Markus 1 - Ɗû na sɗik na wiini Alaw

Ɓikini seŋ na wiini Yohana zi Baptisme

¹ Pi zi tiki na wiini labar na pɗem na miɗini Yesu Kristu Ahini Alaw.

² Maini n'aŋ gaini ɗû war ɗû na wiini ɗif na mini Alaw Esaya ɗa nɵa: Mu na ɵinaɗi ɵeŋŋa wuzaku, kapai a ɓisitiku futiku

³ wule a wa edi war basga na kaɗataŋ ɓa: ziziniti futi na wiini Epiɗ-ɗai ɗûpi futini n'agogoi cir cir lai.

⁴ Yohana si Baptisme a luɓasi edi warni basga na kaɗataŋ, a ɓaka miɗini baptisme na wiini bindi na gamai, buri ni na wiini tuwur lai.

⁵ Ɗai na Yudiya gaiɗi na Yeruzalem paŋ, e hili edi sini, e nivi baptisme tini par war Yurdan, won hlai n'e siɗi tuwurɗi wuzaɗi ɗai doogo.

⁶ Yohana sapa na sini ɗa a za gaini ayirni ɵigini, santir z'amur wuzani ɓak lai, a suma ɗa ayuwi gaini emelni ami na buza.

⁷ A ɓaka maini nɵa: Ni n'a na halasi asakala par spakni a suwaŋa ta, mu dai dai na mu kiɗa aŋ goɓo azumai aŋ pla sogom na miɗini harabakni edi kai.

⁸ Ta mu siki baptisme gaini yem, Ni ɗa aga a siki baptisme gaini Seze sɗik.

Baptisme na wiini Yesu gaini tanai n'a za sini

⁹ War mefeŋ ni ɗa, Yesu a halasi a Nazaret war Galileya par, a nava baptisme tini Yohana par agoɗom warni Yurdan.

¹⁰ Won hlai n'a niyasi agoɗom arni yem par tar, a tala hlai n'amai ɗa a ɓasa, Seze a yorosi amai par miɗini maini dere nɵa.

¹¹ Wule a halasi amai par a muɗa: Tuku k'Ahiya zi diri gara, ku vaŋa firiyiŋa amai ku tuku.

^12-13 Won hlai ni tizaw, Seze a kaŋ edi war buza, a faana mefeŋ doogo doogo puɗu edi war basga na kaɗataŋ, Satan a tanaŋ. A na fu gaini wazagai n'edi buza, ɗai zi ɵeŋ na war fuŋ-n'Alaw e zini pini.

Yesu a tika pin sdani

¹⁴ Asakal na e ɵi Yohana war daŋgai li, Yesu a halasi a Galileya, a ɓaka labar na pɗem na wiini Alaw,

¹⁵ a muɗa: Hlai a va li, pai n'Alaw, te cosi li, ki bindi, ki yimi pini labar na pɗem.

¹⁶ Won hlai n'a vuga wulani yem-ra n'abai na Galileya, a tala Simun gaini Andre e ɗa agoɗom war yem-ra n'abai aŋ ɵi ava, buri nagai e ɗi ɗai zi yimi hilif.

¹⁷ Yesu a miɗiɗi: Hilisi pa, aga mu bindiki aŋ ɗai zi tûmi ɗai.

¹⁸ Tizaw tar, e hinisi avaɗi edi, e tipi pini.

¹⁹ A hala wuzani sek agwi, a nava Yakob n'ahini Zebedewus gaini Yohana na tawalni. E ɗi fu warni hulumɗi ca aŋ zizini avaɗi.

²⁰ Won hlai ni tizaw a yikiɗi, e hini Zebedewus n'epiɗi warni hulum n'abai gaiɗi ɗai zi sda, e tipi pini.

Ɗif na gaini ksalai na hihir miɗini

²¹ E niyi aha war Kapernahum, war mefeŋ ni Sabbat ɗa e hili amlai warni sinagogne, a tika pini aŋ hitriɗi ɗai.

²² E bindi hiyak burini hitri n'a hitriɗi ɗa, buri a hitra maini ɗif n'aŋ gaini spak nɵa, maiɗi ɗai zi ɗû wazagai ɗa nɵa kai.

