1 Timoti 1 - Nyaa Shɔɔ Ɓɔɔ Laa a Ɓɛɛ

Bulu Jee Timoti nyaa

¹ Labeenang keɓe a nɛɛ bii mɛɛ Bulu, zang shonang Yeesɔ Kirisi. Laa ɓɔɔ wukɔ ta yuu ɓuru, nɛɛ Yeesɔ Kirisi ɓɔɔ ruu shing gn ka bii ɓiɓɛ, rikɔ zɔ̃ng m.

² N bèé mɔkɔ Timoti ɓɔɔ ka gbalang Laa dũnnang, mɔɔ ɓaa kaa jaa mɛɛ ɓɔɔ n kasɛ ɓɛɛ. N gaa Laa ɓɔɔ wukɔ Daa ɓuru nɛɛ Yeesɔ Kirisi Kpanti ɓuru, gn ɓaaɓɛ wu kɔng ri jong, ri ti pàlɛ̀ mɔɔ tɔ̃ɔ, ri shingnɛ mɔɔ nwang waasɛ̃.

Bulu shaarɛ Timoti nyaa ka yuu zang ɓɔɔ ri tusu vuu ɓɔɔ niizang kpang ɓɛɛ

³ Ka ɓɔɔ n yupaa Makidoniya daanang, n kɔ̀ɔ mɔɔ n tɔ̀ɔ, mɔɔ nwang ka Afisa ka nɔngkɔ. Zang ɓɔɔ ri kagn ka nɔngkɔ, ɓɔɔ ri tusu vuu ɓɔɔ niizang kpang, shaarɛ ri nyaa nɛɛ ri yaa ta.

⁴ Mɔ́ɔ kɔ̀ɔ ri nɛɛ ri suukãng waati ka nɔng ruu gbãagbãa kɔɔrɔnang, nɛɛ nɔng ɓɔɔ ri gã zɔ̃ng rɛɛ dabang ɓarɛ ɓɛɛ kpang. Vuu keɓe shing ɓi nyaa laanang waati. Shingnɛ ruu zi vuu tɔ̃ɔ ɓɔɔ Laa mang ka yuu ɓuru nɛɛ ruu walɛ ɓɛɛ kpang. Danggn ɓɔɔ ri shing ka bii ɓiɓɛ kɔ tusu vuu keɓe shɛ̃ɛning.

⁵ N kɔɔ mɔɔ nɔngkɔ, tɔ̀ɔ, ruu kasɛ ruu zɔɔ nɛɛ zɔɔ kasɛnang ɓɔɔ nwang nɛɛ yeti ɓɔɔ vuu shi kpang kagn kpang ɓɛɛ. Ruu ti kasɛ ruu zɔɔ nɛɛ rɛ̃rɛnang ɓɔɔ shi kpang kagn kpang ɓɛɛ. A ɓɔɔ nɛɛ danggn ɓɔɔ niizang keɓe ɓɔɔ ruu shing ka bii Yeesɔ Kirisi ɓɛɛ.

⁶ Zang ɓɔɔ ri ning gbalang keɓe tɔ, ri ràa jĩng ɓarɛ kaa nyaa laanang naa shoko.

⁷ Ri kasɛ nɛɛ ri tusu zang nyaa ɓɔɔ Laa dang ɓɛɛ, a ri zi vuu ɓɔɔ ri rang yee ka yuu ɓiɓɛ kaa takpang. A ri rang yee kaa mɔɔ kɔɔ nɛɛ, ri zi vuu bii tɔ gbãng gbãng.

⁸ Ruu zi tɔ nyaa ɓɔɔ Laa dangnɛ ɓi tɔ̃ɔ, zang nɛɛ palɛ shonang nɛɛ mani waasɛ̃ ɓɛɛ.

⁹ Zang dang nyaa wu ka ruu zang tɔ̃ɔ kpang. Ɓi ka ruu zang ɓɔɔ ri takɛ nyaa ɓɔɔ zang dang ɓɛɛ, nɛɛ zang ɓɔɔ ri ɓaa shoo ka nyaa zang kpang ɓɛɛ. A bɔɔ ka ruu zang ɓɔɔ ri shing gn ka bii Laa kpang, nɛɛ zang ɓɔɔ ri palɛ vuu shi kpang ɓɛɛ. Ka ruu zang ɓɔɔ ri seng Laa kpang, ri ti seng vuu tɔ̃ɔ kpang ɓɛɛ. Nɛɛ ɓɔɔ ka ruu zang ɓɔɔ ri nyɔ daa ɓarɛ nɛɛ nàá ɓarɛ vɔrɔ ɓɛɛ, nɛɛ zang ɓɔɔ ri nyɔkɔ zang vɔrɔ ɓɛɛ.

¹⁰ Ka ruu zang ɓɔɔ ri palɛ dũndũng ɓɛɛ, nɛɛ zang varɛ ɓɔɔ ri rooro nɛɛ zɔɔ ɓɛɛ, nɛɛ zang soro ɓɔɔ ri palɛ doo nɔngkɔ ɓɛɛ. Ka ruu zang ɓɔɔ ri ɓɔɔrɔ zang ri mãlɛ́ ɓɛɛ, nɛɛ zang ɓɔɔ ri suuru sèé ɓɛɛ, nɛɛ zang ɓɔɔ ri kɔ̀ɔrɔ̀ ruu niizang ka yuu ruu kpang ɓɛɛ. Ka ruu zang piti ɓɔɔ ri pálɛ̀ vuu ka doo vuu tusunang ɓɔɔ niizang kpang ɓɛɛ.

