Estèr 1 - Bibili 1927 (Omyene)

¹ N’arweṉi gw’egômbe z’Asuerus, (Asuerus yiṉo ne yè y’avangiṉag’avila gw’Indya kwanga gw’Etyôp, gô nkam̃a y’aṉongo n’agôm̃i m’aṉongw’ambaṉi n’aṉong’ôrwageṉô),

² n’ôga Asuerus avegag’egômbe mè dwaṉa pa baru gw’eki zè z’ivenda gô Suse, gô nkala y’ôga.

³ G’ômpum̃a wi rarô w’ipangiṉi sè, avang’ôgeṽe gôr’ivangiṉi yè yôdu, na gôr’inyôngô sè sôdu, gogi yi mbèli yi Paras na yi Maday, ayôgô n’ivangiṉi yi lele w’alataṉi g’ôzô wè.

⁴ N’arum̃inyi yè mèpiṉi y’igumba ny’ivendi nyè n’ônjèlènjèlè w’ipendi sè intyugu sinyenge, nkam̃a y’intyugu n’agôm̃i m’intyugu eṉanay.

⁵ Na gw’agek’intyugu mèsoṉo, ôga avang’ôgeṽe gôr’aṉaga waôdu w’alèngyô gô Suse, nkala y’ôga, avila gôr’aṉèro kwanga gôr’awangô, ôgeṽe w’alwaṉi ntyugu ôrwageṉô, gw’evungu zi ntyaga yi nagô y’ôga.

⁶ Iṉamba ya pupu, y’ôsolomèngèlè na ya zawa, y’avegagi diryô pa n’igoli yi bisusi na ya gelô gw’ilônga yi sika ya pupu na gw’am̃èngo m’adô mi mbèṽè. Idô yi sika ya teṉateṉa na yi sika ya pupu y’avegagi dôṽyô pa gô ndèkè yi porifiri, na y’adô m’imbèṽè, na yi nakri na y’adô ma vyovyo.

⁷ W’ayonji waô gô vagô yi sika ya teṉateṉa, vagô y’aṽangwaṉi aṉongo, n’ivè ny’ôga ny’avegag’inyenge, ga nt’ar’ôyôgô w’ôga.

⁸ Ndô wi pa bangaty’ôma gô jonga, konde ôga aliwô azômby’aṉaga waôdu wi nagô yè gô dendiṉ’ôm’edu ga nt’are ntondiṉi yè.

⁹ N’ôg’ômwantô Vasti avangi kè ôgeṽe gôr’antô gô nagô y’ôga Asuerus.

¹⁰ Gô ntyugu y’ôrwageṉô, gw’ayeṉag’ôrèm̃a w’ôga mbya n’ivè, azômbyi yè Meuman, Bizta, Arbôna, Bigta, Abagta, Zetar ni Karkas, n’ivanguṉe ôrwageṉô y’ayanjagi g’ôzô w’Asuerus y’ôga,

¹¹ gô bage Vasti, y’ôg’ômwantô, g’ôzô wè, ni kôrôṽa y’ôga, gô tev’erangi zè gôr’aṉaga na gôr’ayôgô, konde avegagi mèpe jeṉô.

¹² Ndô ôg’ômwantô Vasti aṽiki gô bya, gw’alèngi yè igamba ny’ôga ny’aṽyeṉi n’ivanguṉe. N’aṽend’ôga pôlô, eguṉu zè z’aṽam̃iṉi gô gare yè.

¹³ Vovo ôga awuliny’aṉaga w’imya w’amyeṉi gômbe. Konde yeṉô avegagi ntyale y’ôga, gw’azô m’aṉaga waôdu w’amyeṉ’ampanga n’ijèkèlya.

¹⁴ Ni Karsena, ni Setar, n’Admata, ni Tarsis, ni Merès, ni Marsena, ni Memukan, ivangiṉi ôrwageṉô yi Paras na yi Maday, mongi siṉo w’avegagi pyèrè na yè, w’ayeṉag’ôzô w’ôga alwaṉa gw’ewônjô z’iṉongo.

¹⁵ Awulyi yè inè: Ivanga nde nyi be dendô gôre Vasti, y’ôg’ômwantô, konde e pe denda ga nt’azômbyô yè ne ôga Asuerus gôr’ivanguṉe?

¹⁶ N’awiṉizi Memukan g’ôzô w’ôga n’ivangiṉi inè: Vasti y’ôg’ômwantô e pa dende mbe kaô dadyè gôr’ôga, ndô kè gôr’ivangiṉi yôdu n’aṉaga waôdu wi re gô lele yôdu y’ôga.

¹⁷ Konde ndaga y’ôg’ômwantô yi be jagayaga gôr’antô waôdu, ko waô pèdy’aṉôm̃e saô, awulya inè: Ôga Asuerus azômbyi nè, Vasti, y’ôg’ômwantô, e ga vagô g’ôzô wè, ndô e pa kènda.

¹⁸ N’avila gô ntyugu mè, awaṉ’antô w’aga wi Paras na wi Maday w’ayogyô ndaga y’ôg’ômwantô wi be takilya yô gôr’ivangiṉi yôdu y’ôga; gambèṉè vovo be dwaṉ’ipèdya sipôlô n’eguṉu.

¹⁹ J’ôg’ajeṉa kwèkwè, igambi nyè nyi ga rakilyô ko nyô tèndô gw’ampanga mi Paras na mi Maday, na gô deg’ipava; ôzômbyô w’ôga wô ga lwaṉ’inè, Vasti arô bya nyèṉè g’ôzô w’Asuerus y’ôga, n’ôga e ga ve inyanga ny’ôg’ômwantô gôr’ômwant’ômwèṉè wi re ni ndwaṉi mbya vyagaṉô na yè.

²⁰ N’ôzômbyô w’ôga wi be myô gw’ipangiṉi sè sôdu, ntôry’edu yi be dwaṉa wô, gambèṉè antô waôdu wi be dub’aṉôm̃e saô, avila gôr’aṉèro kwanga gôr’awangô.

²¹ N’igamba nyiṉo ny’arondy’ôga n’ivangiṉi, n’alend’ôga ga nt’avegag’igamba nyi Memukan.

²² N’arôm̃i yè yangô gô lele y’ipangiṉi sè sôdu, elely’edu ga nt’are ntèndiṉi ya yô, na gw’iṉongw’edu ga nt’are nèm̃è ya nyô, k’ôṉôm̃y’edu pangiṉa gô nagô yèmè, ko yè takilya nyô, agamba nyô gô nèm̃è y’aṉagi wè.