Rut 1 - BUKO SIPUNENAN

Pujaujagat Elimelekh samba sangalalepda ka Laggai Moab

¹ Kateteret puparentaatda sipasiukum bara pulajeat ka laggai Israel. Iageti tuitui sara sirimanua sibara ka Betlehem-Jehuda pasamba sinanalepnia samba karua togania simanteu ka laggai Moab bule rapukuddu sedda sibailiu siooiake.

² Onin sirimanua nenda iate Elimelekh, onin sikalalepnia Naomi samba oninda tatogania Mahlon samba Kilyon, sangamberitda tai Efrata sibara ka Betlehem-Jehuda; samba kele arasege ka laggai Moab, pukuddurangan sedda.

³ Tata si Elimelekh legeina le si Naomi samba rua tatogania.

⁴ Iageti putalimourangan tatogania nenda ka taiokkora tai Moab, sipuoni si Orpa samba si Rut. Pasat pulungarura,

⁵ tata leu et tatogania si Naomi. Bailiu si Naomi tata simanteunia samba rua tatogania.

Si Naomi samba si Rut toili minca ka Betlehem

⁶ Pasat nenda arepnangan si Naomi, aisukatnakean si Tuhan tai Israel samba kauanangan leu et buat siuremanda simaeru. Lepa patereknangan tubunia si Naomi samba tatalikunia bule rakaddiuake laggai Moab.

⁷ Toili sia simakere ka Jehuda. Katalagat puenungda,

⁸ Kuanangan si Naomi katubuda tatalikunia, “toiliakean kam ka lalepda sainamui, bule si Tuhan masipununtuki kam baga, kele nuntut bagamui katubukku samba katubuda sia sitatata,

⁹ bule si Tuhan leu et masiropake ibara minca si manteumui bule ibara sipasikeli kam.” Lepa aikua kuanennia ka matada sigguknangan sia addeat ituitui. Tapoi si Orpa samba si Rut amusou le sia simakope.

¹⁰ Samba kuarangan katubut Naomi: “Ta Ina! Kutut le kai ekeu tatoili ka bangsam.”

¹¹ Aleginangan nia si Naomi, “Toili ake kam, Taanai lulunia nutut kam aku? Tat momoi kututuake tatoga minca addeat ibailiu simanteumui?

¹² Toiliakean kam, taan mateu kuputalimou minca amabajaan aku. Kenanen bai mateu peile kuputalimou soibo nene, bara tatogaku simanteu,

¹³ maom leu bagamui nungena kam sia teret ramabeu? Taan pa mutalimou kam kasirimanua sabagei? Takasedda kam tatogakku, bulat mareureu bagakku masiitco sipuaaili katubumui, kalulut ukuman Tuhan katubukku.”

¹⁴ Si Rut samba si Orpa pusourangan minca simakope. Iageti aisisigguk talikunia si Orpa tiddounangan toili, lepa tuitui nia. Tapoi si Rut geti taioba ikaddiu ake talikunia.

¹⁵ Kuanangan si Naomi, “Rut, itcopei! Saulum kasia atoilingan nia ka bangsania samba ka taikamanuania. Kenannan leu kekeu, nututnia nutoili!”

¹⁶ Aleginangan si Rut, “Ina, buian nukoiniake aku toili samba masikaddiu ake ekeu, kutut le ekeu. Kaipa nuei sedda leu kuei. Kaipa nukuddu sedda leu kukuddu. Bangsam, nenda bangsaku, Taikamanua panindogietnu, kupanindogi leu et.

¹⁷ Kenanen kaipa numatei, sedda le et kuoba kumatei samba turateiake. Eddangan nia iake si Tuhan ukum simasane katubukku, ke kukaddiuake ekeu, ketak kamateiat masipasara ake sita.”

¹⁸ Itconangan nia si Naomi, ron patuatnia si Rut itutnia, bailiu taan anai aikua bagei.

¹⁹ Iageti riuriu akerangan pusilaiatda pat sege sia ka Betlehem. Kele arasege sedda, tugegerangan leu sangalio pulaggajat nenda. Pasambadda tainanalep sedda masikua bulat nia leu nenda si Naomi?

²⁰ Kuanangan si Naomi, “Buian nusogai kam aku si Naomi, soigai le kam aku Mara, kalulut Taikamanua sipulubeunan, aiobaakean kupurimanua kabagat besit purimanuaijat.

²¹ Kalulut aku tuitui ka laggai sene ta anai simagulai kaku, kineneiget aitoiliakean aku si Tuhan sita anai sibabara. Lulut nene buian nukua kam aku si Naomi, kalulut aiukuman le aku Taikamanua Sipulubeunan samba maigingan poi pangoringan aku silo.”

²² Kise te katupoilianan pagalaiat katoiliat Naomi barania ka Moab pasamba talikunia si Rut tai Moab. Sege sia ka Betlehem, panandat pasimoneian gandum.