Yôan 1 - Bibili 1927 (Omyene)

¹ Igamba avegagi gw’ipakilya, n’Igamba avegagi n’Anyambyè, n’Igamba avegagi Anyambyè.

² Ayè mèyoṉo avegagi n’Anyambyè gw’ipakilya.

³ Yom̃a yôdu y’avangyô yè, e zel’ezom̃a zi re pangô pa kaô vo yè.

⁴ Em̃èṉo z’avegagi gôre yè, n’em̃èṉo mè z’avegagi ôzange w’aṉaga.

⁵ Ôzange wi bamba gô mpiri, ni mpiri yi pa kôtiza wô.

⁶ Avegagi ôma w’arôm̃yô avila gôr’Anyambyè, ini nyè ne Yôan.

⁷ Aṽyeṉi gô dwaṉ’ôyeṉi, gô takilya g’ômwanja w’ôzange, ko aṉaga waôdu bekelya vo yè.

⁸ Ayè e re pegeg’ôzange mè, ndô aṽyeṉi gô takilya g’ômwanja w’ôzange.

⁹ Ôzange wiṉo w’avegagi ôzange wa giligili, wi jenjiz’ôm’edu gô bya wô gô ntye yiṉo.

¹⁰ Avegagi gô ntye yiṉo, ni ntye y’avangyô yè, ndô ntye yi re mye yè.

¹¹ Aṽyeṉi gôr’aṉagi wèmè, ndô aṉagi wèmè wi pa bonga yè.

¹² Ndô waôdu w’awongi yè, na gôre waô w’aṽekely’ini nyè, aṽeṉi waô inyanga nyi tw’awaṉa w’Anyambyè,

¹³ wi re wi pa jaṉô ni ntyiṉa ge ntondiṉi y’ôzôṉe, ge ni ntondiṉi y’ôma, ndô ni ntondiṉi y’Anyambyè.

¹⁴ N’Igamba arweṉ’ôzôṉe alwaṉa gôre zwè, ralye n’imèpiṉô n’ômyèṉè; n’ayeṉi zwè ônjèlènjèlè wè, ônjèlènjèlè ga ônjèlènjèlè w’Ômwaṉa w’ikika wi pila gôre Rerè.

¹⁵ Yôan arakilyi g’ômwanji wè, arônga inè: Wiṉo ne yè y’awulyô myè inè: Ayè yi bya gô nyum̃i yam̃ atweṉi gô bôsô yam̃, konde ayè na myè ayè alônge dwaṉi.

¹⁶ Konde azwèdu azw’avenyô avila gw’ibuṉi sè imèpiṉô n’imèpiṉô;

¹⁷ konde ivanga ny’avenyô ni Môsès, ndô imèpiṉô n’ômyèṉè w’avyeṉi ni Yesu‐Krist.

¹⁸ E zel’ôma re jeṉa p’Anyambyè ni mori; Ômwaṉa w’ikika e dwaṉa gô ntôṉô ya Rerè, ayè re myeza p’aṉaga g’ômwanji wè.

¹⁹ Miṉo n’agamba mi Yôan, gw’arôm̃i Iju imiṉisè impôlô ni Leviti avila gô Yerusalèm gô bambyè inè: Awè, mande?

²⁰ Am̃èmi, e pa danda du, ndô am̃èmi nè, myè arange Krist.

²¹ N’aṽambyi waô yè inè: Sambô ande? Awè n’Eliya? N’awulyi yè inè: Myè arang’ayè. Awè n’ôvogisi? Awiṉizi yè inè: Nyawè.

²² Vovo awulinyi waô yè inè: Awè mande? ko zwè fwiz’igamba gôre waô w’atôm̃a zwè. Ô bulya sèṉig’ômwanja w’ôkuṽi womè?

²³ N’awulyi yè inè: Myè n’inyôy ny’ôma wi tônga gw’itôve inè: Vangaṉi mpoṉo ya Rerè gôre, ga nt’awulyi Yezaya y’ôvogisi.

²⁴ Waô w’arôm̃yô avili gôr’ifarisi.

²⁵ N’arô bambyi waô yè inè: Sambô ntiṉa nde yi batizo j’awè arange Krist, ge Eliya, ge ôvogisi?

²⁶ Awiṉizô waô ne Yôan inè: Mi batiza n’aṉingô, ndô gô garegare yaṉi ar’ôma wi re ṉwè pa mya,

²⁷ ayè yi bya gô nyum̃i yam̃; mi zele n’inyanga nyi puruṉ’ôgoli w’intyôzô sè s’atanga.

²⁸ Isam̃u yiṉo y’arweṉi gô Betani, gô ntye mori yi Yoridan, mbôra y’aṽatizagi Yôan.

²⁹ Bunya, ayeṉi Yesu e bya gôre yè, awulyi yè inè: Vônaṉi mw’idombè w’Anyambyè wi tômb’ibe si ntye yiṉo.

