Kabarre ta Daana maa ga Lik ketepeyye 1 - Migaama

Diilití kitipiyti Lik ma gaarti kabarre ta daana

¹ Giimi maani icce niyyane gu kitipiyɗiy gaartee Mellayi maa ga tattipe aattine.

² Guta pa jeppineegu saa tak aleŋ maa gu beneyyine gu giimi ma elle ma iɗiico min diiliti, guu deeɗe tasaaweetee beneyti Mellayi.

³ Ay kaaka appe ga naata pa kulla diyyicca balco gaari kooko ma deero, gii deeɗiyaw daanaw oko naa, na kitipiyiyyamgu ma butulco gaari kooko, oko kii Teyopil ka nabbisenta.

⁴ Keeke pa na leyya ku maa ki leeɗo kabarre kadar gi giraane maa ki gasse ay seene.

Taasití wiyawti Yaaya ma batasayya giimi

⁵ Oko wikinne maa ga Erod alɗo sultan kiɗa ta Yudee, ga lekka gimu kaƴi aɗe ma ay soƴoowa ka saɗikaŋgeyyo maa gu semeetee goo Zakariya. Gata pa ay min durgu kaƴi ka balti Abiya. Zakariya pa lekka daatte. Gita pa gu semeeti goo Elizabet, gii alɗo ta balti Harun.

⁶ Zakariya ma daatti tee Elizabet pa, ɗayaŋ serco unti Mellayi, o gu jobokkiy ta tirta teete hukumnigeetee Mella Miltine paracco, lekka ɗa ma gederra ga luumiyɗiy gaa gu jobokkiy ɗa.

⁷ Guu alɗo lekka ɗa miica asan gi Elizabet ay doola o serco gu deero paaɗe baabaŋgee.

⁸ Gaa meene kaƴi, maa gi kaabane ta sooƴiti saɗikaŋgeyyo asiyyee oko durgiti Zakariya, gaa Zakariya waciɗe ga lewɗiya lubbiti oko Mellayi.

⁹ Aleŋ ta aadanco tee aɗe maa gu soƴoowee ku saɗikaŋgeyyo lewɗo jollo jollo ku maa gu gassiyya gimu ma deeɗiya igga dokkanne ɗakko girti Mella Miltine, gaa durup galiyyee oko Zakariya. Ay ɗakko appe ga un̰n̰iɗe girti Mellayi, gaa kaatiɗe were ma duwenta oko Mellayi.

¹⁰ Oko wikinne maa ga egeɗɗiya dokkane kaaka pa, gu giimi ku maani paracco waraɗɗe doorane ta girti Mellayi gu enewɗo Mella.

¹¹ Gaa ɗakko iŋaakite ga malaykati Mella Miltine oomiyyee oko Zakariya ma nussane ka tiyaawati were ka iggiti dokkanni.

¹² Maa ga Zakariya elliyya malaykat pa, gi kelemti oome, gaa ɓayaw galiyyee.

¹³ Gaa malaykat kaaka beneyyiyyee gaa: «Addo ɓaya ɗa, Zakariya, asan ga Mella giyyica lollikicum. Daaccum tee Elizabet akkam wee miica, kii asiyyee oyya seme kii Yaaya.

¹⁴ Ki akka dee parhinenta ta kaw, o giimi maani akka parhina oko wiyawti,

¹⁵ asan ga akka dee gimu tatta unti Mella Miltine, o ga akka aar̰a ɗa bala gu mirmi ku mor̰mor̰oskeyyo o bala gu mirmi ma lekka muɗugu, o ga akka dee unenta ma Ruuhanti Mellayi min maa ga alɗo missa aattí yaati.

¹⁶ Gaa asiɗiy yooka Isirayelitnigee maani oko Mella Milco.

¹⁷ Gaa Mella asiyya n̰aama ƴa omma ma Ruuhanti o ma gudirane maa ga nabiinice Eliyas lekke. Gata pa akkiy taaca gayyee ma ronco o ga asawko giimi ma jobokka ɗa ka Mellayi gi mooyico deeɗo ɗayaŋ, guu joobiyya kee ka Mellayi. Gata akkiy hassila giimi ku maa gu joobiyya Milco.»

