Mark 3 - Muklom

Jakmàng washey

¹ Jesu Synagogue náng wey ka atho ethina washey jakmàng angta.

² Jesu aa jashit jaksom somlo aa ta phung ma, ban siintey miqtang daqhan eshina angta; req ning they Jesu aa jakmàng wa ri Sabbath saal o taqhal na bo ta ban siinta.

³ Jesu aa ethi wa thima batta, “Jakho konáng kaphu.”

⁴ Etho Jesu aa miqtang thima pitta, “Hiqtang thong eq Sabbath saal o chamlang jaksom jin tasomlo phi ni? Aqhal som ching tia tashit eq ching aa? Miq rollung shi thalun eq ching tia tathom eq ching aa?” Etharin utang tho raaq shey tho raaq moq angta.

⁵ Jesu aa miqtang tha siin eq ukhat angta etho ning tha siin eq tin tho ushit angta, chammatakoi ning sha rapney aja nia tinchey angta. Ethi jio Jesu aa ethi miq thima batta, “Bajak ni tatchal u.” Ethi miq they ujak tha tatchal atho ujak tha qhalta.

⁶ Ethi jio Phorisi tang eq synagogue wang thalat eq Herod miqtang jamoq tachong eq Jesu tha tatik ma raaq phung ta.

Shitim kang na miq waan

⁷ Jesu nia ujiphantey tang Galilee shitim konáng kata, etho ning ji tha daqhan miqtang eq phanta. Galilee wang, Judea wang,

⁸ Jerusalem wang, Idumea wang, Jordan jungku saalnop kowang, Tyre nia Sidon ajong samhaq kingkang wang ning thuta. Jesu aa chamlang somlo ta ethi tang tha tat eq ning thaji thuta.

⁹ Miqtang daqhan thajoq tungkang o, Jesu aa miq waan tachip nak aa ta ujiphantey tang ma ashey waqwan kacha shing ma batta.

¹⁰ Piq aa daqhan miqtang takasa taqhal kota, req thaji atak miqtang they Jesu hanphung o tatit ma tathum jangta.

¹¹ Etho ning khom na anaan tsija tang they Jesu tha khi atho, piq jakho o wol eq jajong aa ring ta, “Nang raa Shkewa Miqwasa!”

¹² Jesu aa anaan tsija tang ma raaqkhat batta, “Nga utang aa ta utang ma tho nak bat u.”

Jesu aa wasi wani apostle tang tal aa

¹³ Ethi jio, Jesu haqkan náng wang eq piq ma utang aa ethi miqtang tha halta. Ning piq jamnáng wangta,

¹⁴ etho piq aa asi ani miqtang tha talta etho ning tha Apostle ta shing ta. Piq aa ning ma batta. “Nga nim raa ijamoq rum ma etho phanchan kot kat ma talta phang,

¹⁵ etho thangwa tang phan ma nim ma authority atha angna.”

¹⁶ Ethi asi ani apostle miqtang tha ira: Simon (Jesu aa umiing tha Peter ta shingta)

¹⁷ Zebedee sa wani James nia uno John (Jesu aa ningni miing tha Boanerges ta shingta, ta “Rangmok miq”)

¹⁸ Andrew, Philip, Bartholomew, Matthew, Thomas, Alphaeus sa James, Thaddaeus, patriot Simon,

¹⁹ Etho Jesu thalottey tha Judas Iscariot.

Jesu nia Beelzebul

²⁰ Ethi jio Jesu himnáng thuta. Etho daqhan miqtang tha thajoq thu atho Jesu nia ujiphantey tang they til phaksat ma tho rangham kap moq angta.

²¹ Baluk o uhimtey tang eq Jesu himnáng thuta ta tat atho, ning aa piq tha sol ma thuta chammatakoi miq wanta, “Piq uro ang aa!”

²² Etho thong tataltey tang Jerusalem wang thu eq batta, “Piq khom ro Beelzebul, bara thangwa tang thaji phey náng eq ajong! Etho piq aa hun Jesu ma thangwa tang phan ma tarong ko aa.”

²³ Jesu aa ning tha urel náng hal eq raaqshiton bat kota: “Thangwa eq chamal eq thangwa sha jin phan eq na i?

²⁴ Bari mung na ning ni ning taphal eq thamol hit aa, eshi mung sha dipmat angna.

²⁵ Etho himshey tey sha ning ni ning taphal eq thamol hit ajo eshi him sha dipmat angna.

²⁶ Ethi rangma Thangwa sha taphal eq thamol hit ajo alo tongmoq angna, esha dipmat hun angna.”

²⁷ “Tarong miqhim sho utang atho hut jin hutmoq angna. Jakho iri miq raa rang khak eq na ethi jio hun uhim wang hut jin hut eq na.

²⁸ Nga nim ma asing batphang, miq eq chamtan ngarey jaksom lot somlo ajo tho etho chamtan jashit raaq ajo tho, ning sha jin tolchak eq na.

²⁹ Etharin bari miq eq Asang Tsija sha dan eq jashit raaq ajo piq sha baluk otho tolchak moq angna chammatakoi piq aa pattuk ngarey somlo ta.”

³⁰ Jesu aa ira batta chammatakoi aral eq bat chey ta, “Piq khom na anaan tsija atha.”

Jesu nu nia notang

³¹ Ethi jio Jesu nu nia no tang thuta. Ning aa himthal na ban eq Jesu tha tahal wang ta.

³² Jesu relna daqhan miqtang tong ta, etho ning aa piq ma batta, “Siin u, ba nu nia no tang ba jamoq tachong ma himthal na ban aa.”

³³ Jesu aa thawel batta, “Utang inu aa? Utang ino nia pho tang aa?”

³⁴ Etho piq jamna tongtey tang ching konáng siin eq batta, “Siin inn! Inu, ino nia pho tang iri tang raa!

³⁵ Utang eq Shkewa tinuk mal somlo aa, ning raa inu, etho ino nia pho tang.”