Mark 1 - Muklom

John jung thalamtey phanchan

¹ Ira Shkewa Miqwasa Jesu Khristo tungtang qhal.

² Rangsamal Isaiah chamlang witta, ethi wang iri thaji raa phang angta, “Ba lam sha tasang rangma ba jakho o ithoksil tattey sha nga takat phanáng.

³ ‘Shushu haqna chamtey tey ring aa, Teyhungwa ma lam kacha inn, etho piq qhing ma lam shi tachal shing inn!’”

⁴ Ethi rangma John shushu haq náng thu eq jungthalam ta etho miqtang ma Shkewa raaq phanchan kota. Piq aa miqtang ma batta, “Ngarey wang wel inn etho junglam inn, etho Shkewa nim ngarey sha tolchak na.”

⁵ John raaq tatma thaji Judea mung wang etho Jerusalem samhaq wang miqtang thuta. Ning ngarey tha wungbat ta etho John aa ning ma Jordan jungku o jungthalam kota.

⁶ John aa utt haankhup wang hunta khat sha nángta etho ashey ngamkhup khingkit sha piq aa khing o kitta, etho piq aa kokchikrik nia naqti ling phaksat eq tong ta.

⁷ Piq aa miqtang ma phanchan kota, “I jio ashey miq kapha na, piq i phey náng eq tho rapney ajong. Nga bon eq ujaaqhong ru qhangkot rol tho ang mong.

⁸ Nga nim ma jung wang jungthalam phang, etharin piq aa nim ma Asang Tsija wang jungthalam phanin.”

Jesu junglam nia tari

⁹ Ethi tok tho, Jesu aa Nazareth wang Galilee mung náng thu eq Jordan jungku o John wang jungthalam ta.

¹⁰ Jesu jung wang thalat kam tho, piq aa mungtan sha thalak aa tha khita etho wotopin mal ang eq Tsija uhanphung náng kapha tha khita.

¹¹ Etho mungtan wang ashey raaq kap tat ta, “Nang raa itinmat i Miqwasa. Nang ma nga rapney sungrang ang.”

¹² Kalo ethiwang Tsija they piq tha shushu haq náng solkat ta.

¹³ Etho eshina piq saal rokbali tong ta, etho Thangwa eq piq tha tari ta. Ethina jatngam tang tho atha angta, etho rangkamwa tang ka eq piq tha rimrang ta.

Jesu aa wabali ngaqsa lottey tha hal aa

¹⁴ John tha chuk náng solkat jio, Jesu Galilee náng ka eq Shkewa tungtang aqhal tha phanchan ta.

¹⁵ Piq aa batta, “Rangham tha uthok sey angta pha, etho Shkewa mungtan rapney arel halna sey! Ngarey wang wel inn etho tungtang aqhal raaq ri kam inn!”

¹⁶ Galilee shitim kang na kachey atho Jesu aa Simon nia uno Andrew tha khita; ningni tha ngaqasa lottey angta etho ning ni aa chak halchey ta.

¹⁷ Jesu aa ning ni ma batta, “Nim ni ijamnáng ka shin phin, etho nga nim ni ma miq lot ma tatal kot phang náng.”

¹⁸ Kalo ning ni aa chak tha shingchak eq Jesu ji phanta.

¹⁹ Anitom jakho náng ka eq piq aa sapho wani tha khita, ningni tha Zebedee sa James nia John angta. Ning ni tha waqwan na tong eq chak tha taqhal chey ta.

²⁰ Jesu aa ningni tha khi eq kalo halta; etho ningni aa uwa Zebedee tha adak nginma langtey miqtang jamoq waqwan na shingchak eq Jesu ji phanta.

Anaan Tsija noptey ashey miq

²¹ Jesu nia ujiphantey tang Capernaum samhaq náng kata. Inap mal tha Sabbath saal angta etho Jesu Synagogue náng ka eq phang tatal ta.

²² Miqtang eq uraaq tha tat eq rapney patja ta, chammatakoi piq aa thong tataltey tang mal bat moq angta; piq aa authority wang tatal eq batta.

