Luk 1 - Bibili 1927 (Omyene)

¹ Gô re nè ar’aṉaga wi re kèṉiza pa gô tènde yangô g’ômwanja w’isam̃u yi re dwaṉizô pa gôre zwè,

² ga nt’aveṉi waô zwè yô, waô w’avegag’iyeṉi n’imiṉisè s’igamba avila gw’ipakilya,

³ y’ayenyô mbya kè gôre myè, myè kèlagèla p’isam̃u yôdu mbyambye avila gw’ipakilya, gô tèndiṉo yô, rera Teôfilus,

⁴ ko wè my’ôrèti w’isam̃u y’aṉènjô wè.

⁵ Gw’intyugu s’Erod, y’ôga wi Yuda, avegagi miṉisè, ini nyè ne Zakarya, gô nkumba y’Abiya; ômwantô wè avegagi ’mwamwantô w’Aarône, ini nyè ne Elizabèt.

⁶ Waôdu aṽaṉi w’avegagi agôre g’ôzô w’Anyambyè, ndwaṉaga gw’isômbya na gw’ampanga ma Rerè ntyèmbo fo.

⁷ Ndô wi re pegege n’awaṉa, konde Elizabèt avegagi nkele; na waô aṽaṉi w’avegagi dômbiṉa pa.

⁸ N’arweṉi gw’ayanjagi yè ṽilô yè yi miṉisè, gw’egômbe zi nkumbi yè, g’ôzô w’Anyambyè,

⁹ arweṉi gôre yè, ga nt’avegagi ntyale y’eṽilô zè zi miṉisè, gô jingiṉa gô nagô y’ôrunda ya Rerè, gô peze yom̃a yi nkangô.

¹⁰ Aṉaga waôdu w’avegagi nkambiṉaga gw’igala, gw’igwèra ny’ayirôgô yom̃a yi nkangô.

¹¹ N’awôm̃unyi yenjèl ya Rerè gôre Zakarya, kum̃aṉa pa gôre gô nkôṽa y’ôgo ôṉôm̃yè wi mbôra yi jirô intyagô si yom̃a yi nkangô.

¹² N’ayègèryi Zakarya gw’ayeṉi yè yô, n’agôtyô yè n’itya.

¹³ Ndô yenjèl y’awulinyi yè inè: Arya du, Zakarya, konde ikambiṉi so si re jogaṉô pa gôr’Anyambyè. Ômwantô wo Elizabèt e be jaṉiṉo ômwaṉ’ôṉôm̃e, ko wè bèt’ini nyè inè, Yôan.

¹⁴ Ô be jeṉe mbya n’igeṽa g’ômwanji wè, n’awenge wi be jeṉe mbya gw’ijaṉô sè.

¹⁵ Konde e be dwaṉ’ômpôlô g’ôzô wa Rerè. E ze jong’ivè, ge alugu, ndô e be jônyô n’Iṉiṉ’Iṽya avila gw’iwum̃u nyi ngi yè;

¹⁶ e be fwiz’awaṉ’ awenge w’Israèl gôre Rerè, Anyambyè yaô;

¹⁷ e be kangaṉa g’ôzô w’Anyambyè ni mpangiṉi ni ngulu y’Eliya, gô fwiz’irèm̃a y’irerè gôr’awaṉa, n’impavèmpavè gw’imya s’agôre, gô kekize Rerè iṉongo nyi be dwaṉa keka pa gôre yè.

¹⁸ Awulinyi Zakarya yenjèl inè: Mi be my’ôsam̃u wiṉo sèṉi? Konde my’adômbiṉi, n’ômwantô wam̃ kè atweṉi mbôlô.

¹⁹ Awiṉizyô yè ne yenjèl inè: Myè ne Gabryèl, yi kum̃aṉa g’ôzô w’Anyambyè; my’atôm̃ô gô kamba na wè, na gô bunguṉo ntyangô mbya yiṉo.

²⁰ Na vôna, ô be dwaṉ’im̃am̃u ko w’ayolya gô kamba kwanga gô ntyugu yi be tw’isam̃u yiṉo, konde ô pa bekely’agambi mam̃, mi be twa rèti gô be siṽ’egômbe za mô.

²¹ Ndô aṉaga w’avegagi mbôndage Zakarya, am̃ama g’ômwanja w’ôlingô w’alingyô yè gô nagô y’Anyambyè.

²² Gw’agogwi yè, e pa jolya gô kamba na waô, n’amyeṉi waô inè, ajeṉ’ezom̃a gô nagô y’Anyambyè; n’agambi yè na waô n’ôgo, alwaṉ’im̃am̃u.

²³ N’arweṉi nè, gw’azuk’intyugu s’eṽilô zè, agèndi gô nagô yè.

