Gaaro ta Gaari ku Kiilenta 1 - Migaama

Beneyyiŋgee ku diiliti kitamniti

¹ Kitamne teete beneyya ma gaari maa ga Iisa Masi gaariyoo oko lawweetee Mellayi. Mella pa beneyyiyee oko Iisa gaa ga gaarayoogu oko lawweetee ku maa gu ibinɗiy gaari ma akka asa katta. Ay oko keeke appe, ga Iisa n̰aamiyya malaykatti oko lawwiti kee Yaaya ku maa ga gaariyyeegu gaari kooko.

² Gaa Yaaya kitipiyiyyoogu saa oko giimo gaari paracco maa ga elle o ga garay purta kadar gu ay beneyyiŋgeetee Mellayi o gu ay seene maa ga Iisa Masi gaare.

³ Baarikenta ay gimu ma garkayyay beneyyiŋgee kooko ma asaa min Mellayi! A giimi ma geeway o ma bakammay talta, kulla baarikenta, asan ga wikinne maa gu gaari kooko asiɗo katta paaɗe.

Yaaya salammay giimi ku gawaagargee ku paysara

⁴ Ay naa Yaaya ma ketepeyye ma ka salammico giimi ma temekka saananti Iisa Masi gawaagargee ku paysara ma aaye kiɗa ta Aazi: Ga Mella leetoŋ gidaanuwe o ga biraatoŋ aapiya, gata ma aaye haŋka o ga aaye omma min kilgiytí dunuuniti o ga akka asa. Gu Ruuhaŋgee ku paysara kulla leetoŋ gidaanuwe o gu biraatoŋ aapiya, guta ma aaye unti Mellayi wikirti ka uwwa ka darjanti maa ga nowoɗɗo.

⁵ A Iisa Masi kulla, ga leetoŋ gidaanuwe o ga biraatoŋ aapiya, gata ma ay suyuudine ka damannenta o ma naɗe omma min aacco giimi ku mattenta o ga ay tattuwco salaataŋgee paracco ku kiɗaati. Iisa keeke pa ƴekkane, o ga cimminee min zunubgeetine ma saɗikane ta baartee.

⁶ Gata leenee ke deeɗe gimtee ma hekemeyya ma gata, kee deeɗe aleŋ soƴoowee ku saɗikaŋgeyyo ma lobokkee oko Mella ma ay Tatti. Gi darjane o gudirane parattí dee ma gata diiman diiman! Amin.

⁷ Elloŋ! Gata asaa ma n̰irɗa! Giimi paracco aɗe akkiya ella ma iɗiico, ya ma wacciya kulla ellaa. Ballee paracco ku kiɗaati akka laatiya saananti. Keeke pa deewa goŋŋa ma tirta! Amin.

⁸ Gaa Mella Miltine beneyyiɗe gaa: «Naa ay Alpa o na ay Omega. Na aaye haŋka o na aaye omma min kilgiytí dunuuniti o na akka asa. Naata ay Miltí gudirane parattí.»

Yaaya ellaa Iisa aleŋ ma waano

⁹ Ay naa Yaaya ma ay sintoŋ, o ma kuŋ ke kappenta ma Iisa. Ay goŋŋa appe kee alɗo parattine aattí mulunniti Mellayi o gi diigantine alɗo kaƴi o parattine ke alɗo baatiynigee. Naa pa, gu baaminoo gu kaatikkikinoo were ma kadirenta ma ammi maa gu kolaa goo Patmos, asan na taasiya beneyti Mellayi o seene maa ga Iisa gaare.

¹⁰ Gaa meene kaƴi, meenti Miltine, gi Ruuhanti Mellayi beeriyyaw gi iyyinno. Naa giyyiɗe ur̰e taartu ma ay aleŋ geepu ma erecca ma raɗɗa

¹¹ gee: «Maa ki ella aɗe ki kitipiyya katkatti, kii n̰aamiyyooga oko giimi ma temekka saananti Iisa Masi ku gawaagargee ku paysara kotti: Epez o Ismirne o Pergam o Tiyatir o Sardee o Piladelpi o Lawdisee.»

¹² Maa na giyyicca ur̰e taata naa jigirɗe naa na elliyya gimu ma beneyyaw kaaka. Naa elliɗe lawwi paysara ku dahamni maa gu dowɗiy lampiŋgee.

¹³ Naa elliɗe ɗaɗɗakkico lawwi ku dahamni kotti aleŋ gimu ma esekke jallabiyye bolgita ma beree ya asintee, o ga onokke santir ka dahamni gurgumti,

¹⁴ o laawa ku kayaati purta tal aleŋ n̰iriye, o iɗiitee beree aleŋ okko ma zegee,

¹⁵ o biyaayitee ɓelaa aleŋ dahamne maa gu issiya okkati ga buruntulliti aggiɗe, o ur̰uuti heereyye aleŋ tarro ma bokaa,

¹⁶ o pitti ka tiyaawa ga bakamme kalli paysara, o seepane n̰ep n̰ep maa gu nussaŋgeeti serco tawwa okomma min biiti, o wigisanti ɓelaa ta wic wic aleŋ paato maa gii kuɗise.

¹⁷ Maa na elliyya pa, naa galɗe karap unti aleŋ maatenta. Gaa gagiyyawga pitti ka tiyaawa, gaa beneyyiyyaw gaa: «Addo ɓaya ɗa. Naa aaye min oko diilico lawwi paracco, namma ya dessiti.

¹⁸ Naa aaye ma hayaatantu. Na maate, ellu ƴa naa gewɗo diiman diiman, o na hekemeyyiya muucco giimo o oola.

¹⁹ Gaari maa ki ella kooko iŋee paracco ki kitipiyiy. Ku haŋka o ma akka asa kulla ki kitipiyiy.

²⁰ A kalli ku paysara kooko pa, maa na bakamme pittu ka tiyaawa o lawwi paysara ku dahamni maa gu dowɗiy lampiŋgee kooko, na aŋka na gaariyyamca seenico gaari kiilenta kooko. Kalli ku paysara ɗe garaa malaykatnigee maa ga Mella gagakkiyoo oko giimi ma temekka saanantu gawaagargee ku paysara, o lampiŋgee ku paysara kulla garaa giimi ma temekka saanantu gawaagargee ku paysara.»