Yɔhana 1 - Nyaa Shɔɔ Ɓɔɔ Laa a Ɓɛɛ

Yeesɔ Kirisi wukɔ ruu ɓɔɔ a zang suru bii ɓɛɛ

¹ Zang ɓɔɔ zang ɓaa wu nɛɛ Ruu, nwáng dòo ka tĩng bɛ̀ɛ́ Laa gaayu koo mãanang gn kpang. Ruu keɓe nwáng ɓi nɛɛ Laa. Ruu keɓe ɓi wukɔ Laa.

² Nwáng ɓi nɛɛ Laa ka tĩng doo tɛ̃ɛ tɛ̃ɛ bɛ̀ɛ́ Laa mãa koo gn kpang.

³ Laa mãarɛ vuu ɓɔɔ ka koo keɓe piti nɛɛ wukɔ. Vuu ɓɔɔ kagn gbete ka teteng vuu ɓɔɔ Laa mãarɛ ka koo keɓe, ɓɔɔ Laa mãa nɛɛ wu kpang, kagn kpang.

⁴ Suru bii ɓɔɔ waa nyaa kpang ɓi ka bii Ruu keɓe kɔ. Suru bii keɓe wukɔ yakɛ shɔnzang nɔng.

⁵ Nɔng yakɛnang keɓe, yakɛ ka nɔng ɓɔɔ tɔ̀ɔ katɔ ɓɛɛ, a nɔng ɓɔɔ tɔ̀ɔ katɔ, ningsi wu kaa takpang.

⁶ Zang ɓɔɔ kagn Laa shong wu, zang ɓáa nung ɓiɓɛ nɛɛ Yɔhana.

⁷ Arɛ nɛɛ wu naa kɔɔ zang ruu ka yuu zang ɓɔɔ yakɛ nɔng keɓe, tɔ̀ɔ, zang piti ri tãayi, ri shing danggn kaa bii ɓiɓɛ.

⁸ Wu Yɔhana kɔ nɔng yakɛnang keɓe kpang, a ɓiri nɛɛ wu naa kɔ̀ɔ́ zang ɓi ruu ka yuu nɔng yakɛnang keɓe.

⁹ Wee kɔ, zang ɓɔɔ yàkɛ́ nɔng ɓɔɔ niizang ɓɛɛ kɔ, ɓɔɔ a ka koo naa yàkɛ́ nɔng, tɔ̀ɔ, shɔnzang nandon ri zi vuu kaa waasɛ̃ ɓɛɛ.

¹⁰ Bɛ̀ɛ́ ka yeti koo kɔ nwani, wukɔ ti mãa koo keɓe, a zang ɓɔɔ ri ka koo ri zi wu kaa takpang.

¹¹ Á ka bii zang laa gãa ɓiɓɛ, a zang ɓiɓɛ ti ta wu kpang.

¹² Zang ɓɔɔ ri ta wu nandon, a ri ti shing danggn ka bii ɓiɓɛ ɓɛɛ, a ri naa nɛɛ, ri nwang ɓarɛ kaa wujɛ Laa.

¹³ Zang keɓe Laa yi ri. Zang yi ri naa ɓɔɔ shɔnzang yi jaa ɓɛɛ kpang. Zang ti yi ri nɛɛ bii shɔnzang kpang. Ɓi ti ka gbalang ɓɔɔ zang varɛ kasɛ ɓɛɛ kpang. Laa nɛɛ yuu ɓiɓɛ ɓi wukɔ Daa ɓarɛ.

¹⁴ A Ruu keɓe naa túu bii shɔnzang, a nwang kaa nɛɛ ruu nɔng gbete. Atɛ ruu tĩnang tãanang dɔɔli nɛɛ ruu ɓɔɔ niizang ɓɛɛ. A ruu ti zi bannang ɓɔɔ Laa a wu, nɛɛ jĩng ɓuru, ɓi bannang ɓɔɔ Daa a jaa gbete ɓiɓɛ ɓɛɛ.

