Estèr 6 - Bibili 1927 (Omyene)

¹ Ôgwèra mèwoṉo ôga e pa jolye dèwa, n’azômbyi yè inè, ezangô z’ijônginya s’agmba mi ntyugw’edu zi ga ṽagô. N’aranguṉô mô g’ôzô w’ôga,

² n’alèngyô tèndô pa agamba m’arakilyô ne Mardôke g’ômwanja wi Bigtan na g’ômwanja wi Terès, ivanguṉe mbaṉi y’ôga, ivenjavenji y’ômpômbala, w’aṽeli gô taly’ôga Asuerus.

³ N’awuly’ôga inè: Ôlubô nde n’inyanga nde nyi re pô pa gôre Mardôke g’ômwanja w’ôsam̃u wiṉo? Awiṉizi mongi w’ayanjag’ôga inè, e zele dendô p’ezom̃a.

⁴ N’awuly’ôga inè: Mande are gw’evungu? Ndô Aman aliwô byeṉi gw’evungu z’igala zi nagô y’ôga gô bamby’ôga gô banye Mardôke gw’erere z’avangyô yè gôre yè, na

⁵ N’awiṉizô yè n’inyôngô s’ôga inè: Aman ayè kum̃aṉa gw’evyngu. N’awuly’ôga inè: E ga yingiṉe.

⁶ N’ayingiṉ’Aman, n’awulinyô yè n’ôga inè: Ga lendô sè gôr’ôma wi bel’ôga go duba? N’awuly’Aman g’ôrèm̃i wè inè: Mande ôm̃ori e bel’ôga gô duba vyagaṉô na myè?

⁷ N’awiṉiz’Aman ôga inè: G’ômwanja w’ôma wi bel’ôga gô duba,

⁸ ngoy y’ivenda yi borô n’ôga yi ga wongô ni kavala yi pandô n’ôga, ni kôrôṽa y’ivenda yi borô yè gw’ewônjô,

⁹ ko ngoy ni kavala pô gôr’ôm̃ori w’ivangiṉ’impôlô y’ôga, ko waô bory’ôṉôm̃e wi bel’ôga gô duba, arèkizè ni kavala gw’igala nyi nkala, arônga gô bôsô yè inè: Yeṉo be dendô gôr’ôṉôm̃e wi bel’ôga gô duba!

¹⁰ N’awuliny’ôga Aman inè: Zunge bonge ngoy ni kavala, ga nt’abulyo, ko denda yeṉo gôre Mardôke, ya mw’Iju, are dwaṉa pa baru g’ômpômbala w’ôga, arigaṉ’igamba avila gw’isam̃u yôdu yi re wè bulya pa.

¹¹ N’awong’Aman ngoy ni kavala, aworize Mardôke, arèkizè yè ni kavala gw’igla nyi nkala, arônga gô bôsô yè inè: Yeṉo be dendô gôr’ôma wi bel’ôga gô duba!

¹² N’awinyi Mardôke g’ômpômbala w’ôga, n’aṽeṉ’Aman n’ôrara gô nagô yè, ndeṉaga n’ewônjô zè diṽiṉa pa.

¹³ N’arakily’Aman Zerès, y’ômwantô wè, n’indegô sè sôdu, isam̃u yôdu y’arweṉi gôre yè. N’awulinyô yè n’aṉagi wè w’imya, ni Zerès, y’ômwantô wè inè: Ja Mardôke, e pakilyô wè gô pôswa g’ôzô wè, are gô mbuṽe y’Iju, gambèṉè w’ayolye dend’ezom̃a gôre yè, ndô ô be pôswa g’ôzô wè.

¹⁴ Na gw’agambagi waô na yè, ivanguṉe y’ôga y’aṽyeṉi, azunge bag’Aman g’ôgeṽe w’aṉambyô ne Estèr.