فئلئمونا 1 - موقدس کتاب

¹ مسئح عئسانین بئر زئندانئسی پولوس و قارداش تئموتاعوسدان، سوگئلی و همکاریمیز فئلئمونا.

² آپفئیا باجییا و بئزئم کئمی عسگر اولان آرخئپوسا و سنئن اِوئنده اولان کئلئسایا:

³ آتامیز تاریدان و رب عئسا مسئحدن سئزه فیض و باریش اولسون.

⁴ تاریما همئشه شوکور ادئب دوعالاریمدا سنی ذئکر ادئرم،

⁵ چونکی سنئن رب عئسایا و بوتون موقدّسلره اولان محبّت و ائمانینی اِشئدئرم.

⁶ مسئحئن خاطئرئنه سنده اولان هر یاخشی شیئن معرئفتی ائمانینین رفاقتئنده ثمره‌لی اولسون.

⁷ چونکی گلمئشم کی، سنئن محبّتئنده چوخ شادلیق و تسلّی آلیم. اونا گؤره کی، قارداش، سنئن ساینده بوتون موقدّسلرئن اوره‌یی تزه‌لنئب.

⁸ بونا گؤره، گرچی مسئحده کئفایتجه جسارتئم وار کی، سنه صحئح اولانی اتمه‌یئنه امر ادئم،

⁹ لاکئن بونو ترجئح ورئرم کی، محبّتئن خاطئرئنه، من پولوس کئمی بئر آدام، یاشلی و ائندی ده مسئح عئسانین بئر زئندانئسی، سندن خاهئش ادئم.

¹⁰ اؤولادیم اونسئموس اوچون سندن خاهئش ادئرم کی، اونا زنجئرئمده آتا اولدوم.

¹¹ او، بئر زامان سنه فایداسیز ائدی، آمّا ائندی هم سنه، هم ده منه فایدالی‌دیر.

¹² من اونون اؤزونو سنئن یانینا گؤندَ‌رمئشم کی، منئم اوره‌یئمدئر.

¹³ اونو یانیمدا ساخلاماغی ائستردئم کی، ائنجئله گؤره زنجئرلره دوشدویوم حالدا سنئن عوضئنه او منه خئدمت اتسئن.

¹⁴ آمّا سنئن راضیلیغین اولمادان ائستمه‌دئم هچ بئر ائش گؤروم کی، سنئن یاخشیلیغین مجبوری یوخ، اؤز ائسته‌یئندن اولسون.

¹⁵ بلکه ده بئر مودّت سندن آیریلماسی بونون اوچون اولدو کی، اونو همئشه‌لئک گری آلاسان،

¹⁶ بئر قول کئمی یوخ، بئر قولدان داها دا آرتیق، بئر عزئز قارداش کئمی، خوصوصَن منه، لاکئن نه‌قدر چوخ سنه، هم جئسمده هم ده ربده.

¹⁷ ائندی اگر منی اؤزونه بئر شرئک ساییرسان، اونو منئم کئمی قبول ات.

¹⁸ آمّا اگر سنه بئر نحوله یامانلیق اتمئش اولسا، یا دا سنه بورجلو اولسا، اونو منئم حسابیما قوی.

¹⁹ من پولوس، اؤز اَلئمله یازیرام کی، بو بورجو سنه وره‌رم. (بونو دمک ده ائسته‌مئرم کی، اؤز جانینی بله منه بورجلوسان).

²⁰ بلی، قارداش، قوی ربده سندن بئر فایدا گؤروم، اوره‌یئمی مسئحده تزه‌له.

²¹ سنئن ائطاعتئندن یقئنئم اولان حالدا بونلاری سنه یازیرام و بئلئرم کی، حتّا ددئیئمدن آرتیغینی دا اِده‌جکسن.

²² همن زاماندا منئم اوچون ده بئر یر حاضیرلا. چونکی اومئد ادئرم سئزئن دوعالارینیز سایه‌سئنده سئزئن یانینیزا گلئم.

²³ منئمله برابر مسئح عئسادا زئندانی اولان اِپافراس،

²⁴ همکارلاریم مرقوس، اَرئسترخوس، دئماس و لوقا دا سنه سالام گؤندَ‌رئرلر.

²⁵ رب عئسا مسئحئن فیضی سئزئن روحونوزلا اولسون.