Levitiki 1 - Bibili 1927 (Omyene)

¹ N’aweyi Yeôva Môsès, agamba gôre yè avila gô ñanja y’idataṉa, inè:

² Gamba gôr’Israèl awulinya waô inè: Jog’ôm’edu gôre ṉwè ajire ntyagô gôre Yeôva, gambèṉè e be jire ntyagô y’inyam̃a avila gw’inyam̃’impôlô ntyo avila gw’inyam̃’inyangô.

³ Jogo ntyagô yè y’adwaṉe ntyagô yi pezô y’inyam̃a s’evenda, gambèṉè e be jire nyam̃a nôm̃e yi re ntyèmbo fo; e be jira yô g’ômpômbala wi ñanja y’idataṉa, g’ôzô wi Yeôva, gôre yè gô dèng’imèpiṉô.

⁴ E be taly’ôgo gw’ewônjô zi nyam̃a yi jirô ntyagô yi pezô, yi be tondô ne Yeôva, gôre yè gô taṽe mpungu y’ibe.

⁵ E be jôṉa mwô’nyare g’ôzô wi Yeôva; n’imiṉisè, awaṉ’aṉôm̃e w’Aarône, wi be jire ntyiṉa, anyènya yô gô mbôra yôdu yi jirô intyagô vingôvingô, yi re g’ômpômbala wi ñanja y’idataṉa.

⁶ E be jôkuṉe nkôwô yi nyam̃a yi jirô ntyagô yi pezô, aṽaza yô izôṉe.

⁷ Awaṉ’aṉôm̃e w’Aarône, yi miṉisè, wi be fwel’ôgôṉi gô mbôra yi jirô intyagô, alimbiṉ’ikôṉi g’ôgôṉi.

⁸ Imiṉisè, awaṉ’aṉôm̃e w’Aarône, wi be fwel’izôṉe, ewônjô n’agali, gw’ikôṉi s’afwelô g’ôgôṉi gô mbôra yi jirô intyagô.

⁹ E be jôvuṉ’isègè n’ambèṉi n’aṉingô; ni miṉisè yi be peza yôdu gô mbôra yi jirô intyagô. Yô ne ntyagô yi pezô, ntyagô yi pezô ne ôgôṉi yi nkangô mbya gôre Yeôva.

¹⁰ Jogo ntyagô yè yi re ntyagô yi pezô yi nyam̃a nyangô y’ômw’idombè ntyo mbôṉi nyantô, gambèṉè e be jire nôm̃e yi re ntyèmbo fo.

¹¹ E be jôṉa yô g’ôzamba wi nkôṽa yi Nor yi mbôra yi jirô intyagô g’ôzô wi Yeôva; n’imiṉisè, awaṉ’aṉôm̃e w’Aarône, wi be nyènye ntyiṉa ya yô gô mbôra yôdu yi jirô intyagô vingôvingô.

¹² E be baza yô izôṉe, n’imiṉisè si be fwela yô n’ewônjô za yô, n’agali ma yô gw’ikôṉi s’adimbiṉô g’ôgôṉi gô mbôra yi jirô intyagô.

¹³ E be jôvuṉ’isègè n’ambèṉi n’aṉingô; ni miṉisè e be jira yôdu ntyagô, aveza yô gô mbôra yi jirô intyagô. Yô ne ntyagô yi pezô, ntyagô yi pezô ne ôgôṉi, yi nkangô mbya gôre Yeôva.

¹⁴ Jogo ntyagô yè gôre Yeôva yi re ntyagô yi pezô y’inyoṉi, gambèṉè e be jir’abembe ntyo awaṉa w’imenga.

¹⁵ Miṉisè yi be jire nyoṉi gô mbôra yi jirô intyagô; e be tôl’ewônjô za yô n’ôm̃eṉô, aveza yô gô mbôra yi jirô intyagô, e be jire ntyiṉa ya yô g’ôzamba w’igala wi mbôra yi jirô intyagô.

¹⁶ E be tômb’efu n’ati mi re gô zô, awala yô pyèrè gô mbôra yi jirô intyagô gô nkôṽa yi tongwa ni nkômbe, gô mbôra yi dimbiṉô ômbu.

¹⁷ E be jôkuṉ’ampava ko aṽangunya mô; ni miṉisè e be peze nyoṉi gô mbôra yi jirô intyagô, gw’ikôṉi s’adimbiṉô g’ôgôṉi. Yô ne ntyagô yi pezô, ntyagô yi pezô ne ôgôṉi, yi nkangô mbya gôre Yeôva.