Mat. 1 - BUKO SIPUNENAN

Paninikat Jesus Kristus

¹ Ia te nene surat paninikat Jesus Kristus, togat David, togat Abraham.

² Togat Abraham si Isak, togat Isak si Jakob, togat Jakob si Juda samba sasarainania.

³ Togat Juda si Peres samba si Serah ka sinanalepnia kai Tamar. Togat Peres si Hesron, togat Hesron si Ram,

⁴ togat Ram si Aminadab, togat Aminadab si Nahason, togat Nahason si Salmon,

⁵ togat Salmon si Boas ka sinanalepnia kai Rahab, togat Boas si Obed ka sinanalepnia kai Rut, togat Obed si Isai,

⁶ togat Isai ia te rimata David. Togat David si Salomo sibara ka sinanalep Uria,

⁷ togat Salomo si Rehabeam, togat Rehabeam si Abia, togat Abia si Asa,

⁸ togat Asa si Josapat, togat Josapat si Joram, togat Joram si Usia,

⁹ togat Usia si Jotam, togat Jotam si Ahas, togat Ahas si Hiskia,

¹⁰ togat Hiskia si Manasse, togat Manasse si Amon, togat Amon si Josia,

¹¹ togat Josia si Jekonia samba sasarainania ka teteret katuribbaiat ka Babel.

¹² Pasat katuribbaiat ka Babel bara togat Jekonia si Sealtiel, togat Sealtiel si Serubabel,

¹³ togat Serubabel si Abihud, togat Abihud si Eliakim, togat Eliakim si Asor,

¹⁴ togat Asor si Sadok, togat Sadok si Akim, togat Akim si Eliud,

¹⁵ togat Eliud si Eleasar, togat Eleasar si Mattan, togat Mattan si Jakob,

¹⁶ togat Jakob si Josep simanteu Maria situtuake matat Jesus sipuoni Kristus.

¹⁷ Oto sangamberi reddenan barania kai Abraham teret kai David, pulu epat ngareddenan, barania kai David teret katuribbaiat ka Babel pulu epat ngareddenan samba barania katuribbaiat ka Babel teret Kristus pulu epat ngareddenan.

Pututukat matat Jesus Kristus

¹⁸ Pututukat matat Jesus Kristus geti kise le: Ai pei le munonounoget si Maria inania kai Josep, enan tapei patatadde sia, amusuruketnan nia sibara ka Ketsat Sipunenan.

¹⁹ Si Josep geti simanteunia, maroipo poi paatuatnia samba ta ioba ipakaila si Maria, isiakenangan isaraake nia pinakele.

²⁰ Tapoi ai pei le ipaatu, oi malaikat Tuhan ka pangamutetnia sipasikukua, “Josep, togat David, ba masesedde masiala si Maria kalalemannu, aipoi suruketnia sibara ka Ketsat Sipunenan le.

²¹ Toga simanteu te tutuakenennia, kaunennu oninia Jesus, nia poi masiaarauake bangsania ka joda.”

²² Aibara sangamberinia nene, bule ipuaili siniboi Tuhan sinegeakenen nabinia sipasikukua,

²³ “Mususuruket te sara siokko, tutuakenangan toga simanteu, kaunangan oninia Immanuel,” tibonannia, “Ipaalei sita Taikamanua.”

²⁴ Kele aitusuru si Josep, galainangan siripot sikuat malaikat Tuhan ka matania; alanangan si Maria sinanalepnia.

²⁵ Tapoi tapei apaagai sia teret itutuake si Maria matat togania simanteu; ia geti kaunangan oninia Jesus.