¹⁵ Yɔhana kɔɔ zang ruu ka yuu ɓiɓɛ kɔ. Yɔhana mɛɛ nyaa ka lapa tɔɔ, “Wee zang ɓɔɔ n kɔ̀ɔ nɔɔ ruu ka yuu ɓiɓɛ kɔ. N kɔɔ nɔɔ nɛɛ, ‘Zang ɓɔɔ a ka knti mɛɛ kagn, wukɔ bang, ka ruu ɓɔɔ bɛ̀ɛ́ ɓi ka tĩng tɛ̃ɛ tɛ̃ɛ kɔ nwani ɓɛɛ.’ ”

¹⁶ Ka ruu vuu ɓɔɔ Laa a wu gaagaa, rùu ti wàlɛ́ tɔ̃ɔ kana ka yuu zɔɔ yuu zɔɔ.

¹⁷ Naa ɓɔɔ nyaa dannang Laa a nɛɛ bii Musa, tɔ̃ɔ palɛnang Laa, nɛɛ ruu ɓɔɔ niizang, a ɓi kaa nɛɛ bii Yeesɔ Kirisi.

¹⁸ Zang ɓɔɔ zi Laa tɔ kagn gbete kpang. Ɓi jaa gbete ɓɔɔ wu doo naa Laa kɔ, ɓɔɔ nwang ka ɓuru Laa kɔ, tusu naa ɓɔɔ Laa nwang ɓɛɛ.

Nyaa ɓɔɔ Yɔhana ɓɔɔ palɛ zang batizima kasɛ zang ɓɛɛ

¹⁹ Zang bang bang zang Yahudi ɓɔɔ ka Urushalima ri shong zang ɓɔɔ ri dɔɔ vuu ka Gãa Laa, nɛɛ zang Leevi, ka bii Yɔhana ɓɔɔ palɛ zang batizima ɓɛɛ, nɛɛ ri naa hɛ̃ɛ wu nɛɛ, “Mɔɔ ɓaa ɓu wiya?”

²⁰ Yɔhana laa nyaa kpang. Kɔɔ ri ruu ɓɔɔ niizang, wàasɛ̀ ri vuu ɓɔɔ kpang. Kɔɔ ri tɔɔ, “Ɓi nkɔ Kirisi (zang ɓɔɔ naa a ɓɛɛ) kpang.”

²¹ Ri hɛ̃ɛ wu nɛɛ “A mɔɔ ɓu kaa wiya?” “Mɔkɔ Iliya ya?” Yɔhana kasɛ ri nyaa tɔɔ, “Wu nkɔ Iliya kpang.” Ri hɛ̃ɛ wu tɔkn nɛɛ, “A mɔkɔ zang nyaa shonang Laa ɓɔɔ naa a ɓɛɛ ya?” A ti kasɛ ri nyaa nɛɛ, “Ɓi nkɔ kpang.”

²² A ri díkí wu nɛɛ, “Kɔɔ ruu ta jong, mɔkɔ wiya? Tɔɔ ruu wàlɛ̀ vuu ɓɔɔ, ruu daa kɔɔ zang ɓɔɔ ri shong ruu ɓɛɛ. Mɔɔ kɔ̀ɔrɔ́ zang ɓu nɛɛ mɔkɔ ɓu wiya?”

²³ A Yɔhana kasɛ ri nyaa nɛɛ nyaa ɓɔɔ Ishaya zang nyaa shonang Laa bee ɓɛɛ tɔɔ, “Nkɔ zang ɓɔɔ rang yee Laa ka waala, ɓɔɔ kɔɔyi nɛɛ, ‘Nɔɔ pàlɛ̀ Kpanti Laa gbalang ta, nɔɔ shiiri katɔ ɓororo.’ ”

²⁴ Zang ɓɔɔ rɛɛ zang Farisi shong ri ɓɛɛ,

²⁵ ri hɛ̃ɛ Yɔhana tɔɔ, “A ka ruu vi mɔɔ pàlɛ́ zang batizima viya? Mɔkɔ nɛɛ Kirisi kpang. Mɔkɔ ti Iliya kpang, a mɔɔ ti zang nyaa shonang Laa ɓɔɔ naa a kpang ɓɛɛ?”

²⁶ A Yɔhana kasɛ ri nyaa tɔɔ, “N pàlɛ́ zang batizima m nɛɛ mii, zang ɓɔɔ shii kagn teteng manɛ kãntang keɓe, ɓɔɔ nɔɔ zi wu nung manɛ kpang ɓɛɛ.

²⁷ Wukɔ a ka knti mɛɛ, n daa naa ɓɔɔ n kãlɛ soo koodoo ɓiɓɛ kpang.”

