Estèr 5 - Bibili 1927 (Omyene)

¹ Gô ntyugu yi ntyarô, awori Estèr nkèmbo yè y’ôga awôm̃unyi yè gw’evungu za gare yi nagô y’ôga, swaswo ni nagô y’ôga. Ôg’avegagi dwaṉa pa baru gw’eki zè z’ôga, swaswo n’ômpômbala wi nagô.

² Gw’ayeṉ’ôga Estèr y’ôg’ômwantô kum̃aṉa pa gw’evungu, alèng’im̃èpiṉô gw’antyo mè, n’anyonyuṉ’ôga nkogu yi sika ya teṉateṉa y’avegagi g’ôgo wè gôr’Estèr. N’azusi Estèr pyèrè awate ntyay yi nkogu.

³ N’awulinyô yè n’ôga inè: Ezande zi belô wè Estèr y’ôg’omwantô, ô bamby’ande? Vangaṉe z’adwaṉe mbèy y’iṉongo, zi be pô wè.

⁴ N’awiṉiz’Estèr inè: J’ôg’ajeṉa kwèkwè, ôga n’Aman wi ga ṽye ṉèṉo wiṉo g’ôgeṽe wi re myè kekiza pa gôre yè.

⁵ N’awuly’ôga inè: Zunge kèndeṉi gô kôve Aman, ga nte bel’Estèr. N’aṽyeṉ’ôga n’Aman g’ôgeṽe w’agekizyô ne Estèr.

⁶ Na gw’ayongagi waô ivè, ôga awulinyi Estèr inè: Ezande zi bambyô wè, zi be pô wè? Ô bel’ande? Vangaṉe y’adwaṉe mbèy y’iṉongo, ô be bonga yô.

⁷ N’awiṉiz’Estèr inè: Siṉo ne ibambyi sam̃ n’ibeli sam̃.

⁸ Ja my’adèng’imèpiṉô gw’antyo m’ôga, na j’ôg’atonda gô p’ibambyi sam̃ na gô dende mbeliṉi yam̃, ôga n’Aman wi ga ṽye g’ôgeṽe wi be kekizô myè gôre waô, gambèṉè mèṉè my’afwiṉiza gôr’ôga ga nt’abulye.

⁹ N’agogw’Aman ôwenja mèwoṉo, n’igeṽa n’ôrèm̃’ômbya. Ndô gw’ayeṉ’Aman Mardôke g’ômpômbala w’ôga, inè e pa kum̃aṉa ge sèvya gôre yè, ayônyi yè n’eguṉu gôre Mardôke.

¹⁰ Ndô Aman azimby’ôkuṽi wè, n’aṽyeṉi yè gô nagô yè. N’arôm̃i yè gô kôv’indegô sè ni Zerès, y’ômwantô wè.

¹¹ N’agambi Aman na waô g’ômwanja w’ibuṉa s’igumbi nyè, na w’ibuṉa s’awaṉi wè, na wi yom̃a yôdu y’avendyô yè ne ôga, n’inyanga ny’avenyô yè vyagaṉô n’ivangiṉi n’inyôngô s’ôga.

¹² N’awuly’Aman inè: Myè dadyè ajivirô ne Estèr y’ôg’ômwantô gô bya n’ôga g’ôgeṽe w’apangô yè, my’atô fweyô kè n’ôga mèṉè gôre yè.

¹³ Ndô isam̃u yiṉo yôdu yi pa panga myè mpongo, ôlingô wi jeṉa myè Mardôke, ya mw’Iju, baru g’ômpômbala w’ôga.

¹⁴ N’awulinyô yè ne Zerès, y’ômwantô wè, n’indegô sè sôdu inè: Ga vangô erere z’agôm̃i m’ikude ataṉè gw’idôndwa, gambèṉè mèṉ’ibanga ko bamby’ôga inè, Mardôke e ga ṽanyô gô zô, avila vovo awè tô kènda n’ôga n’igeṽa g’ôgeṽe. Igamba nyiṉo ny’arondy’Aman, n’azômbyi yè erere gô pangô.