Filemône 1 - Bibili 1927 (Omyene)

¹ Pol, ôkôte wi Yesu‐Krist, namwarerè Timôte, gôre Filemône, ôma wi tondô, n’ômbilô na zwè,

² na gôr’ezombi zazô Apya, na gôr’Arkipus, ôṉunguṉi wazô gw’igoṽi, na gô mandô yi re gô nagô yo:

³ Imèpiṉô n’am̃ènjè mi ga vô wè avila gôr’Anyambyè ya Reri yazô, n’avila gôr’Ôvangiṉi Yesu‐Krist!

⁴ Mi p’Anyambyè yam̃ akeṽa egômbe zôdu, ntentôgo gw’ikambiṉi sam̃,

⁵ konde my’are myezô pa g’ômwanja w’ibekelya si re na wè gôr’Ôvangiṉi Yesu, na w’itondi so gôr’iyombwi yôdu.

⁶ Mi bambyè nè, idiṽi so gw’ibekelya si ga yanje gô pange myô ezom̃’edu eṽya zi re gôre zwè, gw’ipendya si Krist.

⁷ Konde my’ayeṉ’igev’ivôlô n’ôzindyô g’ômwanja w’itondi so; konde vo wè, ’mwarera, irèm̃a y’iyombwi yi re jowizô pa.

⁸ Yeṉo, vanga my’adwaṉa n’ôyangayanga wôdu gôre Krist gô sômbyo ôsam̃u wi re kwèkwè,

⁹ mi tonda vyagaṉô, ga nt’are myè Pol, mbôlô, na vèṉo ôkôte wi Yesu‐Krist, gô kweno inkolo, ntentag’igamba ny’itonda.

¹⁰ Mi kweno inkolo g’ômwanja w’ômwaṉi wam̃ Ônèsime, y’ayanyô myè gô ntyôgô,

¹¹ y’avegagi gw’alônga ôma w’isolo fo gôre wè, ndô vèṉo atweṉi n’isolo gôre wè na gôre myè.

¹² Mi tôm̃è gôre wè, ayè are ga ôrèm̃i wam̃.

¹³ My’atô simbyè guṉu inè, gôre yè gô janjiṉo e ga yanjiṉe myè, gô p’are myè gô ntyôgô g’ômwanja wi Ntyangô Mbya.

¹⁴ Ndô mi pa bele dend’ezom̃a, kaô my’adônge my’ipikilyi so, ko nkèngo yo y’alwaṉe mpaṉi ga mbangatyaga, ndô yi ga lwaṉe ijivira s’ôrèm̃i wo.

¹⁵ Vendetwa aṽangwaṉi na wè v’egômbe, ko wè tô dèngè gô dwaṉa na wè pèkèpèkè,

¹⁶ aranga nyèṉè g’ôsaka, ndô vyagaṉô n’ôsaka, ga ômwarerè wi tondô, pôsô gôre myè, ko pôrô gôre wè, g’ôzôṉe na gôre Rerè.

¹⁷ Sambô j’aw’ajeṉa myè ga ndeg’wo, wongè ga myèmè.

¹⁸ Na j’alendiṉi wè ôsam̃u ômbe, ge nwano p’ezom̃’edu, wela zô gô ntangô yam̃.

¹⁹ Myè Pol, — mi tèndiṉo n’ôgo wam̃imè, — inè, mi be po zô, mi pa bulya nte nwano myè ôkuṽi womè.

²⁰ ’Mwarera, mi ga yeṉe mbya gôre Rerè g’ômwanji wo; zindy’ôrèm̃i wam̃ gôre Krist.

²¹ Mi tèndiṉo gôre myè n’abeko gw’ijogiṉô so, myagaga nè, ô be denda vangaṉe vyagaṉô ni nte tènda myè.

²² Egômbe mèmô, gekiza myè elumba, konde mi deṽiṉa gô tô fwiṉizô gôre ṉwè, v’inkolo saṉi.

²³ Epafras, ôkôte na myè gôre Yesu‐Krist, e sanguṉo;

²⁴ yeṉo e denda kè Mark, n’Aristarkos, ni Demas, ni Luk, irangaṉô yam̃ gw’eṽilô.

²⁵ Imèpiṉô sa Reri yazô Yesu‐Krist, si ga lwaṉe n’iṉiṉi nyaṉi!