²⁴ Avila gw’intyugu mèsoṉo, Elizabèt, y’ômwantô wè, arweṉi inyem̃e. N’azombuṉi yè agwèli ataṉè, awulya inè:

²⁵ Yiṉo ne nkèngo yi re Rerè dendina pa myè, gw’avôni yè myè gô tômbe ntyoṉi yam̃ avila gôr’aṉaga.

²⁶ G’ôgwèli w’ôrôṽa, yenjèl Gabryèl arom̃yô n’Anyambyè gô nkala yi Galile, y’aweyôgô inè, Nazarèt,

²⁷ gôr’izali nyi re nyi pa dèwa n’ôṉôm̃e ni mori, ny’avegagi tom̃ô pa n’ôṉôm̃e, ini nyè ne Yôsèf, ôma wi nagô yi David. N’ina ny’izali mè ne Marya.

²⁸ N’ayingiṉi yenjèl gôre yè, awulya inè: Sale, awè yi re dènga p’imèpiṉô; Rerè are na wè.

²⁹ Ndô Marya ayègèryi pôlô g’ômwanja w’igamba mè, ayèkèlya g’ôrèm̃i wè nt’are ko pivy’ôzanguṉ’ôṉongo mè.

³⁰ N’awulinyô yè nè yenjèl inè: Marya, arya, konde ô re dènga p’imèpiṉô gôr’Anyambyè.

³¹ Na vôna, ô be pundig’inyem̃e, ko wè jaṉ’ômwaṉ’ôṉôm̃e, ko wè bèt’ini nyè inè, Yesu.

³² E be dwaṉ’ômpôlô, ko yè fweyô inè, Ômwaṉa w’igôṉômè, ni Rerè Anyambyè e be pè eka zi David, ya reri yè.

³³ E be pangiṉe nagô yi Yakob egômbe zôdu, n’ipangiṉi sè si ze dwaṉe ni ntyay.

³⁴ N’awulinyi Marya yenjèl inè: Ôsam̃u wiṉo wi be dwaṉa sèṉi, gô re nè mi pa mya du ôṉôm̃e?

³⁵ Awiṉizyô yè ne yenjèl inè: Iṉiṉ’Iṽya nyi be bya gôre wè, ni ngulu y’ôma w’igôṉôm̃e yi be pugiṉo. Yeṉo ômwaṉa w’ôrunda wi be jaṉô avila gôre wè e be fweyô inè, Ômwaṉa w’Anyambyè.

³⁶ Na vôna, Elizabèt, ya mongi yo, apundigi kè inyem̃e ny’ômwaṉ’ôṉôm̃e gô mbôlô yè, na wiṉo ne ôgwèli w’ôrôṽa, gôre yè y’aweyôgô inè, nkele.

³⁷ Konde gôr’Anyambyè e zel’igamba nyi re ny’alendô.

³⁸ N’awulyi Marya inè: Vôna, myè ne nyôngô nyantô ya Rerè; ga lwaṉe gôre myè ga nt’ar’igambi nyo! N’alubwi yenjèl avila gôre yè.

³⁹ Gw’egômbe mèzoṉo, agum̃aṉi Marya, agènda n’ôrara gw’inômba, gô nkala yi Yuda.

⁴⁰ N’ayingiṉi yè gô nagô yi Zakarya, azanguṉ’Elizabèt.

⁴¹ Arweṉi nè, gw’ayogyô Elizabèt isanguṉa si Marya, ômwaṉa aruli gw’iwum̃u nyè, n’ayônyô Elizabèt n’Iṉiṉ’Iṽya.

⁴² N’arôngi yè n’inyôy ivôlô inè: Ô re saviṉô pa gôr’antô, n’ôlônda w’iwum̃u nyo wi re saviṉô pa.

⁴³ Yi re twa pa sèṉi gôre myè inè, ngwè ya Reri yam̃ abya gôre myè?

⁴⁴ Konde vôna, gw’abya inyôy ny’isanguṉi so gw’arôy mam̃, ômwaṉa atula gw’iwum̃u nyam̃ ni mbya.

⁴⁵ Ôzaviṉô gôre yè yi re bekelya pa, konde isam̃u mèyoṉo yi re kambô pa gôre yè avila gôre Rerè yi be sukizô gôre yè.

⁴⁶ N’awuly Marya inè: Iṉiṉi nyañ nyi pendye Rerè,

⁴⁷ n’iṉiṉi nyam̃ nyi jeṉe mbya gôr’Anyambyè, y’Ôzungè wam̃,

⁴⁸ konde are pôna p’inyang’inyangô nyi nyôngô yè nyantô. Konde vôna, avila vèṉo ampôm̃a môdu mi be bulinya myè inè, ôzaviṉô,

⁴⁹ konde ayè yi re ni ngulu are dendiṉa pa myè isam̃u impôlô. Ini nyè nyi r’ôrunda,

⁵⁰ ni nkèngo yè yi re gw’ampôm̃a n’ampôm̃a gôre waô wi tyè.

