Lucas 1 - Mushuj Testamento Diospaj Shimi

Lucasmi Teofiloman quillcashca

¹ Cai ñucanchijpurapi imalla tucushcataca, chashnataj cajpimi ña achcacuna callarishpa, alli churashun yuyashcacuna.

² Callarimantapacha quiquin ñahuihuantaj ricushpa, Diospaj Shimita huillajcunami ñucanchijmanca ima shina cashcatataj alli yachachircacuna.

³ Tucui imalla tucushcataca, callarimantataj, ima shinalla tucushcatami, callarishpa alli tapurcani. Chaimantami quillcanataj alli yuyachijpi, ñucapish tucuicuna alli nishca quiquin Teofiloman, caicunataca tucuita, callarishpa quillcani.

⁴ Quiquinman imallata yachachishcacunaca, chashnataj cashcata, ashtahuan alli yachachunmi quillcani.

Angelmi Bautiźaj Juan huacharinata huillashca

⁵ Jatun mandaj Herodes Judea llajtata mandacui punllacunapimi, Abías curapura caj Zacarías shuti curapi causarca. Paipaj huarmica, Aaronmanta miramushca huahuacunapura Elisabet shutimi carca.

⁶ Paicunaca ishquindijtajmi, Mandaj Diospaj ñaupajpica cashcata rurashpa causarcacuna. Dios imalla Mandashcatapish, tucuitami alli caźushpa causarcacuna.

⁷ Elisabet mana huachaj cashcamantami, huahua illajcuna carca. Ishquindijtaj ña yuyajcunapishmi carca.

⁸ Zacariasca, paipura curacuna servina cashca shinallatajmi, Diosta servicurca. Chai horasmi cashna tucurca:

⁹ Curacuna ruraj cashca shinallataj suerteta rurajpica, Mandaj Diospajlla huasiman yaicushpa, inciensota rupachinaca Zacariaspajmi urmarca.

¹⁰ Inciensota pai rupachicujpica, tucui canllapi cajcunami Diosta mañacurcacuna.

¹¹ Chaipimi inciensota rupachina altar alli ladomanca, Mandaj Diospaj ángel ñapish paiman ricurirca.

¹² Chaita ricushpaca Zacariasca, jatunta mancharishpa musparircami.

¹³ Ashtahuanpish angelca, cashnami nirca: —Zacarías, ama manchaichu. Can mañacushcataca, Diosca uyashcami. Cambaj huarmi Elisabetca, cʼari huahuatami huachanga. Paitaca Juanta shutichingui.

¹⁴ Pai huacharijpica jatuntami cushicungui, shujtajcunapish achcacunami yallitaj cushicungacuna.

¹⁵ Taita Diospaj ñaupajpica paica, jatunmi canga. Vinotapish, sidratapish mana ubyangachu. Mamapaj huijsamantapachami, jucha illaj Espirituhuan junda canga.

¹⁶ Paica israelcunataca achcacunatami, paicunata Mandaj Diospajman cutirichun pushanga.

¹⁷ Paica Eliaspi tiyashca espiritullataj paipi cajpimi, Mandaj Diosta ñaupashpa, Elías shinallataj imata mana manchashpa huillanga. Chashna huillashpami, yayacunahuan, huahuacunahuan pʼiñanacushcatapish alli tucunacuchinga. Shinallataj cʼariyajcunatapish, cashcata rurajcuna shinallataj alli yuyaihuan causachunmi yachachinga. Chashna yachachijpimi gentecunaca, Mandaj Diosta chasquinalla shungu tucunga— nircami.

¹⁸ Ángel chashna nijpi, Zacariasca: —Ñucapish, ñuca huarmipish yuyajmari canchij. ¿Ima shinataj can huillashca pajtanataca yachashunri?— nishpami tapurca.

¹⁹ Angelca cashnami nirca: —Ñucaca Diosta servingapaj, Paipaj ñaupajpi shayaj Gabrielmi cani. Paimari cai alli huillaita canman huillachun cacharca.

²⁰ Ñuca huillashcata mana crishcamantaca, cambaj huahua huacharingacamami, upayashpa imata mana rimai tucungui. Ñuca huillashcaca, pajtana punllapitajmi pajtanga— nircami.

²¹ Diospaj huasi ucupi chashna parlashpa unaiyajpimi, canllapi shuyacuj achca gentecunaca mancharircacuna.

²² Ña llujshimushpaca, imata mana rimai tucurcachu. Chaimantami Diospaj huasi ucupi imata ricushca canata yuyarcacuna. Imata nishpapish maquillahuanmi ricuchishpa huillarca. Chashnami paica mana rimaj saquirirca.

²³ Zacariasca Diospajta rurana cashca punllacunata ña pajtachishpaca, paipaj huasimanmi rirca.

²⁴ Chaimanta asha punllacuna qʼuipami, paipaj huarmi Elisabetca chichushpa, pichca quillata huasillapi tiyarca.