²³ Amlai warni sinagogne hanɗa, ɗif na ksalai aŋ miɗini a na fu, a ɗuula a muɗa:

²⁴ N'a tupuku gaya ɗa a ma ɗa? Yesu na Nazaret par? Ku halasi ɗa aŋ vidiyi edi ɗi? Ta mu suɗuku edi gaglai.

²⁵ Amma Yesu a ɓaraŋ a muɗa: Ba muku, niyasi edi warni ɗif hanɗa par;

²⁶ Ksalai a bulaŋ azumai, a gidiyaŋ gdaŋ, a niyasi edi sini par, a ɗuula gaini gdaŋni.

²⁷ Ɗai paŋ hunai te yimiɗi, e miɗi arbaɗi marɗi: Wala hanɗa a maɗa? A hitri na hehe, zaw a spak na maɵa? A muɗa sini ksalai, a ɵina pini lai ɗa!

²⁸ Tizaw, yikini a wa edi midini afti na Galileya paŋ.

Yesu a zûûliti suwulni Peter

²⁹ Won hlai n'e niyisi warni sinagogne par, gaini Yakob lai, Yohana lai e hili ahani Simun gaini Andre.

³⁰ Suwulni Simun te na fu azumai waŋ, siɗi a sawa, tizaw e miɗini wiini Yesu gaiɗi.

³¹ A hala siɗi gobi, a yimiti tiɗi, a siniti amai, siɗi zi sûwi a hiniti, te faka amai te zina piɗi.

³² Koskoi, asakal na futi te nawa li ɗa, e kiɗinisi ɗai zi veglek ɗa paŋ sini, gaiɗi na ksalai aŋ midiɗi lai.

^33-34 Ɗai na war fuŋ n'abai ɗa paŋ e tipisi mini magala paŋ. A zuula pinzibani veglek viya, a birga ksalai midiɗi ɗai par viya lai, a hina ksalai a muɗa kai buri ksalai a sɗaŋ ya.

Yesu a ɓaka seŋ war Galileya

³⁵ Gorof, won hlai na hlai a na gegeŋ hai, a faka amai a hala edi war baŋa, woni a tika pini aŋ siiwa.

³⁶ Simun gaiɗi marni na gaini e hili aŋ piyiŋ.

³⁷ Won hlai n'e niviŋ, e miɗini: ɗai paŋ e ɗa piyuku.

³⁸ A wiyiɗi seŋ a muɗa: Hulumu warni hlai zamai, war fuŋ na ɵimaɗi ɗa kapai mu ɓaka seŋ woni lai, mu niyasi edi burini sɗa hanɗa.

³⁹ A hala midini afti na Galileya paŋ, a ɓaka seŋ warni Sinagogneɗi, a birga ksalai edi lai.

Yesu a zuula ɗif na dugum

⁴⁰ Ɗif zi dugum ktai a halasi sini, a pa kurnaini azumai, a siiwaŋ a muɗa: Na ɓa ku dara, bundaŋa hilu pla kai ɗi!

⁴¹ Hiinini-haw a yimaŋ, a wa tini, a tetemaŋ a muɗa: Mu dara, bunda hilu.

⁴² Tizaw, veglek zi dugum a hinaŋ, a bunda hilu.

^43-44 Yesu a gidini mini gdaŋ a muɗa: Ku za hangal kapai ɗif a ɵina hanɗa muku par kai. Hala, ku siŋka suku arɗi paakai n'abakai zi ɓaka ɗa, za wazagai na Musus a gada midini buri bindiku na hilu ɗa. Hanɗa aga a za aŋ wala zi zaida buriku.

⁴⁵ Amma hlai n'a hala ɗa, a tika pini aŋ ɓaka labar hanɗa edi gaini wulani amai, gaini gdaŋ lai, haa Yesu a bunda a niya aha war fuŋ n'abai papɗak kir kai, a bunda a sumna edi warni hlai na baŋa, e kiɗinisi ɗai zi veglek na war hlai paŋ par sini.