Judas 1 - Bíblia

Haliklu Piranapni

¹ Judas tshinkalurno Jesus Cristo towrerno, Tiago tshinkaluru molno hita. Nyonanwakathi hixa Wuru Hoyakalu hamotlene, Jesus Cristo hislahlene, htshanixlene.

² Nanjitlu hetwamonrewlu, kihle hwachalu hiyrunu hichiniklewlu hwapotutanu hix-yehi.

Halixlu Tshinanu Jmererunepwu Piranapni

³ Nuchinikanune, nuchinikanrexinixkalu mitshi nyonanwakaxyawakaphi nasrujyawakaphi hiwejikaluru pirana ptowru yineru tshinanupa, netlu hijhakalur-koxni nyonanwakaxyawakaphi ntowuxyahi jmerpotuphi halixlu hasrujikolu pirana hislahpotutanu. Xye halixlu Hoyakalu pa katapka henekna hinerune, ralixjene.

⁴ Klu tshinanu rawna jejine satkaka, hixa hanikajite hapokachatatshine mtshanixkoneko. Mitshikawako hnurexikna rapnokaxikowakapna. Hoyakalu malukanutu homkahitatshinni wanna. Hoyakalu hihlenu hepixlewatatshri, mimaletlewatkatu pirana hkahwakluna. Ruknokluna Tsru Hixikatshriwa Hoyakalu satupkalutu hiyrunu Wutsrukate Jesus Cristo ruknokna.

Hoyakalu Hapnokaxyawakna Malixkane Piranapni

⁵ Hiyáhoni xawakni satu pirana nuchinikapkakanhi yahmaklu mitshikawako himatatkalu. Hoyakalu mitshi Egito tshijne riwekkajyatkana yine seyni wane pnutetka ruylatatkana wannani malixkanni.

⁶ Hiyrun-koxa hiwejikalune Hoyakalu towrerune tenhohne hajenekananu, yomuwatsa hostutkalunni hike rixiniko mnikawnakatu klu tshinanu ruknokatkaluna rawakanaxyawakna. Hiyáhoni Hoyakalu hihnanutna mapchahawak-yehiya, tsru hijhakaluru hohne hinatshripa rapnokatkona.

⁷ Waneko pixka rixkanna Sodoma, Gomorra poktshi hajenni hiyrun-koxa wanestsi hwa poktshitatshinni, kapoklewaklerunni hiyrunu jejinekakluko het-sotankakatshinni, hsaletkanna tshitshmeroyma, xirnatshri hike rixiniko muwnakatuya. Rimathexikowakapa waneko pixka rixkona, wane pixkalutu kamhatshine.

⁸ Waneko pixka rixna, nyi yine jipnawaklerune, mantshi himtukjetatshinni. Hi hkahwakpiratluna Hoyakalu towre hiyáhoni phurune rapatna.

⁹ Hiwejikaluru Hoyakalu towrerune tenhohne hajene kosekatshri, Miguel tshinkaluru, hi htserutahchinikanuxnawa hektuwaka htshinanwakaxyawaklu tsru kamtshi, Moisés-ni mane hikolukle ruhjekajinna mitshi. Wla tsonu htshina Miguel tshinkaluru, Tsru Hixikatshriwa Hoyakalu tshihetjetanyi, kamtshi.

¹⁰ Seyni nyi jejine, heyikachatlu hmimatjemanutukna. Rimatajijrerna hmasrujikotnina, hocha hajene mimat-hichinikanuwatkane pixka rixna. Wan-rixa himtuklexinwana.

¹¹ Hi pa himtukalutu retanna klu tshinanu romkahitluna Caim tshinkalurni pupjere pixkalutu. Hiyrunu ralukpotutluna hpohirewaxyawakapna Balaão tshinkalurni pupjere pixkalutu romkahpotutna. Nikatkalunepni wanna Corá tshinkalurni hkamnirewle hikolukanruni pixka.

