Neh. 1 - BUKO SIPUNENAN

Panindougat Nehemia ka tai Israel

¹ Nene te sisegeakenen Nehemia togat Hakhalya pagalaiat pugagalainia. Ka laggo Kislew rura sikarua pulu puparentaat Artahsasta rimata ka Persia. Aku, si Nehemia, ai aku ka Susan inan laggai purimataat.

Sou bagat Nehemia masipaatu Jerusalem

² Ka teteret nenda, sarainangku si Hanani, amoi barania ka Jehuda pasamba piga pa' sirimanua sabagei. Lepa nounoukungan sia pagalaiat sibabara ka Jerusalem samba tai Jehudi sitotoili sibara ka kudduat katuribbaiatda ka Bebilonia.

³ Pungunguannakerangan sia sibebela ratoili baradda ka kudduat katuribbaiat raei ka laggai pututukat matadda. Kineneiget murimanua mangorik samba rapaloloi sia bangsa-bangsa siooi sibabara ka bebe'ra. Sarapei irip laggai Jerusalem makatai peile samba sangamberi gugurukatnia ta' pei atupaeru ka teteret aitulabo siburu pei le.

⁴ Masiarep katuareman nenda, kuddu aku musou. Sipugogogoi le burunia kupureureu baga. Riuriu le kupupuaso sialei manindou ka tubut Taikamanua,

⁵ “Oi Tuhan Taikamanua sibakkat gege ka manua. Ekeu Taikamanua siabeu samba kuoi kai masialiake Ekeu ka bagat loto. Matopit le ekeu samba nuukkaake le palelenganNu ka tubut sirimanua sipununtuki Ekeu baga samba sireddet surukatNu.

⁶ Oi Tuhan mattai aku, samba arepmake panindogat sinegeakenenku ka tubum sinago samba sinoibo addeat paamian Israel, sapaguguletNu nenda. Bulat kuseseake, kai paamian Israel nene amajongan, aku samba taikebbukatku amajongan leu et.

⁷ Amupajoatnan kai ka tubum samba akupasabauan kai sangamberi parentam. Ta' an akureddet kai sangamberi surukatNu siakenu ka tubumai, siambit Mose paguguletNu nenda.

⁸ Oi Tuhan repdep tiboietNu sinegeakenen Mose pakoinienNu, ke' ta mauku kai paamian Israel ka tubum, pasabunungan kai ka talagat bangsa-bangsa bagei.

⁹ Tapoi ke' bai toili kai minca ka tubum samba amareddetnan kai ka surukatNu, Oto kai sipasabum nenda ruruakenungan te geti kai minca, kenanen ai kai ka tu'tut polak. Lepa toiliakenungan kai geti ka kudduat sipilim addeat kudduat parurukat ka tubum.

¹⁰ Tuhan kai nene sapaguguletNu, paamianNu siarauakenenNu pasamba gege samba puroronNu.

¹¹ Arepmake panindogatku samba panindogatdra sangamberi paguguletNu sabagei sioba masisuru ekeu. Panguruatnake le paromanNu ka gogoi nene bule sapaguguletNu rasilo pukatekat baga sibara ka Rimata.” Ka teteret nenda Aku iate sipasikeli lot Rimata.