Hag. 1 - BUKO SIPUNENAN

Parentat Tuhan bule tugalai minca Uman

¹ Ka rura sika rua pamarentaat rimata Darius ka Persia, ka gogoi siboiki laggo sika enem, panibonangan si Tuhan kai nabi Hagai, bule isisege'akenia kai Zerubabel togat Sealtiel, Gubernur Jehuda, samba ka tubut Josua, Imam Sabeu togat Jozadak.

² Kuanangan Tuhan Sipulugege ka tubut Hagai, “Bangsa nene masikua tapei aiaili teterenia tugalai minca umangKu.”

³ Iageti panibonangan si Tuhan kai nabi Hagai, bule isisegeakenia ka paamianNia,

⁴ “Ale sapaamianKu, aiailingan leu pa teterenia ka kam nupukuddu ka lalep simaron samba simaeru, beringan umangKu siragatat pei le”

⁵ Kau le', nulelekngake kam purimanuaiatmui!

⁶ Amaigingan anukarapmake kam karamen, tapoi goiso le numonei kam. Ka kam ai komen, tapoi tasesege ektekmui. Ka kam ai anggur, tapoi ta' isesegeake bagamui. Ka kam ai leppei, tapoi ta' momoi ioloiake' tubumui. Samba upa siloketdra sipugagalai taiaili ituppai purimanuaiadra.

⁷ Ta pa' nuseseake kam, angoi ipuaili kele nenda?

⁸ Kineneiget panatra kam ka sangamberi leleu masiala loina, lepa galaimuian UmangKu. Iageti maangkanangan leu te bagakku samba panindogirangan leu te aku kasibulatnia. Kau le', nulelekngake kam purimanuaiatmui!

⁹ Nubesiake le kam buat siureman simaigi, tapoi goiso le anusilo kam. Abbitmuiannia ka lalepmui, tapoi buat simoneimui nenda ulupakekungannia isapru. Angoi pa akugalaiake nenda? Alegietnia iate: kalulut umangKu poi siragatat pei le, aipoi sangamberimui sarat masibesiake nugalai kam lalepmui pasasaramui.

¹⁰ Iate lulunia ta ibebele urat, bailiu taioinangan ipututu siureman.

¹¹ Akubailiuakean imagarak sangalio polak, samba ka sangamberi tinambu, ka monen gandum samba ka sangamberi monen anggur samba leu et ka sangamberi monen zaitun, samba ka sangamberi siputututu ka polak nene, samba leu et ka tubut sirimanua samba ka tarimeu samba leu ka sangamberi besiakenenmui.”

Tai Israel masireddet parentat Tuhan

¹² Iageti si Zerubabel samba si Josua samba sangamberi tai Israel sitotoili ka kudduat katuribbaiatdra ka Babilonia, masireddet tiboiet Hagai, pakoiniet Tuhan nenda. Ragalaiake le siripokat siparentaakenen Tuhan katubutda, kalulut loto'ra poi kai Tuhan.

¹³ Lepa segeakenangan patonekat Tuhan si Hagai ka paamian, amupalelekngan si Tuhan ikunemi geti sia.

¹⁴ Kise te si Tuhan masitubbui paatuat Gubernur Zerubabel, Imam Sabeu Josua samba leu samba sangamberi sirimanua sitotoili ka kudduat katuribbaiatdra, bule sangamberidra masigalai Uman Tuhan Sipulugege, Taikamanuandra.

¹⁵ Arataddaakean mugalai ka gogoi rua puluh epat, laggo enem ka bagat rura sikarua kateteret pamarentaat Rimata Darius.