¹⁸ Gaa Zakariya beneyyiyyee oko malaykaddi gaa: «Na ebenna pe naa me, kadar ga beneycum keeke ay seene? Asan ni baabaŋguwee paaɗe ma daattu.»

¹⁹ Gata pa tiiliyee gaa: «Naata gu semeetaw goo Gabiriyel. Ay naa, ma waraɗɗa unti Mellayi. Haŋka pa, ga n̰aaminoo na asiyyam beneyya o na asiyyamca taasa kabarre ta daana teete.

²⁰ Gaa ki pa alɗe amanna ɗa oko beneyyiŋgeetaw ma akka asaa oko wikinnico maa ga Mella caaɗee. Kaaka pa, ga biicum ube, ki gederra ɗa payya ki beneyɗo ta kaw namma ya wikinne maa gu gaari kooko asiɗo asa butulco.»

²¹ Oko wikinne kaaka pa, gu giimi ma nowotte gu ocoɗɗiya, ajjabbe oko dummiti Zakariya aatti were ka girti Mellayi ma duwenta oko Mellayi ka.

²² Gaa maa ga oomiɗe pa, ga alɗo beneyya ɗa payya ta kaw, beneyya pe ma pittee ka. Gata gederra ɗa payya ga iyyiyya biiti. Guu giimi leeɗe kabarre kadar ga lekke maatiki aɗe maa ga elle aleŋ ma waano ɗakko aatti were ma duwenta oko Mellayi.

²³ Maa gu meenitee ka lubbiti Mellayi gaamiɗe, gaa yookiɗe giiri.

²⁴ Maa gu gaari kooko ƴiiliɗe, gii daatti tee Elizabet icciɗe aaɗi. Gaa koyye beeƴa gi alɗe ooma ɗa renta. Gii moyowɗo galbanti ka gee:

²⁵ «Mella Miltu aŋke ga cimmicca jaalo maa na lekka unco giimo, asan na waa ɗa. Keeke ay maa ga leyyaw.»

Taasití wiyawti Iisa

²⁶ Gaa oko kooyití Elizabet ma daa ta bizgiƴi maa gi alɗo ayyenta, ga Mella n̰aamiyya malaykat Gabiriyel geegar ka Nazaret ma aaye kiɗa ta Galilee,

²⁷ wikirtí gomosso kaƴi aɗe ma esee ɗa missa miiɗi maa gu semeeti goo Mariyam maa ga Yuusup ɓaaje. Yuusup pa ay ka balti sultan Dawud.

²⁸ Gaa malaykat deeɗica gassa, gaa beneyyitti gaa: «Iŋŋe, kante. Mella Miltine leete gidaanuwe o ga aaye ma kanta.»

²⁹ Guu beneyyiŋgeetee malaykaddi kotti rawriwicca ta tirta Mariyam. Gii moyowɗo galbantí ka gee: «Ayme ga salamɗino ma beneyyiŋgee aleŋ kooko?»

³⁰ Gaa malaykat beneyyitti gaa: «Addo ɓaya ɗa Mariyam, asan ga Mella gaariteega gidaanuwti.

³¹ Ka akka dee ayyenta, kaa asiɗo wee miica. Kaa asiyyee oyya seme ka Iisa.

³² Gaa asiɗo dee tatta unti Mellayi o unco giimo, guu giimi deeɗiya kolowwo goo Runti Mella ka Uwwa ta kaw o ga Mella Miltine akkiya gaga were ka mulunniti ka kakaati kee sultan ka tatta kee Dawud.

³³ Gaa asiɗiy hikimiya giimi ku balti Yakub diiman o gi mulunniti gakamma ɗa ta kaw.»

³⁴ Gii Mariyam tiiliyyee gee: «Gaari kooko deewa pe goo me asan na esee ɗa missa miiɗi?»

³⁵ Gaa tiilitti gaa: «Ruuhanti Mellayi akkite beera, gii gudiranti Mella ka Uwwa ta kaw taggitte ma kelemtí. Ay ɗakko appe ga miica kaaka maa ka akka wee alɗo duwenta ta kaw oko Mellayi o gu akkiya joora goo Runti Mellayi.

