2Sam. 1 - BUKO SIPUNENAN

Si David masiarep pagalaiat kamateiat Saul

¹ Kele aimatei si Saul, toili si David barania ka pasaggangan masikalaake tai Amalek, lepa kuddunia ka Ziklag rua ngagogoi burunia.

² Ka mansepnia, oi sara silainge sibara ka pusapougat Saul. Sibailiu toggaiat reureu bagania aibiritakean leppeinia samba aikauan polak ka utenia. Lepa einia kai David samba purekkuknangan ka matania.

³ Parerenangan si David katubunia, “Kaipa anubara?” Aleginangannia silainge nenda, “Amutuitui aku barakku ka pusapougatda tai Israel.”

⁴ Rerenangannia minca si David, “Aponia sibabara?” Aleginangan silainge nenda, “Amutuituian saladdumai kabagat pasaggangan samba maigi simamatei, beringan leu si Saul samba si Jonatan amateian sia.”

⁵ Rerenangannia minca si David, “Kipa anuagainia, kamamatei Saul samba Jonatan?”

⁶ Aleginangan silainge nenda, “Apasese ai aku ka leleu Gilboa, lepa itcokungan si Saul, ainia muandai ka simuine bakkatnia, kisedda leuet tai saggak sipukekereta samba saladdu sipukukuro airakukukrunia.

⁷ Lepa pitsanangan kateitei si Saul, itconangan aku, lepa sogainangan aku, samba alegikungannia, “Oi Tuanku.”

⁸ Parerenangan katubukku: Kasei ekeu? Alegikungannia: Aku nene tai Amalek.

⁹ Lepa kuanangan katubukku, “Konan sene, mateiake aku! Amalabbungan siorangan katubukku samba mamateian le aku.”

¹⁰ Iageti leggreakekungan tubukku katubut Saul samba mateiakekungannia, kalulut kuagai, ke belenia taan momoi ipurio minca, samba bulat mateinangan leuet. Lepa alakungan kirit purimataat ka utenia samba letsu kakabeinia, samba ambitkungannia sene katubum.”

¹¹ Kele aiarep sangamberinia nene si David, biritakenangan leppeinia kalulut sou bagania, samba galaiakerangan leuet kisedda sangamberi sipasitututnia.

¹² Pusourangan samba mureureu baga samba leu mupuaso kalulut si Saul samba si Jonatan togania samba leu kalulut tai Israel, paamian Tuhan, kalulut bulat makope poi igi simamatei kabagat pasaggangan nenda.

¹³ Iageti parerenangan si David katubut silainge siabbit katuareman nenda, “Kaipa laggainu?” Aleginangan silainge nenda, “Aku nene tai Amalek, sipueppak ka laggai Tuanku.”

¹⁴ Kuanangannia si David, “Bulat makope gegem masimateiake rimata sipilit Tuhan!”

¹⁵ Lepa sogainangan sara katalagat sipasitututnia si David, samba kuanangan, “Mateiake sirimanua nene!” Iageti te'tenangan silainge nenda pat matei.

¹⁶ Kuanangan si David katubut silainge nenda, “Ekeu le aiorakake ukum simateiakenen katubum, kalulut anupoiliat mamateiakenu rimata sipilit Tuhan!”

Sou bagat David kalulut kamamatei Saul samba Jonatan

¹⁷ Lepa nenda uraiakenangan sou bagania si David kalulut kamamatei Saul samba Jonatan, togania,

¹⁸ amba kaunangan parenta bule tugelaiake urai nene katubutda samuntogat Jehuda; urai nene atusuratakean kabagat Buko Sirimanua simaroipo Baga.

¹⁹ “Israel, ka leleunu, ka kudduat nenda, matei simagege, tatogat purimataat, mabukkatrangan sibailiu pulaingean laggai.

²⁰ Bui raarep katuareman nenda ka tai Gat, bui tupaarep katuareman nenda ka paoggangan laggai Askelon. Bule bui rapugora baga tainanalep tai Filistin samba bui rapuangka baga tatogatda tainanalep sirimanua sitaipususunat.

²¹ Ale paleleleleu Gilboa, bui isuaiji ekeu tinobut samba urat! Eddangan imagarak mone samba polak simalio. Kalulut sedda poi aibele korabbira simagege Samba korabbit Saul leu kaominangannia, taan atutulaiji minca.

²² Ke ta'anai logaura simamatei simateiakenen samba ta'anai tabetda simagege silogui Jonatan ta totoili minca, samba lanjau Saul ta totoili siboboi.

²³ Si Saul samba si Jonatan, kilibet baga samba simasuru ka puririmanua, ka purimanuaiat samba kamateiatda sitaipasasara le sia. Bulat simanangka tubu le sia bele peile manyang, Sia peile maron tubu ka singa.

²⁴ Ale tatoga tainanalep Israel, pusou kam kalulut si Saul, sipalainge kam pasamba leppei simabonan simakeppu saki, samba si sikau pulaingean mas ka leppeimui.

²⁵ Amateian tebai simagege ka talagat pasaggangan! Si Jonatan matei ramateiakenia ka leleumui.

²⁶ Mangorik le aku kalulut ekeu, sarainangku Jonatan, bulat masuru ekeu katubukku nuntut bagam katubukku bulat malina bele peile nuntut bagatda tainanalep.

²⁷ Amateian tebai simagege samba masusu le pamatei pasaggak!