³⁰ Wiṉo ne yè y’awulyô myè inè: E by’ôma gô nyum̃i yam̃ atweṉi gô bôsô yam̃, konde ayè na myè ayè alônge dwaṉi.

³¹ Mi pa mya yè, ndô gô ntiṉa nè, e ga rum̃inyô gôr’Israèl yô y’aṽyeṉi myè gô batiza n’aṉingô.

³² N’arakilyi Yôan agamba miṉo inè: My’are jeṉa p’Iṉiṉa nyi sum̃iṉa avila g’ôrôṽa egolaṉi g’ibembe aṽatam̃iṉa gôre yè.

³³ Mi pa mya yè, ndô ayè y’arôm̃i myè gô batiza n’aṉingô, ayè mèmô awulinyi myè inè: Ayè yi be jeṉô wè e sum̃iṉô n’Iṉiṉa ko nyô dwaṉa gôre yè, ayè ne yè yi batiza n’Iṉiṉ’Iṽya.

³⁴ Na my’are jeṉa pa arakilya nè, ayè n’Ômwaṉa w’Anyambyè.

³⁵ Bunya, Yôan avegagi kum̃aṉa pa vovo ayè n’aṽaṉi w’iṉèngi yè;

³⁶ gw’ayeṉi yè Yesu e pyagaṉa, awulyi nè: Vônaṉi mw’idombè w’Anyambyè.

³⁷ N’iṉèngi mè mbaṉi w’ayogyô yè e kamb’agamba miṉo, n’azôngi waô Yesu.

³⁸ N’agegwi Yesu, ayeṉa waô wi sôngè, awulinyi yè waô inè:

³⁹ Aṉwè but’ande? Awiṉizi waô inè: Rabi (nyi pivya nè, ôṉènji), ô dwaṉa gweṉi?

⁴⁰ Awulinyi yè waô inè, yôgôṉi ko jeṉaṉi. Agèndi waô ayeṉè mbôra y’alwaṉôgô yè, n’alwaṉi waô na yè ôwenja mè. Avegagi pyèrè n’igôm̃i ny’agwèra.

⁴¹ Ôm̃ori gôr’iṉèngi mè mbaṉi ayogyô agamba m’agambyô ne Yôan, ko yè sônge Yesu, ne Andru, ya mwô’ngwè wi Simôn Pyère.

⁴² Ayè alônge dataṉi na mwô’ngi yè Simôn, n’awulinyè yè inè: Azw’are dènga pe Mesya (nyô bènguṉô pa nyi pivya inè, Krist).

⁴³ N’aṽagyè yè gôre Yesu. N’avônyô yè ne Yesu, awulya inè: Awè ne Simôn, y’ômwaṉa wi Yôna; ô be fweyô inè, Kefas (nyô bènguṉô pa nyi pivya inè, idô).

⁴⁴ Bunya, Yesu aṽeli gô kènda gô Galile, n’alataṉi yè ni Filipi. N’awulinyè yè inè: Zônga myè.

⁴⁵ Filipi avili gô Bètsayda, nkala y’Andru ni Pyère.

⁴⁶ N’alataṉi Filipi ni Natanaèl, n’awulinyè yè inè: Azw’are dènga p’ôma w’arèndyô ne Môsès gw’ivanga na w’agambyô n’ivogisi, Yesu yi Nazarèt, y’ômwaṉa wi Yôsèf.

⁴⁷ N’awulinyô yè ne Natanaèl inè: Ezom̃’eṽya zô ko bya avila gô Nazarèt? Awiṉizô yè ne Filipi nè: Yôgô, ko jeṉa.

⁴⁸ Gw’ayeṉi Yesu Natanaèl e bya gôre yè, awulyi g’ômwanji wè inè: Vônaṉi mw’Israèl wa rèti are azele n’itemiza.

⁴⁹ Awulinyô yè ne Natanaèl inè: Ô mya myè sèṉi? Awiṉizyô yè ne Yesu inè: Filipi weyôgo ro, my ayeṉi wè gw’avegagi wè gô ntiṉa y’erere zi figi.

⁵⁰ N’awiṉizi Natanaèl awulinyè inè: Ôṉènji, awè n’Ômwaṉa w’Anyambyè, awè n’ôga w’Israèl.

⁵¹ Awiṉizyô yè ne Yesu inè: W’abekelya, konde my’abulinyo inè, my’ayeṉi wè gô ntiṉa y’erere zi figi; ô be tô jeṉ’isam̃u imyèṉè impôlô vyagaṉô na yiṉo.

⁵² N’awulinyè yè inè: Giligili, mi bulinya ṉwè inè, avila vèṉo aṉwè be jeṉ’ôrôṽa nungwa pa zange n’iyenjèl s’Anyambyè mpandaga ni nsum̃iṉaga gôr’Ômwaṉa w’ôma.