³⁶ Ellu ƴa! Haŋka, gi Elizabet kulla ma ay gimaate ocokke wiyaw ta miica ka metta ma baabaŋguwtí kaaka aɗe. Giimi goo gi ay doola. Gaa haŋka pa, gi lekkiɗo paaɗe koyyee bizgiƴi maa gi alɗo ayyenta,

³⁷ asan ga oko Mellayi ga lekka ɗa maatiki ma begerree.»

³⁸ Gii Mariyam beneyyiɗe gee: «Naa ay lubaakati Mella Miltine, ga deyyaw aleŋ maa ki beneyye.» Gaa malaykat cappitti, gaa kaatiɗe.

Mariyam kataa ellití Elizabet

³⁹ Maa gi Mariyam leeɗe meeni minnaw, gii waciɗe gi icciyya botol ma yokko, gii katawɗo geegar kaƴi aɗe ka kiɗa ta Yudee, were ma lekka dambabbi.

⁴⁰ Maa gi sarɗe, gii un̰n̰iɗe girti Zakariya, gii salammicca Elizabet.

⁴¹ Maa gi Elizabet giyyicca salammití Mariyam pa, ga miica ma aaye aattí wisse, gii Ruuhanti Mellayi unicca Elizabet,

⁴² gii beneyyiɗe ma raɗɗa gee: «Mella baarikite min daati paracco, o ga baarikiya kulla miica ma aaye aatte!

⁴³ Naa appe soo ay we pe namma gu gaari ku samaane kooko deeɗaw, gi yaati Miltu saa asiyyaw oko naa!

⁴⁴ Ellu ƴa, wikinne maa na giyyicca salammite, ga miica ka aattu wisse ma parhane.

⁴⁵ Kaŋ baarikenta, asan ka amanne kadar ga Mella temmeyya beneyti maa ga beneyyite!»

Mariyam logokkaa Mella

⁴⁶ Gii Mariyam beneyyiɗe gee: «Galbantu paratti logokka tattuwti Mella Miltu

⁴⁷ o gi unenta ma parhane, saananti Mella ma ay Najjaayatu,

⁴⁸ asan ga aŋke ga daaliyyaw maa ga ellinno naa lubaakati ka koyyenta. Min meente gu giimi ku wikinne paratti akkaw beneyya goo na baarikenta paaɗe,

⁴⁹ asan ga gata ma ay Miltí gudiranti leyyaw gaari ku samaane ta kaw. Gata kayti ka ay Mella.

⁵⁰ Oko giimi ma karmayya pa, ga kawayyayo wikinne paratti.

⁵¹ Gata pa gaarica gudiranti ma ammuwti ka tirta, o ga ticiliy maaƴi giimi maa gi mooyico esekkay koolipiti.

⁵² Gata berriy salaataŋgee min wereeriyeeco ku mulunniti, gaa gagiɗiy uwwa giimi ma cepelliy ɗa kayyeeco.

⁵³ Ku mayyeeta pa, ga biryoo tiyaw gu ayyiɗe guu ayaawee ga pittiɗiy ma picco ku orro.

⁵⁴ Gaa moogiɗiy giimi ku Isirayel, guta ma ay lubaakeetee. Gata pa ya haŋka kulla, ga rawatta ɗa ga kawayɗiyo.

⁵⁵ Ay keeke appe, ay maa ga beneyye gaa ga akkiyooga lee oko kookuweetine koo ini Biraayim ma ronco rontee ya diiman.»

⁵⁶ Maa gi Mariyam gaamiyya beneytí keeke, gii nuntiɗe ma Elizabet latta ka koyyee subba, gii yookiɗe giiri.

Wiyawti Yaaya ma batasayya giimi

⁵⁷ Wikinnití Elizabet kee ka wiyaawi aseero, gii weeɗe miica ka metta.

⁵⁸ Guu bakeeti o gímtí leeɗe kabarre kadar ga Mella Miltine leeti latta tatta ma garaa kadar ga elle ta tirta saamuwtí. Guu parhinɗe ma gita.