²⁸ Zang pálɛ́ vuu keɓe piti ka Bɛtani ɓɔɔ zang ta rang Urudung katɔ ka dang ɓɛɛ. Ka nɔng ɓɔɔ Yɔhana pálɛ̀ zang batizima ɓɛɛ.

Yeesɔ kɔ Jaa Mɛ̀ɛrɛ́ Laa

²⁹ Nɔng naa gãntɛ tɔ, a Yɔhana zi Yeesɔ a kana bìí ɓiɓɛ, a kɔɔyi nɛɛ, “Nɔɔ zirɛ, Jaa Mɛ̀ɛrɛ́ Laa kaɓa, ɓɔɔ naa shingnɛ, Laa yàá zang koo keɓe gbalang vuu shi kpang ɓɔɔ ri pàlɛ̀ ɓɛɛ kɔ.

³⁰ Wee zang ɓɔɔ n kɔɔ ruu ɓiɓɛ n tɔɔ, ‘Zang ɓɔɔ a ka knti mɛɛ kagn, wukɔ bang, ka ruu ɓɔɔ, bɛ̀ɛ́ ɓi ka tĩng tɛ̃ɛ tɛ̃ɛ kɔ nwani ɓɛɛ kɔ.’

³¹ Bɛ̀ɛ́ n zi wu nung m doo kpang kɔ doori. Ka ruu nɔngkɔ, n arɛ n pàlɛ́ zang batizima nɛɛ mii, tɔ̀ɔ, Laa wu nwangsɛ zang Isirela wu kati nɛɛ wukɔ Kirisi.”

³² Yɔhana kɔɔ ruu keɓe tɔɔ, “N zi Suru Laa a nɛɛ lapa naa koro, a naa nwàng ka yuu ɓiɓɛ.

³³ N nɛɛ ti zi m kpang nɛɛ wukɔ kpang. Laa ɓɔɔ shɔng m nɛɛ n naa pàlɛ̀ zang batizima nɛɛ mii, wukɔ kɔɔ m tɔɔ, ‘Zang ɓɔɔ mɔɔ zirɛ Suru Laa arɛ naa nwàng ka yuu ɓiɓɛ, zang keɓe kɔ naa pàlɛ́ zang batizima nɛɛ Suru Laa.’

³⁴ N ti naa zi nɔngkɔ nɛɛ jĩng mɛɛ, ka ruu nɔngkɔ, n kɔ̀ɔ nɔɔ nɛɛ yɔɔ keɓe Jaa Laa, bìí kɔ.”

Zang ɓɔɔ ri mantɛ vuu ka bii Yeesɔ, ɓɔɔ Yeesɔ ɓaa ri nyaa shɔɔnang ɓɛɛ

³⁵ Nɔng naa gãntɛ tɔ, Yɔhana shii tɔ ka nɔngkɔ tɔkn nɛɛ zang ɓɔɔ ri mantɛ vuu ka bii ɓiɓɛ ziti,

³⁶ a zi Yeesɔ rakɛ. A Yɔhana kɔɔyi tɔɔ, “Nɔɔ zirɛ, Jaa Mɛ̀ɛrɛ́ Laa kaɓa.”

³⁷ Zang ɓɔɔ ri mantɛ vuu ka bii ɓiɓɛ ziti kaɓa, ɓɔɔ ri tãa vuu ɓɔɔ wu kɔɔ naa weɓe, ri yaa wu ri dũng ɓarɛ kaa Yeesɔ.

³⁸ A Yeesɔ raa jĩng zi ri, ri dũng wu kana. A hɛ̃ɛ ri tɔɔ, “Nɔɔ kãa viya?” Ri kasɛ wu nyaa tɔɔ, “Rabii, dĩiri nung keɓe, ɓi maalang. Nɔng ɓɔɔ mɔɔ nwàng kagn kiya?”

³⁹ A kasɛ ri nyaa tɔɔ, “Nɔɔ arɛ, nɔɔ zirɛ.” (Bɛ̀ɛ́ saka dɛ̃ɛti ɓɔɔ laarang yaa kaa tɔkɔlɔng). Ri dũng wu, ri daa zi nɔng ɓɔɔ wu nwang kagn kati. Ri nwang kaa nɛɛ wu ka nɔngkɔ, laa hãa nyaa nɛɛ mani.

