Jer. 11 - BUKO SIPUNENAN

Palelengan Taikamanua tupasabau

¹ Tiboiet Tuhan siooi katubut Jeremia, ngangania:

² “Arepake le' sangamberi ngangan nene samba segeake le' nenda ka Jahuda samba ka sipulalaggai ka Jerusalem!

³ Kua le' katubutda: Kasene le' ngangan Tuhan Taikamanuan Israel: Tutelei le' sirimanua sitaiarepi sangamberi tiboiet palelengan nene,

⁴ siparentaakenenKu taikebbukatmui kateteret Kuambit sia bela ka Misir, ka purusuat pasianaugat laba', pasamba masikua: Arepake le' ngangangKu samba galaiake le' sangamberi aponia siparentaakenenKu katubum, iageti bauliunangan kam paamianKu samba Aku ibailiu geti Taikamanuamui,

⁵ bailiu oinangan Kusunake suppa sipalelekKu ka taikebbukatmui addeat masikau ka sia polak simalilimai susu samba maninia, kele sipuaaili ka teteret nene. “Lepa alegikungannia: Amen, ale Tuhan!”

⁶ Kuanangan si Tuhan katubukku: “Sogaake le sangamberi nganga nene ka sangamberi laggai ka Jehuda, samba ka sangamberi enungan ka Jerusalem pasamba masikua: Arepake le' nganga palelengan nene samba galaiake le' nenda!

⁷ Aipoi bulat sibulatnia Kuparepdep le' taikebbukatmui kateteret Akupalulu sia bela ka laggai Misir; pat aili kateteret nene Kuparepdep le' sia simariuriu: Arepake le' ngangangKu!

⁸ Tapoi ta'raoba masiarepake ele masilelekake, tapoi senenda ratutake le' kelat paatuatda sikatai: iageti Akubaraakean katubutda sangamberi nganga palelengan nene, siparentaakenKu tuukkaake, tapoi ta'araukkaake.”

⁹ Kuanangan si Tuhan katubukku: Aian pukerekat baga sikatai ka talagatda tai Jehuda samba sipulaggai ka Jerusalem.

¹⁰ Abelean sia minca kapuseleat sigalaira taikebbukatda siboiki taaraarepi ngangangKu. Ratut le' taikamanua bagei samba manindou ka tubunia. Muntogat Israel samba muntogat Jehuda arapasabau palelenganKu siapraKu pasamba taikebbukatda.

¹¹ Kalulut nenda kasenen le ngangan Tuhan: Bulatnia te', Kubabaraake le' katubutda pugejaat baga sitaioi tuta'ta'ake, samba ke'bai mugerei sia katubukKu, ta' Kuaarepi geti sia.

¹² Samba kenenen bai sangamberi laggai Jehuda samba sipulalaggai ka Jerusalem musoga katubut taikamanua panindogiedra pasamba buluakenen sirarak, tapoi taikamanua nenda ta'moi geti iropake sia keteteret iorak sia pasisiboat nenda.

¹³ Aipoi kele iginia laggaimui, kise te' iginia taikamanuamui, ale Jehuda, samba kele iginia enungan ka Jerusalem kise te' iginia kudduat pasibuluat sirioakenenmui addeat masilabo buluakenen katubut Baal.

¹⁴ Tapoi Ekeu, bui nupanindou ka bangsa nene samba ba' sesegeake paroman samba panindougat ka sia, aipoi ta'Kuaarepi geti kateteret rapusoga katubukKu kalulut pugejaat bagatda.

¹⁵ Aponiangan le' pasikelat simakiliu bagaKu ka bagat umangKu, ta'pa aigalaiaken sangamberi pinaatu pagalaiat katai? Momoi leu pa' palelengan samba akkula sipunenan masipasabau pugejaat baga ka tubum, bailiu lepageti oinangan numaangaka baga?

¹⁶ Loina zaitun simalibbut, malaine tukinere, ai oniakean leu ekeu si Tuhan. Tapoi pasamba nau kapulalamau simakope Iobekake le' obengan ka buluknia, bailiu sangamberi rannia malabo le'.

¹⁷ Tuhan Sebaot, sigalai eku mutu'tu', aiteuakean pugejaat baga ka tubum kalulut pukakatai sigalai muntogat Israel samba muntogat Jehuda sibaraake besit paatuatKu pasamba masilabo buluakenen katubut Baal.”

Pukerekat baga masimateiake si Jeremia

¹⁸ Ipaagai le' si Tuhan pagalaiat nenda katubuku, iageti agaikuanannia; kateteret nenda Ekeu, Tuhan masipakoinong galai tubutda katubukku.

¹⁹ Tapoi siboiki aku kelean le' togat biribiri simaum tuambit bule ituja'ja, ta'kuagai, babaraakenenda pukekeret baga sikatai katubukku: “Konan le' ta'mateiakekam loina nene pasamba sangamberi buania! Konan le' tatata'akekamnia barania ka laggaira sipuririmanua, bailiu oninia ta'an rarerepdep minca sirimanua!”

²⁰ Tapoi, Tuhan sebaot, sipasiukum ka simaroipo, sipasisisibo paatuat sirimanua, eddangannia kuitco Nulumunake sia, aipoi katubuM le' kusegeake pakaro'ku.

²¹ Kalulut nenda kasene le' ngangan Tuhan pagalaiat tai Anatot sioba masimateiake aku pasamba masikua: “Ba' pasitutuptup ka onin Tuhan, bule bui numatei kalulut kabeimai!” –

²² Kalulut nenda, kasene le' nganang Tuhan sebaot: Bulatnia te', Kuukum le geti sia: sangamberi tailaingenda geti matei le' kalulut lanjau, tatogatda simateu samba simanalep sapru matei le' sia kalulut laje;

²³ ta'anai sipuririmanua katalagatda, kalulut Kubabaraake le' geti pugejaat baga ka tai Anatot ka rura, tuukum sia.”