Ibrani 1 - Buku to Nagaha Potipa to Nabou hante Buku Rut pade Buku Yunus

Alatala nampololitaka manuhia nampake Ana-Na

¹ Ilodo, nadea ngkanimi Alatala nololita hi tumpulokota. Lolita Alatala ee mai laiparatara nabi to laihuro-Na hante nadea ngaa dala.

² Naupawee, tempo ei to namohumi hante eo kahudua dunia, Alatala nololita hi kita nampake Ana-Na. Ana-Na eemi to laipake Alatala nopajadi dunia bo langi hante humawee ihina. Laipakatantu-Nami Alatala ane humawee to naria i dunia, Ana-Na eemi tumpuna.

³ I rara katuwu Ana-Na laihilota baa baraka Alatala, pade Hia nahibali hante Alatala. Hia muimi to nampiara humawee to naria i dunia hante lolita-Na to nabaraka. Nahudupi nampatolohi doha manuhia, rau-'Imi noncuna i poncunaa kamagaua i huruga, mali pangkana Alatala to neliu kabaraka-Na.

⁴ Alatala nampawaika Ana-Na ee mai baraka to neliupi lako barakara malaeka-Na, wee moto mui hanga to laiwaika-Na-'I neliupi kabohena lako hangara malaeka.

Lolita Alatala nangkambelai Ana-Na pade malaeka-malaeka-Na

⁵ Moma naria haduaa malaeka laiulika Alatala iwei, “Ikomi Ana-Ku. Welau ei Aku nawali Tuama-Mu.” Pade moma mui naria laiuli-Na iwei, “Akumi mei mawali Tuama-Na, Hia mei mawali Ana-Ku.” To laiuli Alatala lauria moma laiulika-Na hi malaeka-malaeka-Na naupawee laiulika-Na hi Ana-Na.

⁶ Pade tempo Alatala nantudu Ana ulumbua-Na narata i dunia ei, Alatala nanguli iwei, “Humawee malaeka Alatala kana mepue hi Hia.”

⁷ Nangkambelai malaeka, Alatala nanguli iwei, “Alatala nobabei malaeka-malaeka-Na nawali ewa ngolu, pade humaweera laibabei-Na nawali ewa apu.”

⁸ Naupawee nangkambelai Ana-Na, Alatala nanguli iwei, “Ikomi Alatala. Poparentaa-Mu moma maria kahuduana! Iko moparenta todea-Mu hante rara to moma nantomo hamika.

⁹ Laipokono-Mu ingku to nabelo pade laipodaa-Mu ingku to nadaa, etu pade Aku, Alatala to laipue-Mu, nampabila-Ko neliu lako dohe-dohe-Mu. Laituahi-Ku woo-Mu hante lana halaku tanda pebila-Ku hi Iko bona magoe rara-Mu.”

¹⁰ Iuli-Na mui Alatala hi Ana-Na, “Oo Pue, Ikomi to lako pamulana nopajadi dunia, pade hante pale-Mu laipajadi-Mu langi.

¹¹ Humaweena ee mai kana maronto pade mauha ewa waru, naupawee Iko batena maria moto-Ko.

¹² Langi bo dunia Mululu ewa waru pade Mupahawa hante to nabou ewa tauna nopatoli waruna, naupawee Iko batena moto-Ko moma naria pobalia-Mu, pade tuwu-Mu moma maria kahuduana.”

¹³ Moma naria haduaa malaeka laiulika Alatala iwei, “Poncunamo-Ko mali pangkana-Ku, duuna humawee bali-Mu Kupopotingkodu i tingoo-Mu.” To laiuli Alatala lauria moma laiulika-Na hi malaeka-malaeka-Na naupawee laiulika-Na hi Ana-Na.

¹⁴ Ane iwee, hemara malaeka ee kakonona? Hira ee mai inoha to nampobagoka Alatala, to laitudu Alatala mantulungi tauna to kana mantarima kahalamaa.