀ ɓɛɛ.

Yee tãanang nɛɛ vuu palɛnang

¹⁹ Rɛɛ manzung ɓɔɔ n kasɛ ruu manɛ dɔɔli ɓɛɛ, danggn wu ning nɔɔ vuu keɓe kpang. Nɔɔ ɓaa shoo waasɛ̃, nɔ́ɔ tãa ruu pati, nɔ́ɔ kɔlɔ nyaa kaa tɔ̀ɔ́ nɔng yee rannang kpang. Nɔ́ɔ ti see gnvɔ pati kpang.

²⁰ Ka ruu ɓɔɔ, gnvɔ nɛɛ kagn ka yeti zang, zang zunung shonang ɓɔɔ tɔ̃ɔ ɓɔɔ Laa kasɛ ɓɛɛ palɛnang kpang ɓɛɛ.

²¹ Ka ruu nɔngkɔ, nɔɔ yaa gbalang vuu shi kpang ɓɔɔ nɔɔ palɛ, nɛɛ gɔ̃ɔ ɓɔɔ nɔɔ kãa ɓɛɛ nandon. Nɔɔ ta Ruu Laa ɓɔɔ Laa shing nɔɔ ka yeti manɛ ɓɛɛ. Nɔ́ɔ ti tà nɛɛ jĩng gbakɛnang kpang. Ka ruu ɓɔɔ, ruu keɓe ta yuu manɛ katɔ ɓɛɛ.

²² Nɔɔ palɛ vuu ɓɔɔ ruu keɓe kɔɔ ɓɛɛ katɔ. Nɔ́ɔ nwãarɛ yuu manɛ nɛɛ ruu tãanang kɔ shɛ̃ɛning kpang.

²³ Zang ɓɔɔ nɛɛ tãa ruu keɓe, nɛɛ palɛ vuu ɓɔɔ zang kɔɔ kpang, nwang naa zang ɓɔɔ zi jĩng ɓiɓɛ ka vĩilaa ɓɛɛ.

²⁴ Nɛɛ zi waa nyaating ɓiɓɛ tɔ, ɓɔɔ wu yaa nɔng nyaa kɔ doo naa ɓee, danggn ning wu naa ɓɔɔ waa nyaating ɓiɓɛ nwang ɓɛɛ tɔ.

²⁵ Zang ɓɔɔ nɛɛ shing jĩng ka nyaa dannang Laa ɓɔɔ ta yuu ɓuru katɔ waasɛ̃. Nɛɛ dũngnɛ sasak, nɛɛ nwang zang ɓɔɔ tãa ruu, danggn ning wu kpang, nɛɛ ti palɛ vuu ɓɔɔ wu tãa ɓɛɛ katɔ. Laa shing zang keɓe wu tãa tĩnang ka vuu ɓɔɔ wu palɛ piti.

²⁶ Zang ɓɔɔ nɛɛ tɔɔ wu dũng Laa, nɛɛ mung nyaa ɓiɓɛ kpang, nwãarɛ ɓi yuu ɓiɓɛ, Laa dũnnang ɓiɓɛ ɓi ɓɔɔ waati.

²⁷ Laa dũnnang ɓɔɔ Daa ɓuru Laa zirɛ nɛɛ wukɔ kalang kalang, a ti tɔ̃ɔ ka jĩng ɓiɓɛ keɓe, nɛɛ zang lengke jĩng ka rɛɛ javɔ, nɛɛ rɛɛ suvɔ ɓɔɔ ri dang jĩng ɓɛɛ. Zang wu lee naa ka vuu shi kpang ɓɔɔ ka koo keɓe kpang.