Kol. 1 - BUKO SIPUNENAN

Salam

¹ Sibara kai Paulus, apostel Kristus Jesus, kalulut teu bagat Taikamanua samba Timoteus sarainanta,

² masiailiake sasaraina sipunenan samba simatonem baga ka bagat Kristus ka Kolose. Kiliu baga samba aban sibara ka Taikamanua Ukkuita, masipaalei kam.

Pusurakat samba panindogat

³ Sarat kukua kai sura ka Taikamanua, Ukkui Tuhanta Jesus Kristus, senen kutiddouake kai kam,

⁴ kalulut aarepmai pagalaiat tonem bagamui ka Kristus Jesus samba pagalaiat nuntut bagamui ka tubuda sipunenan,

⁵ kalulut masikaroni sinarekngakenen ka kam ka sorga. Pagalaiat nenda anuarepman kam panandaatnia ka bagat tiboiet pubulanan, ia te Katuareman Simaeru,

⁶ sisesege ka kam. Katuareman Simaeru nenda amubuangan samba amuurauan ka sangalio polak, kisedda leu ka kam ka teteret anuarep kam nia samba anuagai kam kiliu bagat Taikamanua sibulatnia.

⁷ Sangamberinia nene anugelaian kam kai Epapras, alei mugalai kilibet bagamai, pagugulet Kristus simatopit masipasikeli kam.

⁸ Nia leu amasinunuake ka matamai nuntut bagamui ka bagat Ketsat.

⁹ Kalulut nene barania ka teteret akuarep kai nia, ta anai ari kutiddouake kai kam. Kutiddou kai bule nusilo kam sikut paatuat samba puaagai simakolou sibara ka Ketsat nuagai kam obaket Tuhan sipulelelek,

¹⁰ imateu nupurimanua kam ka matania samba ioba bagania ka bagat sangamberinia samba mubua kam ka sangamberi galajet simaeru, samba muurau ka bagat puaagai pagalaiat Taikamanua,

¹¹ bailiu maronmuian simakope siripot gegenia simalatsat masibairat sangamberinia ka bagat om baga,

¹² samba masikua sura ka angkat baga ka Ukkui, sipateu kam masisilo rubeiat ikemenda sipunenan ka purimataat simapato.

¹³ Aibelaakean sita ka geget pugepgeman, aikauan sita ka bagat Purimataat Togania kilibet bagania;

¹⁴ ka tubunia atabakkatingan panebuiatta, ia te katuappekat jo.

Pubeunanan Kristus samba galajetnia

¹⁵ Kristus ia te tularat Taikamanua sitaimatotoila, sikebbukat ka sangamberi sibaraakenen.

¹⁶ Aipoi kalulut nia le aitubaraake sangamberinia ka sorga samba ka polak, simaiitco samba sitaimaiitco, uddenan purimataat ele purimataat, sipupaparenta ele sibara gege; sangamberinia nia le aibaraake nia samba sibakkatnia.

¹⁷ Nia le siboiki abara ka sangamberinia samba sangamberinia ai le ka tubunia.

¹⁸ Samba nia le utet tubu, ia te paamian. Nia le sikebbukat, sitususuru siboiki ka simamatei, bailiu nia le sipuuddutat ka sangamberi.

¹⁹ Taikamanua le poi aiteuake nia bule sangamberi sibabara ka tubut Taikamanua, sun le ikuddu ka tubut Togania,

²⁰ samba kalulut nia le aiabanake sangamberinia ka tubunia Taikamanua, sibabara ka polak ele sibabara ka sorga, lepa aibaraake paabanan kalulut logau siliktengan Kristus.

²¹ Kam leu simareunan ka Taikamanua siburu samba sipasisasaggangi nia ka paatuat, simatotoila ka galai tubumui sikatai,

²² kineneiget aiabanakean ka bagat tubut Kristus, kalulut kamateiatnia, masikau kam musipunenan, si ta loloiet samba si ta sele ka matania.

²³ Kau le numariuriu kam ka bagat tonem baga, nyung le ta ipaguguilak, samba ba oba kam turitsi ka pukakaronan siarepmui ka Katuareman Simaeru, sikakaraakenen ka sangamberi sipuririmanua ka tei polak, samba sibailiu aku nene, Paulus sipasikeli nia.

Oringen samba galajet Paulus ka bagat masipasikeli paamian

²⁴ Kineneiget maangka le bagaku ka bagat pangoringanku kalulut kam, samba masisutnake ka bagat akkulaku simagulai pei le ka pangoringan Kristus, punu tubunia, ia te paamian.

²⁵ Aibailiuan aku sipasikeli paamian siripot galajet sinegeakenen Taikamanua kaku masisutnake tiboietnia ka kam,

²⁶ ia te pakeleat situlilipput barania ka sialu, ka senen reddenan, tapoi kineneiget atupatoilaan ka sangamberi sipunenannia.

²⁷ Ioba Taikamanua ipaagai nia ka tubuda kipa kayo samba latsatnia pakeleat nene ka talagat bangsa bagei, ia te: Kristus aian ka talagamui, karoniet masisilo pulatsanan.

²⁸ Nia te kupaarep kai, ke kunganturu kai senen sirimanua samba kugelai kai senen sirimanua ka bagat sangamberi sikut paatuat, masipalulu senen sirimanua simasun eru ka bagat Kristus.

²⁹ Ia te kumomomoake tubuku samba kupauukeleake seget ron, siripot ron sibara ka Kristus sipugagalai simaron ka bagat tubuku.