²³ Synagogue na ashey miq hanphung na anaan tsija angta; ethi kam tho piq rapney jajong aa ring eq batta,

²⁴ “Nazareth wang Jesu, nang ma í ching wang chamlang ràa? Í raa tathun rangma thuta phu i? Nang utang aa ta nga usam eq phang; nang Shkewa Asang Miq!”

²⁵ Jesu aa ethi tsija thima mol eq batta, “Shu shu eq piq hanphung wang thalat chuwang u!”

²⁶ Anaan tsija eq ethi miq tha rapney jajong aa thamot eq, ring eq thalat chuwang ta.

²⁷ Ethina tongtey miqtang eq esha siin eq rapney patja eq ashey eq ashey ma rong batta, “Iri chamlang aa? Iri anal tatal i? Piq aa authority wang anaan tsija ma tho raaqkhat kot eq aa etho anaan tsija tang eq uraaqkhat utat eq aa!”

²⁸ Etho irimal wang kalo hun Galilee mungna thaji miqtang aa Jesu tung aa raaq tha sam ta.

Jesu aa daqhan atak miqtang tha taqhal aa

²⁹ Ning aa Synagogue tha shingchak eq, ujiphantey tang James nia John jamoq, Simon nia Andrew him náng kata.

³⁰ Simon nicha tha kho mok eq jibching na wol chey ta; Jesu thu atho unicha takasa raaq tha piq ma bat kota.

³¹ Jesu urel náng ka eq ujak eq piq tha tun tashat ta. Piq khomok tha uqhal sey angta etho piq aa ning thaji rangma phaksat limtik kota.

³² Rangja sey ang atho, miqtang aa Jesu relnáng atakasa miqtang etho thangwa eq lo aa miqtang tha thoksol ta.

³³ Ethi samhaq wang thaji miqtang tha ethi him rel thina thajoq ta.

³⁴ Etho Jesu aa uphan phan atakasa wang tsamnang aa thaji miqtang tha taqhal ta etho thangwa eq lo aa thaji miqtang wang esha phanta. Thangwa tang tha uraaq angma komoq angta chammatakoi Jesu utang aa ta ning aa usam eq ta.

Jesu aa Galilee na phanchan aa

³⁵ Rangnapkha tho Jesu kalo shat eq ethi him wang thalat eq, samhaq phey wang ashey shu shu haq náng ka eq romtam chuta.

³⁶ Etharin Simon etho unokwa tang ka eq piq tha bita,

³⁷ etho piq tha kap chong atho, ning aa batta, “Thaji miqtang eq nang bi aa.”

³⁸ Etho Jesu aa ningni thima batta, “Hiqtang haq rel qhim náng tho ukat ang ching. Nga ka eq ning ma tho phanchan eq náng, chammatakoi iri rangma hun nga thuta phang.”

³⁹ Req piq thaji Galilee mung náng ka eq Synagogue tang na phanchan ta etho thangwa tang tha phan ta.

Jesu aa ashey angam apit takasa miq tha taqhal aa

⁴⁰ Ashey angam apit taksa teywa Jesu relnáng ka eq, langku o tong eq tinthanin eq batta, “Nang unuk ang ujo, nang aa itak raa jin taqhal eq phanu.”

⁴¹ Jesu aa piq thima rapney tinshit ta, etho ujak tha thalo eq piq tha thaklo eq batta, “Nga unuk ang, usang ang u!”

⁴² Takshey lam o ethi miq angam apit tak tha uqhal sey angta etho usang sey angta.

⁴³ Ethi miq thima piq aa rangtatun eq kalo takat ta,

⁴⁴ “Tat u, iro chamlang angta utang ma tho nakbat u. Achal eq tingwa jamnáng ka u etho iri takasa ri uqhal angta sey tia angwey moq aa ta piq ma takhi u; nang usang sey angtu ta thaji miqtang ma takhi rangma Moses aa chamlang pinthong kotma batta, iritang thaji ri kot u.”

⁴⁵ Etharin ethi miq tha ka eq, piq chamal angta ta thaji miqtang ma bat kotchak ta. Piq aa daqhan raaq batta, eshi tungkang o Jesu ethi samhaq sho takhi eq jin thu moq sey angta. Req piq ka eq samhaq phey shu shu haqna tong ta etho thaji haq wang miqtang ethináng tho uthok rong angta.