JUDA 1 - ITHAR CHONGHAK

¹ Jesu Khrista, ameenae vokhehkho Jems anae Juda ki ing, Thangnang ing yngeenvasah, Apa Thangnang ing aning ymmansiih vokhehkho Jesu Khrista ing yngahsah neningna:

² Ningchuwh, idae vokhehkho ningsiihchu hungnemsehseh ynsuwhrasii.

Ynraar ing Aanchuw mee ae

³ Kaningsiih ae, ki ing inuw vakhae khaena ynsuwh manlaenpeeh chong khaena ithupak ing ynziihnii khaena kamandensahrae, ynthiing ae ningna vokhehpangna ympeeh vasah thacha ama khaenache barungriir iruwh ing ma itaarnii khaena omrasii ichiichu, ki ing neningna ynziihmah rumahsa.

⁴ Akhaechuve achuw yngkheh mee aechu ynruwhjaeh ing taensae; vajeer havi khaene ajae tunana engkhaena maen ing ynziihka om vasahva. Enuw chuve Thangnang yndenmah, apa Thangnang atungsiihchu arehting abaheer ae, inuw yngafhuw yngkhehpang om Aafhuw Jesu Khrista chu arumah meepae.

⁵ Nenuw ing chongjeer aangkheng vokhehpangna manghuwkhang tanuwre, ki ing nenuwchu manthang-reeh ningchuwka kachiinah, amachuve, Thangnang ing Misor lipah tanii mee aechu karpeehka aanuwting athachamah meechu ama-maangpa;

⁶ amanche entaksahrap ing emandenchu manjiichehmah aeka, entaksahrap empaarnii embathen vaarmee aechu Aafhuw ing iruungpak iniina vajeer tunii khaena ynthim sungnache ichen naemah ing phuwp aeka asiihpae.

⁷ Amavaangche Sodom vokhehkho Gomora amanache aveenna om khuwruungchu hava ae thohne entu enri aanghak ing naamak atuae vokhehkho reentaang hakchaang inuwzii ing isi aechu ichen naemah mi sungna ponti pha aeka akhaangteeh aechu amandeengnii khaena amandangva.

⁸ Havithoh aanghak ing havi vakhae i enuw enrumang isii inche hakchaang amanchohnah ae, amanche aatuaricheh aechu rumah ae, vokhehkho laarnii iruung ae ningna ichamah ing chongsae;

⁹ changvakonchu aaruungseh vaarmee Maikel ing Umlae thoh ynrumah aeka Mosi hakchaang khaena ner ing engaansanglae, ithipak ing ichong khaena ataklina vajeer tuniichu thona deenmahsa, changvakonchu Aafhuw ing atakchu ichah rasiing taka ariirpa.

¹⁰ Changvakonchu enuw inche emanghuwmah peehchae taklina ithipak ing ichong ae, vokhehkho barungriir ynthinmah sha ae vaangche, enuw ing nunu ing emanghuwsah ajaar inche enuwchu amamaangpae.

¹¹ Ening nache ijaniisapa! Akhaechuve enuw ing Ken lam sitahting sisae, ruthamen phanii khaena Bilijaam miraar tingche enuw taensae, amanche Kora chong enreehtah nache enuwchu amamaangpae.

¹² Havi vakhae ichuve ningsiih thaemin nensahnii chaap nache, nenuwthoh nensah nenginhak ibuwr ikah chupae, ynchik omru ing entaksahchu ynthahsah chupae; enuw i siiraang ing araencheh chii ynvaemah ruwrduh chupae, aanla omah, voniimeh ithiivasah, arajung ipha ing ymphervasah pharbuw tha berva thing chupae.

¹³ Enuw entaksah ningjakniichu chifhuw apor vaangkhe emanfhuwrchu chifhuw chii ithipak ing ynnoh khavatah; hunganseen vaanseen aesii chupae, enuw engkhaenache ithuwhpak ynthim yndupchu ichen naemah ing ynseehsa.

¹⁴ Adam laennii ing tuti avosariinii Inok ing hava mee ae khaenakho Thangnang tanii chong ariir, “Enruw, Thangnang tanii ynthiing ae lising lising thoh ynruw ing Aafhuw ing juwngsa.

¹⁵ Aangkhenglaang taklina vajeer tunii khaena, vokhehkho Thangnang yndenmah vakhae, Thang-nang mandenru ing entu enrichaap khaena, Thangnang yndenniimah nong vakhae, Thangnang yndenniimah lamting amangheh vokhehkho Thangnang yndenmah isii icher ae inche Aafhuw taklina ithipak ing ichong ae aangkheng miraar peehnii khaena Aafhuw ing jungthengsa.”

¹⁶ Hava mee ae i thaesii thaenam ichong ynsuwh naemah mee chupae. Enuw ing emandensah nache sinae, amanche engkanii phanii khaena meemae en aeka enerna ynding ing chongnae.

Ynriimnii chong re Iriirpeeh

¹⁷ Changvakonchu kaningsiih ae, inuw vakhae Aafhuw Jesu Khrista chongthang aeng mamaenna enriir-vasah chongchu nenuw ing eensiipeeh saruw,

¹⁸ “Achiphana enuw ing Thangnang yndenmah ichuwhmah ing ike ae inuwzii ing ynniisahnii hungom vaata ta aeka enuw ing neningna enriir vasahva.

¹⁹ Enuw ae chuve naamak atu mee, entu enrina lampana ong sha ae vaang om ae, laetha ynthiing aphamah meepae.”

²⁰ Changvakonchu kaningsiih ae, athiseh ing ynthiing nenthacha taklina nenuw ynseemsa nuwna vokhehkho laetha ynthiing ajaarnache thamsa nuwna,

²¹ ichen naemah iringnii khaena nenuw ing inuw Aafhuw Jesu Khrista aningchuwh nenghahsahrae, Thangnang ningsiih nache nentaksahchu yngahsaruw.

²² Vokhehkho barungriirna fhuwm ynvae achuw yngkheh mee taklinache neningchuwh mandangruw;

²³ hak-chaangna ikhaen peendiir churap ymbatir vaangkhe mee ae taklina ichiisuwh ing mukhang tanuwre, enuwchu mi sungtanii jekiae nuwna karsa aeruw.

Thangnang Alaar Isa

²⁴ Atiive khi mansiiniimah ing nenuwchu yngahpeeh, vokhehkho athiseh ing rotharoh nache ynraar omah ing Aafhuw alaar isa maanache nenuwchu ymmangiircheh,

²⁵ inuw Eekarpeeh Aafhuw yngkhehpang Thangnang ningnache Aafhuw Jesu Khrista ajaarna alaar isa, ynjasuwh, aacheh vokhehkho ruwrengchu atarae vokhehkho ichen naemah phanii ing om ynsuwhrasiing, Amen.