²⁵ Paica: «Gentecunapaj ñaupajpi ñuca ama ashtahuan pingailla causachunmi, Mandaj Diosca ñucamanca huahuata cuna tucushca» nircami.

Angelmi Jesús huacharinata huillashca

²⁶ Elisabet ña sujta quillata chichu cajpimi, Taita Diosca Galileapi caj Nazaret puebloman ángel Gabrielta cacharca.

²⁷ Cʼarita manaraj rijsij María shuti solterapajmanmi cacharca. Mariaca, Davidmanta miramushca Josehuanmi, caźarana tucushpa puricurca.

²⁸ María tiyacun ucuman ángel yaicushpaca: —Cushicui, cantaca Diosmari yallitaj cʼuyashca. Mandaj Diosca canhuanmari— nircami.

²⁹ Ashtahuanpish Mariaca, angelta ricushpa, pai imalla nishcatapish uyashpaca, musparircami. Shinallataj ima nishpa chashna ninaman shamushca caipajtapish yuyacurcallami.

³⁰ Chaimantami angelca, cashna nirca: —María, ama manchaichu. Diosmari cantaca jatunta cʼuyashpa allicunata cungapaj agllashca.

³¹ Cunanca chichushpa, shuj cʼari huahuatami huachangui. Chai huahuataca, JESÚS shutita shutichingui.

³² Paica jatun nishcami canga. Jahua pacha Diospaj Churi shutipishmi canga. Mandaj Taita Diosca paimanca, Paipaj ñaupa yaya David mandashpa tiyanatami cunga.

³³ Jacobomanta mirarishca israelcunataca, Paimi huiñaita mandanga. Pai mandanaca manataj tucuringachu— nircami.

³⁴ Shina nijpimi Mariaca, angeltaca: —¿Ima shinataj chashnaca tucungari? Manaraj cʼarita rijsinica— nishpami tapurca.

³⁵ Angelca cashnami nirca: —Jucha illaj Espiritumi cambajman shamunga. Jahua pachapi Causaj, Tucuita Rurai Tucuj Diosmi cantaca llandunga. Chaimantami huahuaca jucha illaj huacharishpa, Diospaj Churi nishca canga.

³⁶ Riqui, cambaj prima Elisabetpish, yuyajpachapi cʼari huahuata chichumari. Mana huachaj cashca cashpapish, ñamari sujta quillata chichu.

³⁷ Taita Diospajca, imapish mana rurai tucuipajca mana tiyanchu— nircami.

³⁸ Chashna nijpi Mariaca: —Mandaj Diosta servij ñucaca caipimi cani, ñucataca can nishca shinataj rurachunlla— nircami. Chaita ninca angelca, paipaj ñaupajmanta rircallami.

Mariaca Elisabettami ricugrishca

³⁹ Chai punllacunapimi Mariaca, Judá llajta urcupi caj shuj puebloman utcashpa rirca.

⁴⁰ Zacariaspaj huasiman ña chayashpami, Elisabettaca ‘Sumaj causaita charipai’ nirca.

⁴¹ Mariata uyaihuanmi huahuaca, Elisabetpaj huijsapica saltarirca. Chashna tucujpica Elisabetca, jucha Illaj Espirituhuan junda cashpami,

⁴² sinchita cashna nirca: —Canca huarmicunapurapica, bendiciashcami cangui. Cambaj huijsapi huiñacuj huahuapish bendiciashcamari.

⁴³ ¿Ima nishpataj ñuca Apupaj mama cashca jahuaca, ñucataraj ricuj shamurcanguiari?

⁴⁴ Can ñucata ‘¿Allillachu cangui?’ nincamari, ñuca huahuaca cushicushpa, ñapish ñuca huijsapi saltarirca.

⁴⁵ Mandaj Dios imalla nishcata crishcamanta cushicuiari. Pai imalla nishcataca pajtachingatajmi— nircami.

María cantashcami

⁴⁶ Chashna nijpica Mariaca, cashnami nirca: “Mandaj Diostaca, ñuca almahuanmi alli nicuni.

⁴⁷ Ñucata Quishpichij Diosmantaca, ñuca espiritupimi cushicuni.

⁴⁸ Paita servij ñuca huajchataca ricuhuashcatajmari. Cunanmantapachami, ñucataca huahuan huahuan cushicuj huarmi ningacuna.

⁴⁹ Tucuita ruraj Diosmari, ñucapajca jatun allicunata rurashca. ¡Paipaj shutica jucha illajmari!

⁵⁰ ¡Paita manchajcunataca, huahuan huahuanta llaquicunllamari!

⁵¹ Paipaj maquihuanca, jatun mancharinacunatami rurashca. Shungupi jatun tucushcacunataca chingachishcamari.

⁵² Mandashpa tiyacuj jatuncunata anchuchishpami, mana jatun tucushcacunata jahuaman churashca.

