Efèsi 1 - Bibili 1927 (Omyene)

¹ Pol, erôm̃i zi Yesu‐Krist vo ntondiṉi y’Anyambyè, gôr’iyombwi yi re g’Efèsi, na gôre waô wi bekelye Yesu‐Krist:

² imèpiṉô n’am̃ènjè mi ga vô ṉwè avila gôr’Anyambyè ya Reri yazô n’avila gôr’Ôvangiṉi Yesu‐Krist!

³ Ôzaviṉô gôr’Anyambyè, ya Rerè y’Ôvangiṉi wazô Yesu‐Krist, are zwè saviṉa pa n’izaviṉô yôdu y’Iṉiṉa gw’imbôra s’ôrôṽa gôre Krist!

⁴ Vo yè Anyambyè alôṽyi zwè, ntye yiṉo lôṽyôgô ro, inè, azwè ga lwaṉ’iyombwi ni ntyèmbo fo g’ôzô wè,

⁵ alôṽya zwè n’itondi sè gô dwaṉa gôre yè n’inyanga ny’awaṉa vo Yesu‐Krist, ga nt’avegagi ntondiṉi y’ôrèm̃i wè,

⁶ gw’isum̃inya s’ivenda ny’imèpiṉô sè s’aveṉi yè zwè vo yè yi tondô yè.

⁷ Gôre yè azw’are n’ôlanduṉô vo ntyiṉi yè, n’inyezô s’ibe, ga nt’ar’ibuṉa s’imèpiṉô sè,

⁸ si r’Anyambyè buṉiza pa gôre zwè gw’imya sôdu n’ikôtiza,

⁹ are myeza pa zwè kè isam̃u y’iyumbuṉô yi ntondiṉi yè, ga nt’are nkenjiṉi yè y’agenjyô yè gôr’ayèmè,

¹⁰ nkenjiṉi mè yi be twa gô be siṽe gômbe, inè, gô datiz’isamu yôdu gôre Krist, isam̃u yi re g’ôrôṽa, n’isam̃u yi re gô ntye yiṉo.

¹¹ Gôre yè kè azw’atweṉ’iṉivisi, konde azw’alôṽyô ga nt’are nkenjiṉi yè yi janj’isam̃u yôdu ga nt’are ntondiṉi y’ôrèm̃i wè,

¹² ko zwè sum̃iny’ivendi nyè azwè y’alônge deviṉi Krist igum̃u.

¹³ Gôre yè aṉwè kè, aṉwè jogo p’igamba ny’ôrèti, Ntyangô Mbya y’isungiṉô saṉi, aṉw’are yè bekelya pa ko ṉwè dingilyô n’Iṉiṉ’Iṽya ny’avanganyô,

¹⁴ nyi re gôre zwè puṉu y’iṉivi sazô kwanga gw’egômbe zi be danduṉô mongi Anyambyè, gw’isum̃inya s’ivendi nyè.

¹⁵ Gô ntiṉa yiṉo kè gw’ayogyô myè g’ômwanja w’ibekely isaṉi gôre Rerè Yesu, na g’ômwanja w’itondi saṉi gôr’iyombwi yôdu,

¹⁶ mi pa tiga gô p’akeṽa g’ômwanji waṉi, ntentaga ṉwè gw’ikambiṉi sam̃,

¹⁷ inè, Anyambyè y’Ôvangiṉi wazô Yesu‐Krist, ni Rerè y’ivenda, e ga ve ṉwè iṉiṉa ny’imya na ny’itum̃inya gô mya g’ômwanji wè,

¹⁸ ko yè nunguṉ’antyo m’irèm̃i yaṉi, ko ṉwè mya nt’ar’igum̃u nyi mbeli yè, ni nt’ar’ibuṉa s’ivenda ny’iṉivi sè si pigô yè gôr’iyombwi,

¹⁹ ni nt’are mpendiṉi mpôlô yi ngulu yè gôre zwè yi bekelya, ga nt’ar’ijanja si njoliṉi yi ngulu yè.

²⁰ Arum̃inyi yô gôre Krist gw’arôngunyè yè avila gw’ijuwa, ko yè dwaṉizè baru g’ôgo wè ôṉôm̃yè gw’imbôra s’ôrôṽa,

²¹ bô gw’igôṉô vyagaṉô n’ipangiṉa sôdu, n’anyanga môdu, n’ivenda nyôdu, n’iny’edu nyi re ko tetô, aranga dadyè gô ntye yiṉo, ndô gô ntye yi bya kè.

²² N’aweli yè yom̃a yôdu g’ôdôlôngô w’intyôzô sè, alôṽyè ewônjô z’isam̃u yôdu gô mandô,

²³ yô n’ôkuṽi wè, ni jônyô pa ne yè yi jônye yom̃a yôdu gô mbôry’edu.