Rôm̃i 1 - Bibili 1927 (Omyene)

¹ Teôfilus, my’are kamba pa gw’ezangô zam̃ elônga, g’ômwanja w’isam̃u yôdu y’avakilyô ne Yesu gô denda na gô nènja,

² kwanga gô ntyugu y’awongyô yè g’ôrôṽa, ayè pa p’izômbyô yè vo Iṉiṉ’ Iṽya, gôre rôm̃i y’avinjyô yè.

³ Ayè sindiṉa p’ijuwa, awôm̃unyi bo gôre waô n’impoṉo sinyenge, arum̃iny’ôkuṽi wè gôre waô agôm̃i m’intyugu anay, nkambaga g’ômwanja w’isam̃u y’iṉongo ny’Anyambyè.

⁴ Gw’avegagi yè na waô, azômbyi waô inè, w’alubwa gô Yerusalèm, ndô wi ga wônd’ômpangaṉô wa Rerè, w’ayogyô waô gôre yè, inè,

⁵ Yôan aṽatizagi n’aṉingô, ndô aṉwè, aṉwè be batizô n’Iṉiṉ’Iṽya, e ze pyagaṉ’intyugu sinyenge.

⁶ Yeṉo gw’avegagi rôm̃i dataṉa pa w’aṽambyi yè inè: Rera, ô be fwiz’ipangiṉa gôr’ Israèl egômbe ziṉo?

⁷ Awiṉizi yè waô inè: Aranga gôre ṉwè gô mye gômbe ge agwèra mi re Rerè kenja pa gô ngulu yè.

⁸ Ndô aṉwè be dènge ngulu y’Iṉiṉ’Iṽya nyi be bya gôre ṉwè, ko ṉwè dwaṉ’iyeṉi yam̃ gô Yerusalèm, na gô Yuda yôdu, na gô Samarya, na kwanga gô ntyay yi ntye.

⁹ Ayè bulya p’agamba miṉo, awongyô gw’igôṉô avila gw’azô maô, n’evindi z’awongi yè avila gw’antyo maô.

¹⁰ Na gw’avônagi waô gw’igôṉô, gw’agèndagi yè, vôna, aṉag’aṽaṉi w’avegagi bora p’ambora ma pupu, awulyi waô inè:

¹¹ Aṉôm̃e wi Galile, ntiṉa nde yi kum̃aṉa ṉwè mpônaga g’ôrôṽa? Yesu yiṉo, yi re bongô pa avila gôre ṉwè agènda g’ôrôṽa, e be tô bya mbela mèmô y’ajeṉa ṉwè yè e kènda g’ôrôṽa.

¹² Vovo awinyi waô gô Yerusalèm, avila gô nômba yi fweyô inè, yi yôlivi, yi re pyèrè ni Yerusalèm, ôgèndo w’ôwenja wi soṉo.

¹³ Na gw’aṽyeṉi waô gô Yerusalèm, w’avandi gô nontye y’igôṉô y’alwaṉagi waô; w’avegagi wa Pyère, wa Yôan, wa Yakobu, wa Andru, wa Filipi, wa Tôma, wa Bartelemi, wa Matay, wa Yakobu, y’ômwaṉa w’Alifas, wa Simôn yi Zelôte, na wa Yudi, y’ômwaṉa wi Yakobu.

¹⁴ Wiṉo waôdu w’alwaṉagi n’ôrèm̃’ôm̃ô gw’ikambiṉa, waô n’antô ta, na wa Marya, yi ngwè yi Yesu, n’awongwè aṉôm̃e wi Yesu.

¹⁵ Gw’intyugu mèsoṉo avegag’aṉag’awenge dataṉa pa, pyèrè ni nkam̃a y’aṉaga n’agôm̃i m’aṉag’ambaṉi, agum̃aṉi Pyère gô garegare y’awarerè, awulya inè:

¹⁶ Awarera, avegag’isolo inè, isam̃u y’aliwô myezyô n’Iṉiṉ’Iṽya gw’Irèndo n’ôgwaṉa wi David, g’ômwanja wi Yudas, ôrevi wa mongi w’agôti Yesu, yi ga rwe rèti.

¹⁷ Konde avegagi tangô pa gôre zwè, awonga kè mbèy gw’eṽilô ziṉo zi miṉisè.

¹⁸ Ôṉôm̃e mè agôli ntyaga n’ipa s’ibe sè, n’avôswi yè ôlôlôṽa, aruwaruwa gô garegare, n’izègè yè yôdu y’agogwi.

¹⁹ N’igamba ny’amyenyô n’alwaṉi wi Yerusalèm waôdu, inè ntyaga mè y’aweyô ni nkambiṉi yaô inè, Akèldama, nyi pivya inè, ntyaga yi ntyiṉa.

²⁰ Konde are tèndô pa gw’ezangô z’Ijembô inè: Ilwaṉô nyè nyi ga lwaṉ’irevô, ko alwaṉ’ôma gô nyô! na inè: Inyangi nyè nyi ga wong’ôm’ômwèṉè!

²¹ Sambô, gôr’aṉôm̃e w’agangaṉagi na zwè egômbe zôdu z’alwaṉi Rerè Yesu njingiṉaga ni nkogwaga na zwè,

²² avila gw’ibatiza si Yôan kwanga gô ntyugu y’awongyô yè avila gôre zwè, gôre mongi siṉo ôm̃ori e ga lwaṉe na zwè ôyeṉi w’itôngwi sè.

²³ N’alôṽyi waô aṉag’aṽaṉi, Yôsèf, aweyôgô inè, Barsabas, aweyôgô kè inè, Yustus, ni Matyas.

²⁴ N’agambiṉi waô inè: Rera, awè yi my’irèm̃a y’aṉaga waôdu, reta gôre mongi siṉo aṽaṉi ôma wi re wè pinja pa,

²⁵ ko yè bonge mbôra gw’eṽilô ziṉo zi miṉisè na gw’eṽilô ziṉo z’erôm̃i z’arigyô ne Yudas, ko yè kènda gô mbôri yèmè.

²⁶ Avungi waô ezôga, n’agôti ezôga gôre Matyas, n’arangyô yè gô ntangô y’igôm̃i nyi rôm̃i n’erôm̃i em̃ori.