Galati 1 - Bibili 1927 (Omyene)

¹ Pol, erôm̃i arang’avila gôr’aṉaga, ge v’ôma, ndô vo Yesu‐Krist n’Anyambyè ya Rerè, y’arôngunyè avila gw’ijuwa,

² n’awarerè waôdu wi re na myè, gôr’imandô si Galati:

³ imèpiṉô n’am̃ènjè gôre ṉwè avila gôr’Anyambyè ya Rerè, n’Ôvangiṉi wazô Yesu‐Krist,

⁴ aveṉi ôkuṽi wè g’ômwanja w’ipavi sazô, gô sungiṉa zwè avila gw’egômb’eṽe za tè ziṉo, ga nt’are ntondiṉi y’Anyambyè, ya Reri yazô;

⁵ gôre yè ga lwaṉ’ivenda egômbe zôdu! Amèn!

⁶ Mi mama nè, aṉwè sunge kegwa avila gôre yè y’aweyi ṉwè gw’imèpiṉô si Krist, gô sônge ntyangô mbya nyèṉè.

⁷ Yi re yi zele rèti ntyangô mbya nyèṉè, ndô dadyè awèwo wi sokolya ṉwè, aṽele fwevize Ntyangô Mbya yi Krist.

⁸ Ndô vangaṉ’azwèmè, ge vangaṉe yenjèl y’apila g’ôrôṽa, agambiṉe ntyangô mbya nyèṉè, tômbare pa mèyoṉo yi kambiṉô zwè, e ga logô ndogôgô.

⁹ Ga nt’adônge bulya zwè, yeṉo tô bulya myè vèṉo inè, j’ôm’akambiṉa ṉwè ntyangô mbya nyèṉè tômbare pa mèyoṉo y’awongyô ṉwè, e ga logô ndogôgô.

¹⁰ Konde vèṉo mi jônguṉ’ômbya w’aṉaga mbè w’Anyambyè? Ge mi buta gô tondy’aṉaga? Arwe mi pe tondy’aṉaga, gavo my’arange nyôngô yi Krist.

¹¹ Mi myeza ṉwè, awarera, inè, Ntyangô Mbya y’agambiṉô myè yi zele v’ôma;

¹² konde mi pa bonga yô ge nènjô yô n’ôma, ndô v’itum̃inya si Yesu‐Krist.

¹³ Konde aṉw’are jogo pa g’ômwanja wi ndwaṉi yam̃ egômb’elônga gw’isaviṉa s’Iju, nt’agombizagi myè mandô y’Anyambyè pôlô vyagaṉô, ayiliza yô,

¹⁴ ni nt’avyagaṉi myè awenge w’avegagi na myè nkôna mô na w’iṉongo nyam̃, avyagaṉa waô gw’isaviṉa s’ireri sam̃.

¹⁵ Ndô gw’arondi Anyambyè, y’avinji myè avila gw’iwum̃u nyi ngi yam̃, aweya myè n’imèpiṉô sè gô tum̃iny’ômwaṉi wè gôre myè,

¹⁶ ko mi kambiṉè gôr’aṉongo, pelè, mi pa kenj’erungu n’ôzôṉe ge ni ntyiṉa,

¹⁷ ge mi panda gô Yerusalèm gôre waô w’alônge dwaṉi rôm̃i, ndô my’agèndi gô ntye y’Arabe. Avila vovo, arô fwinyi myè gô Damas.

¹⁸ Impum̃’irarô vyagaṉô, avandi myè gô Yerusalèm gô jeṉe Kefas, n’alwaṉi myè gôre yè igôm̃i ny’intyugu ni ntyugu ôtaṉè.

¹⁹ Ndô mi pa jeṉ’erôm̃i ezèṉè kaô Yakobu, ya mwô’ngwè wa Rerè.

²⁰ Gw’isam̃u yi tèndiṉa myè ṉwè, vônaṉi, g’ôzô w’Anyambyè, mi pa nôka du.

²¹ Avila vovo, agèndi myè gw’intye si Sirya ni Kilikya.

²² Ndô mi pa myô gw’azô m’imandô si Yuda si re gôre Krist;

²³ kaô dadyè s’ayogyô inè: Ayè y’alônge kombizagi zwè, vèṉo e kambiṉ’ibekelya mè s’alônge jilizô yè.

²⁴ N’azum̃inyi sô Anyambyè g’ômwanji wam̃.