Yunusa 2 - Ala la kitabuenu Mɔgɔfin kuma tɔ

Yunusa la Ala mataraŋɛ

¹ Alatala ka yɛgɛ belebele lasanba a ni Yunusa kunun. Tele saba suu saba, wo bɛ Yunusa be toren yɛgɛ bue tɔ.

² Yunusa be yɛgɛ bue tɔ, a ka Alatala mataran, a be Ala min batula,

³ a ko: «N na ɲagankata butɔ, n ka ile Alatala mataran, i ka n jaabi. N be dinka tɔ, iko mɔgɔ fagareŋɛnu la gabure, n ka i kele n fabɛ koe la, i ka n kulɛ mɔɛ.

⁴ I ka n nafili ba tɔ, ka min fisa luggɛla, je sɛnbɛ ka n namilin; i la mɔrɔŋɛnu anun i la je bɛ tanbita n kunma.

⁵ Nde be a fɔla: I bata n bee i kɛnna, kɔnɔ n mɛn si naa i la batu bon saniyandeŋɛ tayen de.

⁶ Je bata n bita n jɔkɔlɛ tɔ, ji banba ka n namilin; ɲagamanu firifirita n kuŋɛ la miliŋɛ tɔ.

⁷ N bata jigi han kɔnkɛnu daŋɛ tɔ; n bata to fagabaganu tɛma, bondanu bata balan sabue la n kunma, anu te laka bitugun. Kɔnɔ ile Alatala, n na Ala, i ka n talayɛlɛ kɛ gabure tɔ n kende la.

⁸ N nɛ be bɔɔla n tɔ tɛmuɛ min tɔ nun, n ka ile Alatala la ko talɔn. N na mamataraŋɛ tagata han a keta i ma i batu bon saniyandeŋɛ tɔ.

⁹ Minnu be bakkuren kuyenu batu koe la, wonu bata i la ko kanunteya aɲɛ.

¹⁰ Kɔnɔ nde si sarika bɔɔ i ye, n si beete bɔɔ i tantu koe la. N ka lahirenu minnu jigan i ye n si anu lakamali. Alatala le be malakise mala!»

¹¹ Awa, Alatala kumata yɛgɛ ye; yɛgɛ ka Yunusa tɛsɛri kɛnɛ tɔ kisanna.