Lubaakico N̰amaakeetee Iisa Masi 1 - Migaama

Diilití kitamniti

¹ Teyopil ka nabbisenta, Oko kitipiytu ta omma, na kitipiyamgu gaari paracco maa ga Iisa leelo o maa ga gaariyoo oko giimo min diiliti lubbiti,

² namma ya wikinne maa ga Mella icciyya samaani. Maa ga alɗe kalappa ɗa missa pa, ga apire giimi gu deeɗo n̰amaakeetee. Gaa beneyyiyyoogu gaari maa gu dekka leewo. Gata pa gaariyooga keeke ma gudirane ta Ruuhanti Mellayi.

³ Gaa maa ga maatiɗe, gaa naɗiɗe, gaa oomiyyoo oko n̰amaakeetee. Gaa aacco meeni ku orooruwee pooɗi ga okomɗiyo, gaa garawɗiyo kadar ga ay ma ta tirta ga geewa. Gaa beneyyiyyoo ma garrarri ku mulunniti Mellayi.

N̰amaakeetee Iisa ocokkaca Ruuhanti Mellayi

⁴ Gaa meene kaƴi maa gu temeɗɗe gu tewɗo, ga beneyyiyoo gaa: «Aɗoŋ tacila ɗa, nuntoŋ iŋee aɗe geegar ka Zerizalem ku uciyya ƴa omma latta maa ga Mella Baaba beneyye gaa ga beraatoŋga. Keeke pa na beneyyitoŋga aɗe min omma.

⁵ Yaaya ɗe batisiyiy giimi ma ammi, kuŋ soopa gu marakkitoŋ pe meeni paalta ka, kuu deeɗo batisiyenta ma Ruuhanti Mellayi.»

Iisa kalappa samaani

⁶ Guu n̰amaakeetee Iisa kotti ma aaye ma gata inniyya goo: «Miltini, ay haŋka appe ki beraayooca payya mulunne oko giimi ku Isirayel e?»

⁷ Gaa gata pa tiiliyyoo gaa: «Ay Tattu ka ma gudiranti ma aparriya wikinne kaaka. Kuŋ gi temekkitoŋ ɗa payya ma wikinne maa gu gaari kotti asiɗo asa.

⁸ Innasoopa, ku gasakka gudirane wikinne maa gii Ruuhanti Mellayi asitoŋ beera, kuu asiɗo beneyya ma gaartaw maa ku elle o maa ku giyye geegar ka Zerizalem, o kiɗaayee ku Yudee o ku Samaari o oko dunuune parattí.»

⁹ Gaa maa ga gaamiyya beneyti keeke, gaa Mella cipiliyya samaani. Guta pa paracco ellaa namma gi n̰irɗe coogiyya, gu alɗiya ella ɗa payya.

¹⁰ Gaa wikinne maa ga Iisa kalapɗo o guta cokolla missa ta uwwa, gaa kaytiŋ ka gu miɗi seera ma esekke kaɗiŋgee purta tal oomiyyoo saripco.

¹¹ Guu beneyyiyyoo goo: «Kuŋ giimi ku kiɗa ta Galilee, ayme ku waraɗɗe missa ku cokolɗo samaani? Iisa keeke maa ga Mella icce min untoŋ ga kaatikkiki samaani akka yooka aleŋ teete aɗe maa ku elelɗiya gaa kataa.»

¹² Guu n̰amaakeetee beeriɗe min dambu ka olibiyeyyi gu katawɗo ta Zerizalem. Dambu kaaka pa aaye katta ka Zerizalem. Deewa latta ka kilometir kaƴi.

¹³ Maa gu sarɗe Zerizalem, guu deeɗe kalpa gu un̰n̰iɗe aatti ger maa gu gekee kayaati giiti. Ger kaaka pa, ay wikirco aɗe maa gu ƴekkiɗo timmo min heeta. Guta pa ay ini Piyer o Yaaya o Zak o Andire o Pilip o Toma o Bartelemi o Matiye o Zak runti Alpee o Simo ma deyekka gu guta ma ay Yawudigee hikimiyicca kiɗaaco o Yud runti Zak.

¹⁴ Paracco ma ini Mariyam yaati Iisa o daati daare, o seneetee Iisa, enaa Mella kulla meene ma galbane kaƴi ka.

Magawti Yudas ma Matiyas

¹⁵ Gaa meene kaƴi maa gu giimi ma dowwiy galbigeeco oko Iisa temeɗɗe latta ka orooruwee orro o seera, ga Piyer waciɗe, gaa beneyyiyyoo gaa:

¹⁶ «Seneeta, maa gi Ruuhanti Mellayi beneyye aattí Kitamniti pa illa ga akka asa butulti. Ma biiti sultan Dawud gi Ruuhanti Mellayi beneyye min omma ma gaartee Yudas. Yudas pa, ay gata appe ma ommikoo giimi ma deyya baama Iisa.

¹⁷ Gata ay giitini aɗe maa ni loboɗɗe sawa oko Iisa.

¹⁸ Gaa ma gurus maa gu biryee ka miɗɗati maa ga leelo, ga giɗiɗe gaan. Gaa galɗe ma ta aatti. Gaa aatti peetiɗe, guu aatte oomiɗe paracco gu suubiɗe, gaa maatiɗe.

¹⁹ Guu giimi ku Zerizalem maani giyyikkiki keeke. Guu oyyiyee seme oko gaan kaaka goo Akeldama. Akeldama pa ma beneyco giimi kotti goo ‘gaan ka baaro’.

²⁰ Sultan Dawud pa ketepeyyiy min tippa gaartee Yudas aattí Kitamne tee ta Soomnigeyyo gaa: “Ga girti nuntu aƴinta, ga gimu aɗe nunta ɗa ta kaw”, o ga ketepeyye kulla gaa: “Ga kaƴi asiya maga oko lubbiti.”

^21-22 Ay ɗakko appe, ni aŋkiɗo gimu kaƴi ma akka timma ma niita. Gimu kaaka pa deewa suyuudine oko naɗawti Miltine kee Iisa, o aŋka ga deeɗo min oko giimi ma aayini wikinne paratti maa ga Miltine kee Iisa tan̰n̰iɗe ma niita, min wikinne maa ga Yaaya batisiyiyya namma ya icciti min aattini ga kaatiɗe samaani.»

²³ Maa gu giyyiyya beneyti Piyer keeke, guu cimmiɗe miɗi seera. Ka kaƴi ƴa gu semeetee goo Yuusup, o goo Barsabas, o gu kolaa kulla goo Yustus. Ka kaƴi pa gu semeetee goo Matiyas.

²⁴ Guu inniɗe paracco Mella goo: «Miltini, kii ma ibinya ka galbigeeco giimi paracco, gaarani kaƴi maa ki aparre min oko giimi ku seera kooko,

²⁵ ga deeɗo n̰amaakacum gaddanti Yudas, gata ma cappiyee oko lubbiti ka n̰amaakeyyo, gaa kaatiɗe oko were ma ay kanti.»

²⁶ Gaa kaƴi min oko n̰amaakeyyo icciɗe goskoƴi seera, maa ga ketepeyyiyoo semeeco giimi ku seera kotti. Gaa durup galiyyee oko Matiyas. Ay goŋŋa appe ga ɗoociɗiy n̰amaakeetee Iisa ku orro o kaƴi gu deeɗe orro o seera.