⁵⁹ Gii meene ma daa ta poppoɗi gu asiɗe ku maa gu asiyyee taharra oko miici. Guu aŋkiɗo gu oyyiyyee seme ku tatti ma goo Zakariya.

⁶⁰ Gii yaati pa gee: «Kaw, gata gu akkiya kolaa goo Yaaya!»

⁶¹ Guu tiilitti goo: «Lekka ɗa min oko gayyeete gimu maa gu semeetee goŋŋa!»

⁶² Mileŋ ga tatti ay duwiya missa pa, gu inniya ma picco ku maa gu ibinɗo baŋ ga aŋka ga oyyiyyee seme gaa me.

⁶³ Gata pa inne loohane ku maa ga kitipiyɗiy semeetee miici. Gaa kitipiyɗe gaa: «Semeetee goo Yaaya.» Gaa paracco gu ajjibiɗe.

⁶⁴ Gaa oko wikinnico kaaka saa, ga Zakariya ga biiti iyyiɗe ga beneyɗo. Gaa logoɗɗiya Mella ma raɗɗa.

⁶⁵ Gaa ɓayaw galiyyo oko bakeeco paracco, o oko giimi ku wereeriyee paracco, guu beneyɗiy gaari kooko paracco ma deero kiɗa ta Yudee were ma lekka dambabbi.

⁶⁶ Guu giimi paracco ma giyyiy gaari kooko moyowɗiy o gu reeway galbigeeco, o gu enaa aacco goo: «Miica keeke akka dee pe ini me miicata?» Gata keeke gi gudiranti Mellayi aaye ma seene ma gata.

Zakariya logokkaa Mella

⁶⁷ Gaa Zakariya tatti Yaaya deeɗe unenta ma Ruuhanti Mellayi. Gaa diiliɗe ga beneyɗo beneyyiŋgee ma asaa min Mellayi gaa:

⁶⁸ «Logokkineega Miltine, Mella ka Isirayel, asan ga ase moogico gimtee, ku maa gu gassiɗiy kayyeeco.

⁶⁹ Gata cimmine najjaya ma lekka gudirane, min aacco ronco rontee sultan Dawud, ma ay lubaakati.

⁷⁰ Keeke pa, ay maa ga beneyye min tippa ma nabiinigeetee.

⁷¹ Gata pa beneyyine gaa ga akkine najjiya min oko giimi ma aŋkine ɗa o min oko picco giimi ma ɗakattinee.

⁷² Ma kaaka pa, ga elle kulla saamuwco oko kookuweetine, o ga moyaaca liŋganti maa ga onne ma guta.

⁷³ A gata pa Mella timmiya beneyti kee maa ga halpayyiki oko kaakatine kee Biraayim ma gaa ga leeweneega.

⁷⁴ Gata pa gaa ga cemekkane min picco giimi ma aŋkine ɗa, ku maa ke aabidiyya bala ɓayaw,

⁷⁵ ku maa ke nuntiɗo salan̰ bala er̰n̰e unti, o ke deeɗo ɗayaŋ unti, meenitine parattí.

⁷⁶ A kii runtu pa gu akkum kolowwo goo nabiiniciti Mella ka Uwwa ta kaw, asan ki akka tan̰n̰a ƴa omma ki paniyyeegu bottoltee Miltine,

⁷⁷ o ki gaariyyooga oko gimtee kadar ga najjayyay ma saamiyo ta zunubgeeco.

⁷⁸ Mella kawayyeene ma kaawo. Gata akkineega paca were racal min uwwa, aleŋ paato ma ecekka,

⁷⁹ ku maa gi beeriyyo oko giimi ma aaye aatti namtuwwi were maa ga muutu ocoɗɗiy. Gaa kaatikkine ke tan̰n̰iɗo botol ka aapiyati.»

⁸⁰ Gaa miica maɗawɗo o ga dewɗo ka ta ƴiila niyyenta. Gaa deeɗo nunta wereeriyee ku goosigeyyo namma ya wikinne maa ga asiɗo gaara ziiti unco giimi ku Isirayel.