Ezekeli 1 - MUKANDA WANZAMBI

¹ Mumwaka wamakumi asatu, mukakweji kamuchiwana, mwifukuda muchitanu dakakweji owu, chinadiŋi kudi ankoli kuchikumu chakaloŋa Kebari, mawulu hiyakwenzuluka, hinukumona yimwenu yakudi Nzambi.

² Mwifuku damuchitanu dakakweji owu, mumwaka wamuchitanu wawukoli wamwanta Yehoyakini,

³ izu daYehova hidikwinza chikupu kudi kapristu Ezekeli mwana kaBuzi, mwituŋa dawaKaladeya kuchikumu chakaloŋa Kebari. Chikasa chaYehova hichikwikala hadi yena kwenoku.

⁴ Nami nitali, hikudi mpepela yaŋovu hiyikufuma kukabeta kakuchimunswa, hikudi ivu deneni dikweti kesi kadi nakuyindoka, dikweti kutoŋeka kwi-ndo, mukachi kayumoyu himukumwekana neyi wulombu waweŋi wamulombi, mwomukachi kakesi.

⁵ Mukachi kayumoyu himukufuma chuma chafwana neyi amomi awana. Tiyenu mwamwekenuwu, adiŋi afwana neyi antu.

⁶ Wejima wawu adiŋi nayifu yiwana yiwana, wejima wawu akweti mpuula jiwana jiwana.

⁷ Nyendu yawu yadiŋi yoloka. Madachilu akunyendu yawu adiŋi neyi yikwa yamwana kaŋombi. Adiŋi nakukejima neyi wuneŋu wanakuluwu.

⁸ Mumashina ampuula jawu mumbavu jawu jiwana jiwana, mwadiŋi makasa adi neyi awantu. Mwawana wawu adiŋi nayifu yawu nimpuula jawu;

⁹ mpuula jawu januŋaŋana; chadiŋi nakuyawu kubalumuka ataliku, ataliku, nehi. Wejima wawu emakeni kwazwa-a ho-o.

¹⁰ Tiyenu chafwenuwu yifu yawu, akweti iku chifu chamuntu, kuchikasa chachidiilu chifu chamutupa mwawana wawu, kuchikasa chachimunswa chifu chaŋombi mwawana wawu, iku nawa chifu chambuulu mwawana wawu.

¹¹ Niyifu yawu nimpuula jawu jadiŋi jadambula kwiwulu; wejima wawu ela mpuula jiyedi jadinuŋa, jiyedi nawa jabuta nyijimba yawu.

¹² Emakeni kwazwa-a ho-o. Kukukeŋa kuya spiritu, diku kukuya niwena, chadiŋi nakuyawu kubalumuka ataliku, ataliku nehi.

¹³ Mwafwenuwu owu amomi amwekeni neyi makala akesi, amwekeni neyi yimunyi. Mukachi kawamomi kesi kelilaŋa kaya kenza. Kesi oku kadiŋi katamuka, omu mukesi mwafumini kukenashana.

¹⁴ Owu amomi adiŋi nakwila atemuka, afunta cheŋi, amwekeni neyi nvula yidi nakukena mwashi.

¹⁵ Nami nitali owu amomi, hinukumona heseki hadi kafumbu kadi hohadi amomi kwokuyifu yawu yiwana.

¹⁶ Mwamwekeni tufumbu nimwatutuŋiluwu mwadiŋi neyi chakekemaŋa berili. Twejima tuwana twadiŋi twadifwana. Nimutwamwekeni nimwatutuŋiluwu mwadiŋi neyi kafumbu kadi mukachi kakafumbu.

¹⁷ Kuya kwatu kwakuya kutukutalisha kuwana. Chitukuya kubalumuka tutaliku, tutaliku, nehi.

¹⁸ Hakwila mwatufumbiluwu mwasweja kuzandama, mukweti niwoma. Mwatufumbiluwu namutuwana watu mwenzala kwamesu hohu kwi-ndo.

¹⁹ Chadiŋi nakuyawu amomi, tufumbu nitwena hitukuya nawu hamu. Chakunyamukawu amomi heseki hiyakuya kwiwulu, tufumbu nitwena hitukunyamuka heseki.

²⁰ Kukukeŋa kuya spiritu, diku kukuya tufumbu otu, kwoku kukukeŋa kuya spiritu. Tufumbu hitukunyamuka heseki hamu nawu. Muloŋa spiritu yamumi yadiŋi namutufumbu.

²¹ Chakuyawu awa, otu nawa hitukuya. Chakwimanawu awa, otu nawa hitukwimana. Awa chakunyamukawu heseki, tufumbu nawa hitukunyamuka heseki hamu nawu. Muloŋa spiritu yamumi yadiŋi namutufumbu.

²² Hewulu danamutu wamumi hadiŋi chuma chafwana neyi luzwizu, kuchitala chidi neyi mayimakanza chikweti niwoma; chakutanjika hewulu danyitu yawu.

²³ Mpúula jawu jadiŋi joloka mwishina daluzwizu, jatalaŋana lumu nalukwawu. Wejima wawu akweti jiyedi jiyedi jakubuta hambadi iyi, wejima wawu akweti jiyedi jiyedi jakubuta hambadi yikwawu, hanyijimba yawu.

²⁴ Chadiŋi nakuyawu natiyili lushindu lwampuula jawu, ludi neyi lushindu lwameji amavulu, neyi izu daChinaweji, lushindu lwamuyoyu ludi neyi lushindu lwanjita. Chakwimanawu hiyakuzenzeka mpuula jawu.

²⁵ Hewulu daluzwizu lwadiŋi hewulu danyitu yawu, hatiyakeni izu. Chakwimanawu hiyakuzenzeka mpuula jawu.

²⁶ Hewulu daluzwizu lwadiŋi hewulu danyitu yawu, hadiŋi hafwana neyi itanda dawanta damwekana neyi kasafira. Hadi neyi itanda dawanta, hadiŋi hadi neyi chamwekanaŋa muntu wudi hewulu dadu.

²⁷ Hinukumona kudi neyi wulombu waweŋi wamulombi, kudi nakumwekana neyi kesi kadi mukachi kwi-ndo, kufumisha kunamwekani neyi lukuma lwindi nakutwala kwiwulu, nikufumisha kunamwekani neyi mumbunda yindi nakutwala kwishina, hinukumona kudi nakumwekana neyi kesi, kunata muki tamu-u, kwi-ndo, yena mukachi.

²⁸ Neyi hamwekanaŋa kasulu ŋunda kadi hevu ifuku danvula, dichi chamwekeni nikutamuka kwatamuki luku kwi-ndo. Dimu mwamwekeni neyi kulema kwaYehova. Chinachimweni hinukudimbuka chamesu heseki, hinukutiya izu dawumu wudi nakuhosha.