Yobu 1 - Bibili 1927 (Omyene)

¹ Avegag’ôma gô ntye y’Uz, ini nyè ne Yobu. Ôma wiṉo avegag’ômbya n’ôgôre; aryeṉag’Anyambyè, alubwa avila gw’ibe.

² Ayaṉ’awaṉ’aṉôm̃e ôrwageṉô n’awaṉ’antô ararô.

³ Avegagi n’intozèny s’adombè ôrwageṉô, n’intozèny ntyarô s’ikamèli n’inkam̃’ôtaṉè s’ilemba y’inyare, n’inkam̃’ôtaṉè s’iburu inyantô, n’inyôngô inyengemè. Ôma wiṉo avegag’ôm’ômpôlô vyagaṉô n’awaṉa waôdu wi nkôṽa yi tongwa ni nkômbe.

⁴ Awaṉi wè w’agèndagi am̃ori gôr’am̃ori gô ny’ôgeṽe gw’inagô saô, ôm’edu gô ntyugu yè, n’aweyi waô yombi yaô rarô gô nya na gô jonga na waô.

⁵ N’arweṉi gw’am̃aṉ’intyugu s’ôgeṽe, Yobu arôm̃i ayombuny’awaṉi wè, avila vovo aṉongwi yè ibanga sôdu ayire ntyagô yi pezô gôr’ôm’edu gôre waô; konde Yobu awulyi nè: Vendetwa awaṉi wam̃ w’afwem̃i, aṽendy’Anyambyè gw’irèm̃i yaô. Yobu avegagi ni ntyale gô denda yeṉo egômbe zôdu.

⁶ Ndô gô ntyugu y’aṽyeṉ’awaṉa w’Anyambyè gô tum̃iny’ikuṽi yaô g’ôzô wi Yeôva, Satan aṽyeṉi kè gôre waô.

⁷ N’awulinyi Yeôva Satan inè: Ô pila gwe? Awiṉizi Satan Yeôva inè: Avile nkèndagèndaga gô ntye, n’avile ntèkaga gô yô.

⁸ N’awulinyi Yeôva Satan inè: Ô re silya pe nyôngô yam̃ Yobu? E zel’ôma ga yè gô ntye; ay’ôm’ombya n’ôgôre, e ty’Anyambyè, alubwa avila gw’ibe.

⁹ N’awiṉizi Satan Yeôva inè: Yobu e ty’Anyambyè gô nyawènyawè?

¹⁰ Ô pa bandam̃iṉè, ayè ni nagô yè, n’ezom̃’edu zi re na yè? Ô re saviṉa p’ijanja s’ago mè, n’ilembi yè y’abuṉi gô ntye.

¹¹ Ndô nyonyuṉ’ôgo wo, ko bwat’ezom̃’edu zi re na yè, gambèṉè mi jivira nè, e be savo g’ôzô wo.

¹² N’awulinyi Yeôva Satan inè: Vôna, mi po ezom̃’edu zi re na yè, kaô dadyè ôgo wo aralya wô gôre yè. N’alubwi Satan avila g’ôzô wi Yeôva.

¹³ N’arweṉi gô ntyugu y’anyeṉag’awaṉ’aṉôm̃e n’awaṉ’antô wi Yobu ayongag’ivè gô nagô y’ôṉèro waô,

¹⁴ aṽyeṉ’igende gôre Yobu awulya inè: Inyare s’ajanjaga n’iburu s’anyagaga pyèrè na sô;

¹⁵ n’abôm̃wa mongi Sabea gô sô, awonga sô, ayôṉ’inyôngô n’ikwari yaô. Na myè dadyè my’apera gô bunguṉo ntyangô.

¹⁶ Wiṉo e pe kamba, aṽyeṉ’ômwèṉè awulya inè: Ôgôṉi w’Anyambyè w’apôswa avila g’ôrôṽa, avez’adombè n’inyôngô, ayiliza waô. Na myè dadyè my’apera gô bunguṉo ntyangô.

¹⁷ Wiṉo e pe kamba, aṽyeṉ’ôm’ômwèṉè awulya inè: Mongi Kalde, w’avangi nkumba ntyarô, w’abôm̃wa gôr’ikamèli, awonga sô, ayôṉ’inyôngô n’ikwari yaô. Na myè dadyè my’apera gô bunguṉo ntyangô.

¹⁸ Wiṉo e pe kamba, aṽyeṉ’ôm’ômwèṉè awulya inè: Awaṉi wo aṉôm̃e n’awaṉi wo antô w’anyagaga ayongag’ivè gô nagô y’ôṉèro waô,

¹⁹ na vôna, aby’ôgula avila gô nkôṽa mori y’itôve, awôl’intulungu nay si nagô, atugwa yô gôr’awanjo, ko waô juwa. Na myè dadyè my’apera gô bunguṉo ntyangô.

²⁰ Vovo agum̃aṉi Yobu, ayôkuṉe ngoy yè, azèngiṉ’ewônjô zè, avôswa gô ntye, azaviṉa,

²¹ awulya inè: My’agogwi tele avila gw’iwum̃u nyi ngi yam̃, mi be fwinya kè tele gô ntye. Yeôva aveṉi, Yeôva kè abongi, ôzaviṉô gw’ina nyi Yeôva!

²² Gw’isam̃u yiṉo yôdu, Yobu e pa fwem̃a ge pèdy’Anyambyè.