⁴⁰ Ka teteng zang ɓɔɔ ri mantɛ vuu ka bii Yɔhana ɓɔɔ ri tãa vuu ɓɔɔ wu kɔɔyi, a ri dũng Yeesɔ kaɓa. Zang ɓaa ɓɔɔ gbete nɛɛ Anduru jaa naa Siman ɓɔɔ zang ɓaa wu nɛɛ Bituru ɓɛɛ.

⁴¹ Dàa tantɛ jaa niiɓɛ Siman kɔ ĩinang shɔɔnang, a kɔɔ wu nɛɛ, “Ruu ĩi Masiya, zang ɓɔɔ Laa a nyaa nɛɛ naa ta yuu zang tɔ.” Wukɔ “Kirisi”.

⁴² A gɔ̃ Siman daa nɛɛ wu ka bii Yeesɔ. Yeesɔ pɛ̃ɛrɛ Siman a kɔɔyi tɔɔ, “Mɔkɔ Siman jaa Yɔhana waa? Zang ɓáa mɔɔ kaa nɛɛ Kefa” (Dĩiri nung keɓe daa gbete nɛɛ Bituru ɓɔɔ zang ɓaa ɓi “Tari ɓɔɔ bang ɓɛɛ”).

Yeesɔ ɓaa rɛɛ Filibu nɛɛ Natanalu nyaa

⁴³ Nɔng naa gãntɛ tɔ, Yeesɔ kasɛ nɛɛ wu daa ka Galili. A ĩi Filibu a kɔɔ wu tɔɔ, “A ta nɛɛ n ning.”

⁴⁴ Filibu ɓi doo zang Bɛsɛda kɔ, gari rɛɛ Anduru nɛɛ Bituru.

⁴⁵ Filibu ti naa ĩi Natanalu, a kɔɔ wu tɔɔ, “Ruu ĩi zang ɓɔɔ Musa bee vuu ka yuu ɓiɓɛ ka yeti labeenang nyaa dannang Laa, a zang nyaa shonang Laa ri ti bee jong tɔ. Zang keɓe, wukɔ Yeesɔ yɔɔ Nazara, jaa Yusufu.”

⁴⁶ Natanalu hɛ̃ɛ wu nɛɛ, “vuu tɔ̃ɔ ɓɔɔ nwáng nyaa ka gari Nazara ɓu kagn ya?” Filibu kasɛ wu nyaa tɔɔ “Arɛ mɔɔ daa zirɛ.”

⁴⁷ Yeesɔ zi Natanalu a kana bii ɓiɓɛ, a kɔɔyi tɔɔ, “Nɔɔ zirɛ, zang ɓɔɔ wukɔ zang Isirela ɓɔɔ niizang kaɓa, vuu ɓɔɔ shing zang, zang pálɛ̀ vuu shi kpang kagn bii ɓiɓɛ kpang.”

⁴⁸ Natanalu hɛ̃ɛ wu nɛɛ, “Mɔɔ pálɛ̀ bɛ̀ɛ́ mɔɔ zi m nɔngkɔ viya?” Yeesɔ kasɛ nyaa tɔɔ, “N zi mɔɔ dòo ka doo laa sĩiri bɛ̀ɛ́ Filibu daa ɓaa mɔɔ nyaa gn kpang.”

⁴⁹ Natanalu kɔɔ wu tɔɔ, “Maalang, mɔkɔ Jaa Laa. Mɔkɔ Kpanti zang Isirela.”

⁵⁰ Yeesɔ kɔɔyi tɔɔ, “Mɔɔ kasɛ nyaa nɔngkɔ, ka ruu ɓɔɔ n kɔɔ nɛɛ n zi mɔɔ dòo ka doo laa sĩiri ɓɛɛ ya? Mɔɔ naa zi vuu ɓɔɔ ɓa weɓe ditɔ.”

⁵¹ A kɔɔ ri kati tɔɔ, “N kɔ̀ɔ́ nɔɔ ruu ɓɔɔ niizang kɔ nwani, nɔɔ naa zi lapa puu ditɔ, zang nyaa shonang Laa ɓɔɔ ka lapa ɓɛɛ, ri naa a ka bii mɛɛ, ɓɔɔ n Jaa Shɔnzang, ri ti gbãayu ka lapa tɔkn.”