Ebèr 1 - Bibili 1927 (Omyene)

¹ Anyambyè, y’agambagi n’irerè egômb’elônga, inyongo sinyenge n’impoṉo sinyenge, vo ivogisi, are kamba pa na zwè gô gômbe num̃uṉa yiṉo vo Ômwaṉa,

² wi re yè dôṽya p’ôṉivisi wi yom̃a yôdu, avangi ntye kè vo yè,

³ n’ayè yi r’ônjèlènjèlè w’ivendi nyè n’ebagaṉô z’ôkuṽi wè, nsimbyaga yom̃a yôdu n’igamba nyi ngulu yè, ayè panga p’ôyombunyô w’ibe, alwaṉi baru g’ôg’ôṉôm̃yè w’ivenda ny’Anyambyè gw’igôṉô;

⁴ are twa pa kè n’inyanga vyagaṉô n’iyenjèl inè, are pô p’in’iṽya vyagaṉô na waô.

⁵ Konde are bulinya pa yeṉi gôr’iyenjèl inè: Awè Ômwaṉi wam̃ ôṉôm̃e, ṉèṉo wiṉo ajaṉa myè wè? na inè: Mi be dwaṉa rerè gôre yè, n’ayè e be dwaṉ’ômwaṉa gôre myè?

⁶ Na gw’arô jinginyi yè njalyè ṉôm̃e gô ntye yiṉo, e bulya nè: Iyenjèl s’Anyambyè sôdu si ga zaviṉe yè!

⁷ Na g’ômwanja w’iyenjèl e bulya nè: Ayè e pang’iyenjèl sè impunga, n’inyôngô sè ibam̃iṉa s’ôgôṉi.

⁸ Ndô g’ômwanja w’Ômwaṉa e bulya nè: Eki zo, Anyambyè, zi re gô koṉako, nkogu y’ipangiṉi so yô ne nkogu y’ôgôre;

⁹ ô re tonda p’ôgôre, ko wè bik’ibe; yeṉo, Anyambyè, Anyambyè yo are wè sagya p’agali m’igeṽa, n’inyanga gôr’aṉagi wo.

¹⁰ E tô bulya kè inè: Awè, Ôvangiṉi, gw’ipakilya w’alôṽi ntye, n’ôrôṽa ne ijanja s’ago mo;

¹¹ yom̃a yiṉo yi be jila, ndô ô be kongwa; yôdu kè yi be twe lungu ga ngoy,

¹² ô be pura yô rwè ga ngoy, ko yô kaluṉô; ndô awè, ô dwaṉ’egolaṉi em̃ô, n’impum̃i yo y’azuke du.

¹³ Ndô yeṉi gôr’iyenjèl yi re yè bulinya pa ni mori nè: Lwaṉa baru g’ôgo wam̃ ôṉôm̃yè, kaô my’apang’ilôvalôvi yo iyariṉô ny’agôlô mo?

¹⁴ Iyenjèl sôdu arang’aṉiṉa mi janj’eṽilô z’Anyambyè, ntôm̃ôgô gô janja g’ômwanja wa mongi wi be niv’isungiṉô?