Epez 1 - Migaama

Salammiti Pol oko giimi ku geegar ka Epez

¹ Naa Pol, n̰amaakati Iisa Masi ma aŋkiti Mellayi, na ketepeyyatoŋca maktup teete oko kuŋ, gimtee Mellayi ma nowotte geegar ka Epez, kuŋ ma dowwiy galbigeetoŋ oko Iisa Masi.

² Ga Mella Tattine o Miltine kee Iisa Masi leetoŋ gidaanuwe o gu biraatoŋ aapiya.

Pol logokkaa Mella oko gidaanuwti

³ Logokkineega Mella, gata ma ay Tatti Miltine kee Iisa Masi. Gata pa baarikinee, ma baariko parattí tee ta uwwa samaani ma Ruuhanti Mellayi, asan ke kappenta ma Masi.

⁴ Mileŋ ke kappenta ma Masi pa, ga apirnee omma min maa ga alɗica kelgeyya ɗa missa dunuune ku maa ke deeɗo salan̰ bala er̰n̰e unti. Ma ƴekkiti pa,

⁵ ga Mella lekkica saa min omma niyyane ku maa ga leeɗine rontee ma muutti Iisa Masi. Keeke pa ga aŋke ga leeɗiya asan ga daanee,

⁶ ku maa ke logiyya tattuwe ka gidaanuwti maa ga birne ga uninne asan ke kappenta ma Runti kee Iisa Masi, gata maa ga ƴekkaa ta kaw.

⁷ Mileŋ ke kappenta ma gata pa, ga ay ma baartee ga cimminee min zunubgeetine o ga saamiyineegu nigaakitine. Ay goŋŋa appe ga Mella gaarineega maantuwe kee ka gidaanuwti.

⁸ Gata pa birneega maani gidaanuwti, ma ibino ta gaaro o ma iyyo ta kayaati ku maa ke ibinɗiy gaartee paracco maa ga aŋka ga gaarinneegu.

⁹ Ma goŋŋa pa, ga aŋka ke ibinicca seene ta kiilenta min tippa, tee ta latta ma daanee maa ga aŋka ga leeɗiya. Gaa icciɗe niyyane ga leeɗiya ma Masi.

¹⁰ Keeke pa, ga Mella akkiya tattipa, gaa wikinne maa ga caaɗe aseero. Latta maa ga aŋka ga leeɗiya pa, ay ga tappiɗiy lawwi paracco ma aaye samaani o ma aaye kiɗaati, gaa Masi deeɗo tattuwco.

¹¹ A gata pa, mileŋ ni kappenta ma Masi, ga ni kulla gassicca haggantini maa ga aŋka ga birinniica. Niita pa, ga Mella leewinii min omma, oko latta keeke maa ga aŋka ga leeɗiya. Mella pa, leeway saa lawwi paracco tak aleŋ maa ga aŋka ga leeɗiy.

¹² A gata pa, Mella leewinii min omma ku maa ni logicca darjanti, ga nii ma dowwiy paaɗe galbigeetini oko Masi.

¹³ A kunta pa kulla, giyyiya paaɗe beneyyi ka seene, gata ma ay kabarre ta daana ma garaatoŋ kadar ga Iisa Masi najjayyatoŋ. Ay oko gata appe ku amanɗe. Gaa Mella gaariɗe kadar ku ay kuntee ma Ruuhanti maa ga beneyye gaa ga bereeneeca.

¹⁴ Ruuhanti taata pa, acaane ku maa ke leeɗo kabarre kadar ga akkineeca bira haggantine wikinne maa ga Mella asinne cimma min oko gaari paracco ku miɗɗa. Kaaka pa, ke logokkineeca darjanti Mellayi!

Pol enaa Mella oko giimi ku Epez

¹⁵ Na giyyikiti amannitoŋ oko Miltine kee Iisa o ƴekkitoŋ maa ku lekka oko gimtee Mellayi. Ay ɗakko appe,

¹⁶ na lewɗee diiman barkinti oko Mellayi maa na enaa oko kuŋ.

¹⁷ Haŋka pa, ga Mella Milti Miltine kee Iisa Masi, gata ma ay Tattine o ga ay Miltí darjanti, biraatoŋca Ruuhanti. Ruuhanti pa, beraatoŋ ibino ta gaaro o gi garaatoŋga latta paratti ku maa ku ibiniyya ta tirta teete Mella.

¹⁸ Na enaa kulla Mella maa ga iyyittoŋgu kayyeetoŋ ku maa ku ibiniyya, baŋ ga oko ka samaane ŋawwa ga kolowɗitoŋ o maa ku ocokke, o na enaa maa ku ibiniyya kulla maanuwco o samanco oko lawwi maa ga dowwitoŋ oko kuŋ o ma gimtee paracco.

¹⁹ Na enaa kulla Mella, ku maa ku ibinicca gudiranti ma kakee maa ga lubbikiti oko kee ma dowwiy galbigeetine oko gata. Ay ma gudirane gita ka,

²⁰ ga Mella cipiliyya Masi min muuti, gaa nuntiyya tiyaawati uwwa samaani.

²¹ Were kaaka pa, ga Iisa aaye kayaaco malaykatnigeyyo ma taattuweeco, o awaaradgee ma sawaataŋgee, guta paracco ma lekka gudirane, ga ƴiilay. Gata pa, caŋ gu giimi dee ini we kulla ga aaye kayaaco. Gata aaye ɗa kayyeeco oko lawwi paracco ku dunuune teete ka, innasoo, ga aaye kayyeeco oko ku dunuune ma akka asa kulla.

²² Mella pa, gagiya Masi tattuwti dunuune parattí, o ga duwiya kayaaco giimi ma temekka saananti.

²³ Guta pa ay ziiti, o gu unenta ta tirta teete ma Ruuhanti. Gata pa, unenta saa ma Ruuhanti Mellayi.