2 Yɔhana 1 - Nyaa Shɔɔ Ɓɔɔ Laa a Ɓɛɛ

¹ Jaa soro ɓɔɔ Laa zɔ̃̀ng katɔ ɓɛɛ, nɛɛ wujɛ ɓaaɓɛ ɓɔɔ n kasɛ ruu manɛ katɔ dɔɔli ɓɛɛ. Nkɔ zang bang, nkɔ bèé nɔɔ labeenang keɓe. Wu nkɔ kasɛ ruu manɛ gbete kpang, zang ɓɔɔ ri zi ruu niizang katɔ, ri kasɛ nɔɔ dòo katɔ kɔ.

² Ka ruu ruu niizang ɓɔɔ ka yeti ɓuru, ɓɔɔ ti nwàng kaa nɛɛ ruu gbinggbing ɓɛɛ.

³ Daa Kpanti Laa nɛɛ Yeesɔ Kirisi jaa Daa, rí pàlɛ̀ ruu tɔ̃ɔ jong. Gn ɓuru wu kɔng ri katɔ, ri ti a ruu nwannang tɔ̃ɔ, naa ɓɔɔ ruu dũng ruu ɓiɓɛ ɓɔɔ niizang, a ruu ti kasɛ ruu zɔɔ katɔ ɓɛɛ.

Nɔɔ gãng jĩng ka vuu ɓɔɔ Yeesɔ tusu ɓɛɛ

⁴ Ɓɔɔ n zi wujɛ ɓaaɓɛ ɓɔɔgn, ri dũng ruu ɓɔɔ niizang, naa ɓɔɔ Daa ɓuru dang ruu nyaa, n tãa tĩnang dɔɔli.

⁵ N gàá mɔɔ katɔ jaa soro, n bèé mɔɔ wu nyaa shɔɔ kpang, ɓi doo ɓɔɔ gbaala ɓɔɔ ruu tãa ka diki ɓɔɔ ruu gaayu Ruu Laa tanang ɓɛɛ. Laa kɔɔyi tɔɔ, ruu kasɛ ruu zɔɔ katɔ.

⁶ Naa ruu dũ̀ng nyaa ɓɔɔ Laa dangnɛ sasak, zang zi ka wukɔ nɛɛ ruu kasɛ Laa katɔ. Nyaa ɓɔɔ Laa dangnɛ, ɓɔɔ ruu tãa tĩng shɔɔnang kɔɔyi tɔɔ, ruu kasɛ ruu zɔɔ katɔ.

⁷ Zang ɓɔɔ ri nwãarɛ zang, ri baa koolaa tɔ dɔɔli. Ri kɔɔrɔ zang nɛɛ Yeesɔ Kirisi ɓɔɔ a ka koo keɓe, tuu ɓi bii shɔnzang kpang. Zang ɓɔɔ kɔɔrɔ zang naa weɓe, wukɔ zang ɓɔɔ nwãarɛ zang ɓɛɛ, wukɔ ti zang ɓɔɔ shing jĩng nɛɛ Yeesɔ kpang ɓɛɛ.

⁸ Nɔɔ gãng jĩng kagn, nɔɔ nɛ̀ɛ́ loo vuu ɓɔɔ nɔɔ pálɛ́ shonang ka ruu ɓiɓɛ ɓɛɛ. Laa wu naa a nɔɔ vuu ɓɔɔ wu shing nɔɔ katɔ nyaa kiiri.

⁹ Zang ɓɔɔ dũ̀ng vuu ɓɔɔ Kirisi tusu kpang, palɛ ɓi naa ɓɔɔ wu kasɛ ɓɛɛ, Laa ɓi kagn yeti ɓiɓɛ kpang. Zang ɓɔɔ dũng vuu ɓɔɔ Yeesɔ tusu, Laa kagn yeti ɓiɓɛ nɛɛ Jaa piti.

¹⁰ Zang piti ɓɔɔ nɛɛ alɛ ka bii manɛ, a à nɛɛ vuu kpɛ̃ɛrɛnang keɓe kɔ kpang, nɔ́ɔ ta wu ka gãa manɛ kpang. Nɔ́ɔ ti jee wu nyaa kpang tingkiring.

¹¹ Ka ruu ɓɔɔ, zang ɓɔɔ nɛɛ jeere wu nyaa, kasɛ vuu shi kpang ɓɔɔ zang kaɓa palɛ ɓi doo katɔ kɔ ɓɛɛ.

Naa ɓɔɔ Yɔhana di nyaa ruu ɓiɓɛ ɓɛɛ

¹² Vuu ɓɔɔ n kasɛ nɛɛ n kɔ̀ɔ́ nɔɔ ka gn dɔɔli, a n bèe nɔɔ kaa takpang, ka ruu ɓɔɔ, n kasɛ n tɔɔ n naa leng nɔɔ, n kɔɔ nɔɔ kaa nɛɛ nyaa mɛɛ, jĩng ɓuru wu zi zɔɔ, tɔ̀ɔ tĩnang tàanang ɓuru wu nwang kaa nyaa kiriri.

¹³ Wujɛ jaa nàáɓɛ ɓɔɔ Laa zɔ̃ng ri katɔ, ri jee mɔɔ nyaa.