Itum̃inya 1 - Bibili 1927 (Omyene)

¹ Itum̃inya si Yesu‐Krist, s’avenyô yè n’Anyambyè gô tev’inyôngô sè isam̃u yi be sunge twa, n’arôm̃i yè yenjèl yè gô myeza yô gôre nyôngô yè Yôan, —

² n’arakilyi Yôan igamba ny’Anyambyè n’agamba mi Yesu‐Krist, n’isam̃u yôdu y’ayenyô yè.

³ Ôzaviṉô gôre yè yi tanguṉa, na gôre waô wi jogw’agamba m’ipoga, avenjavenj’isam̃u yi re tèndô pa gô sô! Konde egômbe z’atweṉi pyèrè.

⁴ Yôan gôr’imandô ôrwageṉô si re gw’Azya: imèpiṉô n’am̃ènjè mi ga vô avila gôre yè yi re, na y’avegagi, na yi re gô bya, n’avila gôr’aṉiṉ’ôrwageṉô mi re swaswo n’eki zè,

⁵ n’avila gôre Yesu‐Krist, ôyeṉi wi re ko bekelyô, njalyè ya mongi wi re juwa pa, n’ôvangiṉi w’aga wi ntye! Gôre yè yi tonda zwè, arômba zwè avila gw’ibe sazô vo ntyiṉi yè,

⁶ avanga zwè iṉongo, imiṉisè gôr’Anyambyè ya Reri yè; gôre yè ga lwaṉ’ivenda ni ngulu, gô koṉako! Amèn!

⁷ Vônaṉi, e bya ni vindi. N’intyw’edu nyi be jeṉè, na waô w’arumyè wi be jeṉè; n’imbuṽe si ntye sôdu si be deṉa g’ômwanji wè. Yeṉo. Amèn!

⁸ Myè n’alifa n’ômega [ipakilya ni ntyay], bulye Rerè Anyambyè, yi re, na y’avegagi, na yi re gô bya kè, Anyambyè yi ngulu yôdu.

⁹ Myè Yôan, ya ’mwareri yaṉi, n’ôwongisi na ṉwè gw’injuke na gw’iṉongo na gw’isoliṉa gôre Yesu, my’avegagi gô nenge yi fweyô nè Patmos, g’ômwanja w’igamba ny’Anyambyè n’igamba nyi Yesu.

¹⁰ My’avegagi gw’Iṉiṉa gô ntyugu ya Rerè, n’ayogyô myè gô nyum̃i yam̃ inyôy ivôlô, ga inyôy ny’ôrombo, nyi bulya nè:

¹¹ Isam̃u yi jeṉô wè, rènda yô gw’ezangô, arwaza zô gw’imandô ôrwageṉô, gw’Efèsi, na gô Smirna, na gô Pergame, na gô Tiyatira, na gô Sarde, na gô Filadèlfya, na gô Laôdikya.

¹² Agegwi myè gô my’inyôy ny’agambi na myè. Na myè kegwa pa, my’ayeṉ’ilambi ôrwageṉô si sika ya teṉateṉa,

¹³ na gô garegare y’ilambi, my’ayeṉ’ôma n’egolaṉi z’ômwaṉa w’ôma, bora pe ngoy nda kwanga gw’intyôzô, n’ôtumba wi sika ya teṉateṉa diryô pa gô ntôṉô yè.

¹⁴ Ewônjô zè n’itwe sè s’avegagi pupu g’imya ya pupu na ga nèzi; n’antyo mè m’avegagi g’ibam̃iṉa s’ôgôṉi;

¹⁵ intyôzô sè s’avegagi ga nyènyè njombwi, mpaṉi ga y’ajanginyô gw’iṉu; n’inyôy nyè ga aṉingô am̃enge.

¹⁶ N’avegagi yè n’igègèṉi ôrwageṉô g’ôgo wè ôṉôm̃yè. N’agogw’ôkwar’ôrweṉi wi re n’arwa nkôṽa sô mbaṉi avila g’ôgwaṉi wè; n’ôzô wè w’avegagi ga nkômbe gô bamba yô ni ngulu.

¹⁷ Gw’ayeṉi myè yè, my’avôswi gw’agôlô mè g’ebende. N’aralyi yè ôgo wè ôṉôm̃yè gôre myè, awulya nè: Arya! Myè n’ôlônga n’ôṉum̃uṉa, n’ôma wi re bo.

¹⁸ My’avegagi juwa pa; na vôna, my’are bo gô koṉako. My’are kè n’isape s’ijuwa na s’ilômbô.

¹⁹ Sambô, rènd’isam̃u yi re wè jeṉa pa, n’isam̃u yi re, n’isam̃u yi re gô twa gô bôsô,

²⁰ iyumbuṉô ny’igègèṉi ôrwageṉô y’ajeṉô wè g’ôgo wam̃ ôṉôm̃yè, n’ilambi si sika ya teṉateṉa ôrwageṉô. Igègèṉi ôrwageṉô yô n’iyenjèl s’imandô ôrwageṉô, n’ilambi ôrwageṉô sô n’imandô ôrwageṉô.