⁵³ Yaricaihuan cajcunamanmi, yalli yallita cushca. Ashtahuanpish charijcunatami, chushaj maquita cacharishca.

⁵⁴ Paita servij israelcunataca ayudantajmari, Pai llaquij cashcata yuyarintajmari.

⁵⁵ ‘Abrahamtapish, paimanta mirarijcunatapish, huiñaitami llaquisha’ nishcami carca. Chaitaca, ñucanchij yayacunamanmi huillarca” nircami.

⁵⁶ Mariaca, quimsa quilla shinata Elisabetpajpi tiyashpami, paipaj huasiman tigrarca.

Bautiźaj Juanmi huacharishca

⁵⁷ Elisabetca ña huachana punlla pajtajpica, cʼari huahuatami huacharca.

⁵⁸ Dios jatunta llaquishpa, Elisabetman huahuata cushcata uyashpaca, cʼuchullapi causajcunapish, paipaj aillupuracunapish mana jahuallatami paihuan cushicurcacuna.

⁵⁹ Huahua huacharishca pusaj punllapimi cashna tucurca: Huahuatami pai charishca aicha punta carata pʼitichinaman rircacuna. Chaipimi huahuataca, ‘Yayapaj shutillatajmi canga’ nishpa, Zacarías nircacuna.

⁶⁰ Ashtahuanpish mamaca: —¡Mana Zacariaschu! Juan shutimi cagrin— nircami.

⁶¹ Chashna nijpica: —Cancunapurapica, Juan shutica manamari tiyanchu— nircacunami.

⁶² Chaimantami, ‘¿Ima shutitataj churagringui?’ nishpa, maquillahuan yayata tapurcacuna.

⁶³ Chaimantami Zacariasca, shuj uchilla tablata mañashpa, chaipica: «Juan shutimi» nishpa quillcarca. Chaipica tucuicunami mancharircacuna.

⁶⁴ Chashna quillcancami Zacariasca, paipaj cʼallu cacharirijpi rimai callarirca. Chaimantami Taita Diosta alabai callarirca.

⁶⁵ Chashna tucujpicarin cʼuchullapi causajcunapishmi, tucuicuna jatunta mancharircacuna. Shinallataj tucui Judea llajta urcucunapimi, imalla tucushcataca, huashan parlanacurcacuna.

⁶⁶ Chaita uyajcunaca, caishuj chaishujmi: «Cai huahua jatunyashpaca, ¿imashi canga?» ninacurcacuna. Mandaj Dios Paipaj maquihuan huaquichicujta ricushpami, chashna ninacurcacuna.

Zacarías imallata huillashcami

⁶⁷ Juanpaj yaya Zacariasca, jucha illaj Espirituhuan junda cashpami, imalla tucunata cashna huillarca:

⁶⁸ «Ñucanchij israelcunata Mandaj Diosca alli nishca cachun. Paimari Pai agllashcacunata quishpichingapaj shamushca.

⁶⁹ Paita servij Davidpaj familiapuramantami, Tucuita Rurai Tucuj Quishpichijta ñucanchijpajman cachashca.

⁷⁰ Pai ima nishcata huillaj, jucha illaj runacunahuan ñaupaman huillachishca shinallatajmi rurashca.

⁷¹ Tucui ñucanchijta pʼiñajcunamanta quishpichichun, paicunapaj maquimanta llujshichichunmi cachashca.

⁷² Pai jucha illaj Diosca, ñucanchij yayacunahuan ari ninacushcata yuyarishpami, paicunata llaquishcata ricuchishca.

⁷³ Chashna rurana tucushpaca, ñucanchij ñaupa yaya Abrahammanmi, ‘Pajtachishatajmi’ nishca carca.

⁷⁴ Ima manchai illajlla Paita servichunmi, ñucanchijta pʼiñacujcunamanta quishpichishca.

⁷⁵ Ñucanchij tucui causaipi Paipaj ñaupajpi cashcata rurashpa, Paipajlla causachunmi chashna rurashca.

⁷⁶ Ñuca huahua, canca jahua pacha Dios ima nishcata huillaj nishcami cangui. Canmari Mandaj Dios purina ñanta allichingapaj, Paita ñaupashpa ringui.

⁷⁷ Dios agllashcacunamanca, quishpirina tiyashcatami ricuchingui. Paicunapaj juchacunata Dios anchuchinaman shamushcatami huillangui.

⁷⁸ Ñucanchij Diosca ñucanchijta yallitaj llaquishpami, jahua pachamantaca, pacarishpa achijyaj shina shamunga.

⁷⁹ Paica amsa tutapi huañunalla causajcunata achijyachingapaj, ñucanchijta sumaj causaipi churangapaj shamushcatami huillangui» nircami.

⁸⁰ Chai huahua huiñarishpa catijpica, Diospaj espiritupipish punllanta sinchiyashpami catirca. Israelcunaman huillai callari punllacamaca, shitashca pambacunapimi causarca.