Romans 1 - Muklom

Taphang raaq

¹ Jesu Khristo sanga etho apostle ang rangma halta etho Shkewa tungtang qhal phanchan ma taltey Paul chingko wang.

² Tungtang qhal shey jakho wang hun urangsamal tang nun o asang likwit na rangtum ta.

³ Tungkang qhal sha Umiqwasa tung aa raaq. Piq sha mingkang na David phi aa lí ang eq changta.

⁴ Etho Asang Tsija tarong o utik wang weyjey tungkang o piq sha Shkewa Miqwasa ta takhi ta. Piq sha hiqtang Teyhungwa Jesu Khristo.

⁵ Piq tungkang o hiqtang aa ráng manchan nia apostle jaksom kapti, irimal ang eq piq miing rangma thaji phan ajat miqtang han ching etho piq raaq tat ching.

⁶ Eshi tang shiwang nim tho atha, bara Jesu Khristo rang ang rangma hal taphin.

⁷ Rome na tongtey nim thaji rangma nga wit ang, barima Shkewa tinma aa etho u asang miqtang ang rangma halta. Hiqtang Shkewa etho Teyhungwa Jesu Khristo ching kowang ráng manchan nia nungmay nim aa cham kap inn.

Rome náng katma tathin

⁸ Jakho nga nim thaji rangma Jesu Khristo tungkang o i Shkewa ma kechu ajong ko ang, chammatakoi nim kam tung aa raaq sha thaji mingkang na wantit aa.

⁹ Nga nim chammal eq tasik phang, eshima Shkewa sha i miikkhi kottey, Umiqsawa tungtang qhal phanchan ma nga itin thaji ko eq jaksom somlot ang.

¹⁰ Chammal eq tho thanga nim rel náng katma Shkewa mongtham o lam lak rangma, nga baluk o romtam chu ang, nim tasik eq chu ang.

¹¹ Chammatakoi nim sha tharong ma Tsija sunmaan kot rangma nim jamoq tachong ma nga rapney nuk ang.

¹² Nga iri rangma bat phang, nga nim jamoq ang eq, nim kam tungkang o etho nim aa i kam tungkang o tintharong kap nin.

¹³ I no ni pho tang, nga nim jamnáng katma jukwet tathin táng ta nim aa sam rangma nga nuk ang, etharin chamlilang tungkang o nga kap kapha mong ang taphang. Chamal nga adak Gentile tang jaktung na jaksom somlo eq ukam eq ma kaley táng, eshimal hun nim jaktung na somlot ma tho unuk ang táng.

¹⁴ Greek miqtang nia Greek ang moq tang etho asam atol tang nia asam atol ang moq tang ning thaji ma nga tungtang qhal phanchan ching ta nga tathin ang.

¹⁵ Eshirangma nga nim ma tho bara Rome na tong inn, tungtang qhal phanchan ma rapney ram eq kacha ang.

Tungtang qhal tarong

¹⁶ Nga tungtang qhal ma rakri mong, chammatakoi esha kamtey tang thaji rangma, phang Jehudi tang ma eshi jio Gentile tang ma, lunwan kap rangma Shkewa tarong.

¹⁷ Chammatakoi tungtang qhal sha Shkewa asing sha takhi aa, iri asing raa phang wang tha uthun náng thula kam wang kap aa; asang likwit na thawit thimal, “Asing miq sha kam wang tong na.”

Ngarey miqtang ma Shkewa ahan tinkhat

¹⁸ Bari miqtang eq asing sha ning anaan wang taput shing aa, Shkewa ahan tinkhat tha eshi miqtang thaji ngarey nia anaan sho mungtan wang takhi aa.

¹⁹ Shkewa tung aa raaq ning aa usam eq aa chammatakoi Shkewa ning ma esha takhi aa.

²⁰ Mingkang phanghun rangham wang Shkewa pattuk tarong nia asang dangjang sha bara khi moq, piq aa chamlang hunta shiwang esha jaqhal eq takhi ang aa, irimal ang eq Shkewa sha sam moq ta miqtang jin raaq moq.

²¹ Ning aa Shkewa tha sam eq tho piq ma rangka kot moq etho kechu ajong kot moq, etharin ning tinthin sha shiti ta etho ning thung atal sha anak wang shey tita.

²² Ning aa ning ni ning sha asam atol ta bat aa, etharin ning sha athom.

²³ Ti moq phan Shkewa sha shumnuk hunga, ning aa utik phan miqna etho wo etho jatngam etho jongbal tang shila sha shumnuk aa.

²⁴ Eshi tungkang o Shkewa ning mongtham mal anaan rangma shing chakta etho ning aa ning hanphung o ning jaktung na rakri jaksom somlo aa.

²⁵ Ning aa Shkewa asing tha alik ma kaley aa etho Shkewa sha shumnuk hunga, piq aa hunta phan sha ning aa shumnuk aa etho nong aa; Shkewa sha pattuk rangma rangka ching! Amen.

²⁶ Eshirangma Shkewa ning tha anaan etho rakri tinthin o shing chakta; ning miqnu tang tho miqwa tang jamoq ang moq ang eq adak miqnu tang jamoq rum jeep aa.

²⁷ Eshimal hun miqwa tang tho miqnu tang jamoq ang moq ang eq adak miqwa tang jamoq rum jeep aa. Miqwa tang adak miqwa tang jamoq rakri jaksom somlo ta etho iri tungkang o ning aja somlot rangma chamlang tsamnang kap ching sha ukap eq ta.

²⁸ Ning aa Shkewa sha sam ching ang moq ta tathin tungkang o Shkewa ning tha alik tathin rangma shing chakta, irimal ang eq ning aa somlot ching ang moq jaksom sha cham somlo aa.

²⁹ Ning thaji alik, anan, angim, etho dandey eq shey ti aa; ngiljo etho tatik etho thamol etho udip etho aja eq shey ti aa. Ning aa miqdak tung aa raaq alik bat aa,

³⁰ etho aja raaq bat aa. Ning sha Shkewa miiksuk tey, japjotey, tinqhat tey etho tharangkatey. Ning sha anaan jaksom rangma anal lam takhongtey etho ning sha nu nia wa raaq tat moqtey tang.

³¹ Ning sha thung ahungtey etho ning raaq mal somlo moqtey, tinmat nia tinnin takhi moq tey.

³² Irimal jaksomtey sha utik ang ching ta Shkewa asing thong aley sha ning aa sam eq aa. Irimal sam eq tho ning aa esha hun somlo chey roq eq aa etho irimal somtey adak miqtang ma tho tintharong bat aa.