⁵¹ Are tum̃inya pe ngulu y’ôgo wè; are pazangaṉa pa waô wi re n’ipikilya s’ekale gw’irèm̃i yaô.

⁵² Are sônya p’ampenda avila gô ki yaô, avendya aṉaga wi re n’anyang’amangô.

⁵³ Are jôriza pe mongi wi re ni njaṉa n’ambya, awize kiti arevô.

⁵⁴ Are nunguṉa p’Israèl, nyôngô yè, ko yè jônginye nkèngo yè, — ga nt’awulinyi yè ireri sazô, —

⁵⁵ gôr’Abraam n’awaṉi wè egômbe zôdu.

⁵⁶ Alwaṉi Marya n’Elizabèt pyèrè n’agwèli ararô. Vovo awinyi yè gô nagô yè.

⁵⁷ Aziṽi egômbe zi re Elizabèt gô jaṉa, n’ayaṉi yè ômwaṉ’ôṉôm̃e.

⁵⁸ Ayogyô irangaṉô yè n’awôngi yè inè, Rerè aliwô abuṉizi nkèngo yè gôre yè, n’ayeṉi waô mbya na yè.

⁵⁹ N’arweṉi gô ntyugu y’eṉanay, aṽyeṉi waô gô kèr’ômwaṉa, n’arô bèti waô yè ini nyè inè, Zakarya, ina nya reri yè.

⁶⁰ Ndô ngi yè awiṉizi, awulya inè: Nyawè, ndô e ga weyô inè, Yôan.

⁶¹ N’awulinyi waô yè inè: Gôr’awôngi yo e zel’ôma wi re bètô p’ina mè.

⁶² Agambi waô na reri yè n’ago, aṽambyè nte belè inè, e ga ṽètô.

⁶³ N’aṽambyi Zakarya mwô’ntimbe yi tèndiṉa, n’arèndi yè gô yô inè: Ini nyè ne Yôan. N’am̃ami waôdu.

⁶⁴ N’aṉunguṉi ôgwaṉi wè pelè, avuruṉ’ôṉèm̃è wè, n’agambi yè, azaviṉ’Anyambyè.

⁶⁵ Agôtyô waôdu w’alwaṉagi vingôvingô n’itya, n’isam̃u yiṉo yôdu y’ayoganyô gô mbôry’edu gw’inômba si Yuda.

⁶⁶ Waôdu w’ayogyô yô w’avenjavenji yô gw’irèm̃i yaô, awulya inè: Sambô ômwaṉa wiṉo e be dwaṉ’ande? N’ôgo wa Rerè w’avegagi na yè.

⁶⁷ Ayônyô Zakarya, ya reri yè, n’Iṉiṉ’Iṽya, n’avogi yè inè:

⁶⁸ Ôzaviṉô gôre Rerè, Anyambyè y’Israèl, konde are bala pa, alanduṉ’iṉongo nyè,

⁶⁹ are nongunya pe mengô y’isungiṉa gôre zwè, gô nagô yi nyôngô yè David,

⁷⁰ ga nt’agambi yè n’agwaṉa m’ivogisi yè y’ôrunda yi re dwaṉa pa avila gw’ipakilya si ntye inè,

⁷¹ Ôzungè wi be sungiṉa zwè avila gôr’ilôvalôvi yazô n’avila gw’ago ma waôdu wi bika zwè!

⁷² Ôzaviṉô gôre Rerè g’ômwanja wi nkèngo yè yi tum̃inyô yè gôr’ireri sazô, ayônginye njeki yè y’ôrunda,

⁷³ ga nt’arangi yè ôrangô gôr’Abraam, ya reri yazô,

⁷⁴ gô panga zwè inè, azwè sungiṉô pa avila gw’ago m’ilôvalôvi yazô, azwè ga yanjiṉe yè itya fo,

⁷⁵ ndwaṉage nkèrè n’ôgôre g’ôzô wè, intyugu si m̃èṉo yazô sôdu!

⁷⁶ N’awè, ômwaṉa, ô be fweyô inè, ôvogisi w’Ôma w’igôṉômè. Konde ô be kènda gô bôsô ya Rerè, gô kekiz’impoṉo sè,

⁷⁷ gô p’imya s’isungiṉa gôr’iṉongo nyè, gw’inyeza s’ibe saô,

⁷⁸ g’ômwanja w’ôrèm̃a wi nkèngo w’Anyambyè yazô wi re jeṉiza pa zwè ijenja s’ôwenja avila gw’igôṉô,

⁷⁹ gô bamba gôre waô wi re dwaṉa pa baru gô mpiri na gw’iviri ny’ijuwa, gô kèndy’agôlô mazô gô mpoṉo y’am̃ènjè.

⁸⁰ N’avôm̃agi ômwaṉa, ayola g’ôrèm̃a. N’alwaṉi yè gw’itôve, kwanga gô ntyugu y’awôm̃unyi yè gôr’Israèl.