Jol. 1 - BUKO SIPUNENAN

Ute'

¹ Nene te patonekat Tuhan katubut Joel, togat Petuel.

Reureu bagadra tai Israel kalulut siuremandra aikom Sit

² Arepake kam, ale sikebbukat laggai, lelekake kam, sangamberimui tai Jehuda. Ai leu kele nene sipuaili kateteremui, ele kateteredda taikebbukatmui?

³ Tiboi kam sipuaili nenda katubuddra tatogamui, bule sia leu masisegeake katubuddra tatogadra tiboiet nenda. Sapunuteteura leu bui tak raarep, samba sia leu masiriuriuake minca katubudra sapunuteteura.

⁴ Mungkuat sit sitaioi tuadde iginia, tuleu ka mone samba masikom buat siureman. Aponia silegeiakenen mungkuat nene, sappruakenangan leu et nia mungkuat bagei.

⁵ Ale kam siroro, suruake kam! Ale kam simaloket, pusou kam! Aipoi anggur sibau araoppungan kangungum.

⁶ Saladdut sit masipurut laggaita; maigi le sia samba tamomoi tuadde iginia, sotnia kele laurut siklat singa sinanalep.

⁷ Pakaitairangan loinat anggurta, samba loinat sileu, legeina le turonia. Pagutgutirangan leu et kulitnia, pat bulau ratnia.

⁸ Pusou kam, ale tai bangsa, kele tainanalep sipurereureu baga, isoibi kamateiat talikunia simanuntu bagania.

⁹ Gandum samba anggur asapprungan ka uman Tuhan. Iageti puleppeirangan goni tai imam, simabesi kabaga mupuukuket kai Tuhan.

¹⁰ Pamonemone amasaragaian, polak mululu baga bailiu sangamberi gandum makatai, magaraknangan leuet buat anggur, samba tulat zaitun sappru.

¹¹ Ale kam sipumomone, pusou kam! Ale kam sipumomone ka monen anggur, pusou kam, aipoi gandum, jelai samba moneiet amakataian.

¹² Paloinaloinat siureman ka mone ibailiu magarak le sangamberinia, loinat anggur, apel, sileu korma samba delima. Iageti sirimanua leuet taan maangka bagadra.

¹³ Ale kam tai imam sipuuku kudduat pasibuluat, pakei kam komak goni samba pusoumuian. Guruake kam ka uman Tuhan, bule nupusou kam kabagat sangasoibo, aipoi taanai panguruat anggur samba gandum ka Taikamanua.

¹⁴ Parentaake kam bangsam rapupuaso, paagaiake paailiat siberi kabaga! sogai saute samba sia tai sikebbukat laggai, samba sangamberi sikuddu ka Jehuda, bule raoi ka uman Taikamanua, mugerei masitiddou paroman katubuNia.

¹⁵ Gogoi kaoijanan Tuhan amalegrengan, gogoi kalotoakenen Teteret Sipulugege masibaraake katusaragaiat sirimanua.

¹⁶ Masubunangan komen kamatatta, ka uman Taikamanua, taan anai gerei sialei angkat baga.

¹⁷ Uremen matei ka polak simagarak, Taan anai gandum koiriakenen, iageti bulubbuk sita kabaga samba bailiu siragatat.

¹⁸ Tarimeu mureureu baga samba mubele baga, taan poi susu kudduat parou pukomannia. Mungkuat biribiri leu mangorik.

¹⁹ Kutiddou le paroman katubum, oi Tuhan, aipoi su'su kudduat parou amagarakngan, paloina-loina leu amagarakan samba matei, kelean le silabokat obengan.

²⁰ Kisedda leuet patarimeu-tarmeu mosoga katubum masitiddou paroman, kasia poi tamomoi rasegeake oggoura, kalulut sangamberi bagat oinan amagarakngan.