Tite 1 - Bibili 1927 (Omyene)

¹ Pol, nyôngô y’Anyambyè, n’erôm̃i zi Yesu‐Krist g’ômwanja w’ibekelya sa mongi wi re pinjô pa n’Anyambyè, na w’imya s’ôrèti wi re ga nt’are njanjiṉi yi janjiṉô Anyambyè, —

² gw’igum̃u ny’em̃èṉo za koṉako, z’avanganyô n’Anyambyè, yi re y’ayolye nôke, avila gô gômbe lônga,

³ ndô egômbe siṽa pa are bôm̃unya p’igambi nyè v’ikambiṉa si Ntyangô Mbya, yi re jegiṉô pa myè, ga nt’ar’ôzômbyô w’Anyambyè y’Ôzungè wazô, —

⁴ gôre Tite, y’ômwaṉi wam̃ w’ayanyô myè ga nt’ar’ibekelyi sazô mèmô: Imèpiṉô n’am̃ènjè mi ga vô avila gôr’Anyambyè ya Rerè, ni Yesu‐Krist y’Ôzungè wazô.

⁵ My’alèkizi wè gô Krèti nè, ko wè kenj’isam̃u y’arigaṉi gô kenjô, alôvy’aṉèro, ga nt’ar’inènji sam̃, gô nkaly’edu,

⁶ j’adwaṉ’ôma re ntyèmbo fo, ôṉôm̃e w’ômwant’ôm̃ori dadyè, are n’awaṉa wi re ko bekelyô, wi re wi pa sozizô g’ômwanja w’isam̃u imbe ge ipava.

⁷ Konde miṉisè e ga Iwaṉe ntyèmbo fo, g’ôvenjavenji w’Anyambyè; arang’ôvagasô, ge ôṽendisi, g’eyonga, ge ôma wi mbaô, ge ôma w’ôgasô ômbe w’aṉiva;

⁸ ndô e ga lwaṉe n’ôyôgô gôr’aṉaga, ndegô y’aṉag’aṽya, zima, ôgôre, nkèrè, n’isimbya s’ôkuṽa,

⁹ ndiṽa pa gw’igamba mè ny’ôrèti ny’anènjyô yè, ko yè dwaṉa ni ngulu gô tevuṉ’aṉaga ga nt’ar’inènj’ibya, na gô fwiṉiz’igamba gôre waô wi sira.

¹⁰ Konde ar’awenge wi pava, igambisi y’agamba m’enyale n’iremisi, pôsô gôre waô wi re kèrô pa,

¹¹ mi r’agwaṉi maô mi ga ṉunjô. Wi sug’imbuṽe s’impundu gô dèng’ôba wi ntyoṉi, nènjag’isam̃u yi re yi zele kwèkwè gô nènjô.

¹² Ôm̃ori gôre waô, ôvogisi waômè, are bulya pa nè: Krèti wi r’inôki egômbe zôdu, inyam̃a simbe, ambum̃u m’agera. Igamba nyiṉo nyi re rèti.

¹³ Yeṉo, zèmba waô pôlô, ko waô dwaṉa n’ibekely’ibya,

¹⁴ ko w’aliṽa gw’inkôgô s’Iju, na gw’isômbya s’aṉaga wi kegwa avila g’ôrèti.

¹⁵ Ezom̃’edu zi re nkèrè gôre waô wi nkèrè, ndô e zel’ezom̃a nkèrè gôre waô wi re fweva pa, n’ibekelya fo. Ikôtizi saô n’irèm̃i yaô yi re fweva pa.

¹⁶ Wi mèma gô my’Anyambyè, ndô wi dandè n’ijanji saô, wi re bikô pa, n’ivavisi, ni ngulu fo gw’eṽilô edu eṽya.