¹¹ Vuu ɓɔɔ niizang keɓe, ɓi ka Ruu Tɔ̃ɔ Laa, ɓɔɔ Laa ɓɔɔ daa naa ɓɔɔ zang piti dɔɔ wu katɔ, a m nɛɛ n kɔɔ zang ɓɛɛ.

Bulu dɔɔ Laa ka ruu tɔ̃ɔ ɓɔɔ Laa pàlɛ̀ wu ɓɛɛ

¹² N zãa Kpanti Yeesɔ Kirisi ɓɔɔ a m kaka, n palɛ shonang mɛɛ nɛɛ mani tɔ. N ti zãa wu tɔ ka ɓɔɔ zirɛ n daa naa tɔ, zɔ̃ng m nɛɛ n shòng wu ɓɛɛ.

¹³ Ka tĩng, n rang yee shi kpang ka yuu ɓiɓɛ, n dang zang ɓiɓɛ jĩng, a n ti palɛ ri nɛɛ ɓangge, a zɔ̃ng m doo nɛɛ mani. A gn mɛɛ kɔng Laa, ka ruu ɓɔɔ bɛ̀ɛ́ n zi vuu ɓɔɔ n palɛ ɓɛɛ kpang. Bɛ̀ɛ́ n ti shing danggn gn kpang ɓɛɛ,

¹⁴ a kpanti ɓuru Yeesɔ Kirisi pàlɛ̀ m tɔ̃ɔ ɓiɓɛ ɓɔɔ bang dɔɔli ɓɛɛ. A tɔ̃ɔ ɓiɓɛ shingnɛ, n shing danggn ka bii ɓiɓɛ, a n ti kàsɛ́ zang ɓɔɔ ri dũng doo Laa kɔ ɓɛɛ. Vuu keɓe ɓi ɓɔɔ ɓuru piti, ɓɔɔ ruu ɓakɛ zɔɔ tɔ nɛɛ Yeesɔ Kirisi ɓɛɛ.

¹⁵ Ruu keɓe niizang kɔ nwani, ti daa naa ɓɔɔ zang piti ri shing danggn kagn ɓɛɛ tɔ. Yeesɔ Kirisi a ka koo nɛɛ wu ta yuu zang ɓɔɔ ri palɛ vuu shi kpang ɓɛɛ. Nkɔ ɓa zang piti vuu shi kpang palɛnang.

¹⁶ Ka ruu ruu keɓe kɔ, gn mɛɛ kɔng Laa, nɛɛ tɔ̀ɔ, Yeesɔ Kirisi wu túsú naa ɓɔɔ wu mã danggn nɛɛ n gbãng gbãng, wu tà yuu mɛɛ ɓɛɛ. Ɓɔɔ nkɔ pálɛ̀ vuu shi kpang n ɓa zang piti ɓɛɛ. Tɔ̀ɔ, zang piti ɓɔɔ ri naa shing danggn ka bii ɓiɓɛ, ri zi kati, ri walɛ suru bii ɓɔɔ waa nyaa kpang kati.

¹⁷ Rùu nandon ruu dɔ̀ɔ Laa ɓɔɔ wukɔ kpanti dòndòng ɓɛɛ ta. Laa ɓɔɔ vɔ ɓi jong kpang, zang ti zi wu ɓi jong nɛɛ jĩng kpang ɓɛɛ. Laa ɓɔɔ wukɔ gbete ɓɛɛ. Ruu a wu bannang ta dòndòng. Nɔngkɔ.

¹⁸ Jaa mɛɛ Timoti, ruu kɔ n kɔɔ mɔɔ ɓee, ɓi kaa doo ruu ɓɔɔ rɛɛ zang nyaa shonang Laa ri kɔɔ tɔ kagn ka yuu ɓaaɓɛ ɓɛɛ. Naa mɔɔ dũng nyaa keɓe, mɔɔ ta sĩiri bii ditɔ tɔ̃ɔ tɔ̃ɔ.

¹⁹ Mɔɔ ti yiti danggn ɓɔɔ mɔɔ shing ɓɛɛ, rɛ̃rɛnang ɓaaɓɛ, wu ti nwang tɔ̃ɔ. Zang ɓɔɔ ri yáa danggn ɓɔɔ ri shing ka bii Yeesɔ ɓɛɛ tɔ, ka ruu ɓɔɔ, ri ɓaa shoo ka vuu ɓɔɔ rɛ̃rɛnang ɓarɛ kɔɔ ri kpang ɓɛɛ.

²⁰ Himinaya nɛɛ Alezanda ri ka teteng zang ɓɔɔ naa weɓe kɔ. N yàa Sheetang naa tɔ wu dang ri jĩng. Tɔ̀ɔ, shoo wu lu ri kati, ri yaa ruu shi kpang kɔɔrɔnang kaa yuu Laa.