Ôsea 1 - Bibili 1927 (Omyene)

¹ Igamba nyi Yeôva ny’aṽagyô gôr’Ôsea, y’ômwaṉ’ôṉôm̃e wi Beeri, gw’egômbe z’Ôzyas, zi Yôtam, z’Akaz, z’Ezekyas, aga wi Yuda, na gw’egômbe zi Yerôbôam, y’ômwaṉ’ôṉôm̃e wi Yôas, ôga w’Israèl.

² Nyongo nônga y’agambi Yeôva igamba gôr’Ôsea, Yeôva awuliny’Ôsea inè: Gènda, ko bong’evôvevôve z’ômwantô n’awaṉa w’evôvevôve; konde ntye yi re n’ôṽelaṉô, y’atigi Yeôva!

³ Yeṉo agèndi yè, awonge Gômèr, y’ômwaṉ’ômwantô wi Diblayim. Avundigi yè inyem̃e, ayaṉiṉè mw’ôṉôm̃e.

⁴ N’awulinyô yè ne Yeôva inè: Ṽèt’ini nyè inè, Yisreèl; konde e p’are mw’egômbe, gambèṉè mi be sônye nagô yi Yeu ôgôm̃a g’ômwanja wi ntyiṉa y’avôvizô gô Yisreèl, mi be pang’ipangiṉa si nagô y’Israèl gô maṉa.

⁵ Gô ntyugu mèyoṉo, mi be moguṉ’elendiṉa z’Israèl g’ôdèdè wi Yisreèl.

⁶ N’arô pundigi yè nyongo nyèṉè, n’ayaṉi yè ômwaṉ’ômwantô. N’awulinyi Yeôva Ôsea inè: Ṽèt’ini nyè inè, Lô‐Rusama; konde my’arô pôgiṉe nyèṉè nagô y’Israèl, my’arô nyeze yè nyèṉè.

⁷ Ndô mi be pôgiṉe nagô yi Yuda; mi be sungiṉa waô vo Yeôva, Anyambyè yaô, mi ze sungiṉe waô n’elendiṉa, ge n’ôkwara, ge n’igoṽi, ge n’ikavala, ge na mongi wi panda gw’ikavala.

⁸ Ayè tômba pe Lô‐Rusama avila gw’iwèṉè, arô pundigi yè, ayaṉa mw’ôṉôm̃e.

⁹ N’awulyi Yeôva inè: Ṽèt’ini nyè inè, Lô‐Ami; konde aṉwè arang’iṉongo nyam̃, na myè kè arang’Anyambyè yaṉi.