¹² Hapatje niklexini hichiniklewlu tshinanu seyni nyi jejine himtuka hapatjejrethi. Hpoyikowatna hma patnuymana, wanna nanwaka tsonu hijha nijituxnawa tsru niklu yehiya. Hohimkohi minnewapiratkatuko, ptowru sretako kanniphalu hanikachaleru pixkalunni wanna. Hahmuna hitshipnatshritka, hisahi klu papko msahiwatkatutka pixkalunni. Hepi kata hipnatshine, hahmunni hitskihi potuko hoplijikaluru pixkalunni.

¹³ Nyi yine, teno plojhalu mar powha hwatshri mpokokhatu pixkalunni. Ruphujetluna hkamrurna patewkaklewatatshri tsonu, wenu honneha soli pixka. Katahirine mpohijetanu hwawaklerune pixkalunni wanna. Mapchahawaka, katalu mwiywakanu yehi rumlukkanna hike rixiniko mnikawnakatu mmahletu.

¹⁴ Enoque tshinkalurni sete rixinri Adão-ni klopichni hinkakletlu hinamtatshri pirana nyi jejine pirana. Wla htshinnixka Enoque-ni: Hetanu! Tsru Hixikatshriwa Cristo hinanu. Waleymalunepa htowrerune potukalune tenhohne hajene hixo mil mnupna.

¹⁵ Runanu rukolujyawakapna ptowru yine. Rapnokaxyawakapna wane hanikajite hwatshine Hoyakalu malixkane, hkamrurna ptowruka Hoyakalu mukchikhihlenutanutu tshinanu. Hiyrunu rapnokaxyawakapna hektuwaka kamhatshine, Hoyakalu malukkane htokanna ptowruka, hektuwaka htshinanwakaxyawakluna Hoyakalu tshinanu.

¹⁶ Nyi jejine hihjekakjetatshinni, kahemhajetatshinni. Wannako himanna halukanru homkahitatshinni wanna. Hinamaymana htserpiranaxnawana. Kihler-pirana htshinanwakjetna pimrine rukchikhihlenuxikowakapna wannako.

Hinkaklu Hiyrunu Kojiretlu Piranapni

¹⁷ Seyni hixa nuchinikanune, hichiniktokanutanru Wutsrukate Jesus Cristo nurrene tokanu, tokantshi mitshikananu runkakletlerna.

¹⁸ Runkakatkahina mitshi hnikawnahohnepiraxini papko, runanna Hoyakalu tokanu heyikatshinepa wannako hihchinikanna halukleru hektutu homkahitatshinepa.

¹⁹ Raluk-hitspaletanna, wannako hihchinikanna hektutu homkahitatshinni. Hoyakalu Hiwejikaluru mwikanni wanna.

²⁰ Seyni hixa nuchinikanune, halixlu potukal-potuko hoho, hpoyehixinwa. Hanjihohnetanu Hoyakalu Hiwejikaluru hepixleyma.

²¹ Hoyakalu hamotlewleko hwahohnekanatanu. Wutsrukate Jesus Cristo hetwamonuxyawakwu kahwakatshinephi, hiweklu hike rixiniko mnikawnakatu hyoptotanu.

²² Satkaka yineru hihroka halixletatshri hepixanu.

²³ Pimrine tshitshmero yehi hkochpajinna, riwejyawakapna. Hetwamonutanna seyni hislahinwa. Hahnanutanru himkalna kaptsholu pixkalutu, wanna mane kamrure pitshotatshri.

Hanjihohneru, Himalwuru

²⁴ Himalwutkalurni Hoyakalu wumukata poyehitletjeru wma mujrujyawakanupa hiyrunu Hoyakalu hoyaknu sreta wumukata hitakletjeru, hike mixkanepwu, poyikolunepwu.

²⁵ Hoyakalu satupkalutu, wiwekkakjeru wkochtshekhiwakata. Wutsrukate Jesus tshinanu hoyaknutshi, tsru hiphujewnatshri, towuwlu hiyrun-koxa himukatlu walenni xye tshiji hmuyakotkanuklunuwa klu papko haté xawakni. Hiyrunu hike rixiniko mnikawnakatupa hohne wan-rixanu. Amém.