Labar na war yivai n'ag'aŋ sulu 1 - Ɗû na sɗik na wiini Alaw

Labar miɗini Salmun, pai na Izrayel

¹ Salmun n'ahini David a nafa gdaŋ warɗi paini, Epiɗ-ɗai Alaw na wiini a za gaini, a sini rɗi n'amai n'abai griŋ gara.

Salmun a zilba yel tini Alaw par buri a ŋa gaini

² Salmun a tipiɗisi aliɗi Izrayel paŋ, a suwa paŋ abakaiɗi askarai na dubu dubu gaiɗi na miya miya, paakai zi sariya, gaiɗi n'abakai n'e ɵi wuzaɗi Izrayel paŋ a dara a muɗa: abakaini pinziba a miɗiɗi seŋ.

³ Salmun a hala gaiɗi ɗai hanɗa war hlai zi ɓaka na Gabawon, buri gumu n'e nivi gaini EPIƊ-ƊAI woni na wiini Alaw a na fu amai woni, gumu na Musus ɵeŋ na wiini EPIƊ-ƊAI a zizinaŋ won hlai n'a na ka edi war basga na kaɗataŋ.

⁴ Amma zunduk zi bonu na wiini Alaw ɗa, David a ɵina miɗini su, e tikiŋsi war Kiryat-yarim par ɗaw, e kinsi war hlai n'e ziziniŋ burini, war gumu n'e ziziniŋ burini a ha war Yeruzalem ɗa ta.

⁵ Amma gûwiŋ zi kiiya zi yi ɓaka na Betsalel n'ahini Uri, n'ahini Hur a zizinaŋ a na fu war Gabawon, wuzani hlai zi simni na wiini EPIƊ-ƊAI na Salmun gaiɗi ɗai na gaini paŋ e hilisi e zilbi dirini Alaw woni.

⁶ Woni Salmun a hala wuzani EPIƊ-ƊAI, mini gûwiŋ zi kiiya zi yi ɓaka wuzani gumu n'e nivi gaini EPIƊ-ƊAI woni, a fuɗa wazagai zi ɓaka zi yi dubu ɗaw.

⁷ War duvuk ni ɗa, Alaw a siŋka sini arni Salmun a miɗini: muɗaŋa haw ɗa, wala na ku firiya tiɓ ɗa a maɗa? Aga mu suŋku.

⁸ Salmun a wiyini seŋ a muɗa: EPIƊ-ƊAI, ku za pɗem abai gara sini David n'apa ku tuku, ku tikaŋa aŋ pai war balamni ku tuku lai.

⁹ Tiyana EPIƊ-ƊAI Alaw, hina seŋ na ku miɗiŋni wiini David n'apa a va amai, buri ɓa ku tikaŋa aŋ pai midini vok n'a pɵa kai maini kai-kai na agoɗom nɵa ku tuku.

¹⁰ Tiyana EPIƊ-ƊAI, saŋa yel gaini siɗi na hulum, kapai mu sɗa aŋ ɵa wuzaɗi ɗai hanɗa, nɵa kai ɗa, ɗif n'a kiɗa aŋ ɵa wuzaɗi ɗaiku ɗa asiya ɗa? Ɗai na viya hanɗa!

¹¹ Alaw a miɗini wiini Salmun: Na ɓa ku firiya ɗa a hanɗa ɗi ɗa, ku zilba farai kai, der zamai zamai kai, ku piyiti abai kai, ku paya mriɗi gawku kai gaini suŋfa na mogo midini afti kaalai, amma ku paya ɗa a yel gaini siɗi na hulum kapai ku ɵa wuzaɗi ɗaiŋa na mu tukuku midiɗi aŋ pai ɗa,

¹² yel gaini siɗi na hulum aga a sa suku, mu suku farai, der zamai zamai gaiɗi abai lai, na paakai na wuzaku par e niviŋ ka duk kai, na asakalku par kaw aga e niviŋ kaalai.

¹³ Salmun a wayasi war hlai zi ɓaka na Gabawon par, wuzani gumu n'e nivi gaini EPIƊ-ƊAI woni aha war Yeruzalem, a ŋa midiɗi Izrayel.

Spak gaini farai na wiini Salmun

¹⁴ Salmun a tapa saret zi gaw gaini plasai lai, saret zi gaw a na fu dubu gaini miya puɗu, plasai dubu doogo pi sulu lai. A mulaŋ war fuŋ n'abakai na zizina burini ca ca aha ɵimaɗi war Yeruzalem lai.

¹⁵ Barkani pai ɗa, or gaini arzaŋ a bunda aha war Yeruzalem viya maini ali-fuŋ nɵa, luwuŋ Sedre ɗe viya maini luwuŋ Sikomor na war huduk na Sefela nɵa lai.

¹⁶ Plasai na wiini Salmun ɗa, e piyiŋnisi ɗa war Egipte par, war Silikiya par lai, ɗai n'e cikiliŋni ɗa e wûriŋsi woni par.

¹⁷ Ɗai zi sakala hanɗa e kisi ɗa a saret zi gaw na ktai a suma sulai zi arzaŋ miya ɵaara ɵaara gaini plasai na ktai a suma miya gaini doogo doogo ɵim lai. E kisi zamai wiiɗi paakai na wiiɗi Hititekai gaiɗi paakai na wiiɗi Siriya.

Salmun a zizina wazagai buri rgini tempel

¹⁸ Salmun a sa miɗi buri e rgi Dalam ktai wiini EPIƊ-ƊAI, dalam na wiini pai ktai wiini ni lai.