John 1 - Muklom

Rollung Raaq

¹ Phang tho Raaq angta, etho Raaq tha Shkewa jamna angta, etho Raaq tha Shkewa angta.

² Piq tha phang tho Shkewa jamna angta.

³ Thaji piq tungkang o qhongta, etho chamlang qhongta ethiwang thaji tangwang tha piq ahung na qhong moq angta.

⁴ Piq o rollung angta etho rollung tha miqtang rangma alit angta.

⁵ Alit anak na phang aa, etho anak eq baluk otho jin thanak moq.

⁶ Shkewa ashey thoksil tattey takat ta, eshi miqwa miing tha John angta.

⁷ Piq alit tung aa raaq miqtang ma raaqtóng ma thu tapha, irimal ang eq thaji miqtang piq raaq tat eq han na.

⁸ Piq ni piq tho alit ang moq angta, piq alit tung aa raaq batma thu tapha.

⁹ Thaji miqtang ma alit kot rangma, asing alit sha mingkang náng thupha.

¹⁰ Raaq tha iri mingkang ro angta etho piq tungkang o mingkang hunta jo tho, mingkang miqtang aa piq tha sing moq angta.

¹¹ Piq umiqtang jamnáng thuta, etharin umiqtang aa piq tha thawan moq angta.

¹² Utang eq piq tha thawan ta etho piq miing o hanta, ning sha Shkewa susa tang ang rangma authority kota.

¹³ Ning sha Shkewa susa angta tha tahi wang ang moq, etho hanngam tinuk wang ang moq, etho miqwa tinuk wang ang moq; etharin Shkewa hun ning tha ususa tang ma hunta.

¹⁴ Raaq sha miqna ma angta; etho piq sha ráng manchan nia asing ang eq shey ta etho hiqtang jaktung na tong ta. Hiqtang aa piq phun amun khiti, eshi phun amun sha Shkewa sa ashey dang miqwasa phun amun angta.

¹⁵ John aa piq tung aa raaq batta, etho ring eq tatat ta, “Nga piq tung aa raaq irimal bat táng, piq ijio kapha na, etharin piq nga phey náng eq tho ajong chammatakoi nga chang wey mong jakho piq atha angta.”

¹⁶ Piq ráng manchan ushey ang eq hiqtang rangma ráng manchan phey náng eq ráng manchan kapti.

¹⁷ Shkewa thong tha Moses tungkang o kotta, etharin ráng manchan nia asing sha Jesu Khristo tungkang o thu tapha.

¹⁸ Shkewa tha utang eq tho khi moq angta, etharin Shkewa Miqwasa ashey dang hun hiqtang ma Shkewa tha samtol ma kot taphi. Piq Shkewa hun etho Uwa jamna tong aa.

Jungthalam kottey John raaqtóng

¹⁹ Jehudi solwa tang aa Jerusalem wang tingwa tang etho Levi tang sha John relnáng takat ta etho piq ma pitta, “Nang utang aa?”

²⁰ John aa raaq thawel batma táng moq angta, etharin wungbat eq batta: “Nga raa Khristo ang mong.”

²¹ Etho ning aa pitta, “Irimal ang ajo, nang utang aa? Nang Elijah i?” John aa thawel batta, “Nga ang mong.” Ning aa pitta, “Nang Rangsamal i?” Piq aa thawel batta, “Ang mong.”

²² Ning aa batta, “Bari miq eq í takat taphi, ning ma thawel bat ching. Í ma batphu, nang utang aa. Nang ni nang ma chamlang ta bat u?”

²³ John aa rangsamal Isaiah raaq bat eq thawel batta, “Nga raa shu shu haqna jujong aa haltey ashey tharaaq; ‘Teyhungwa qhing ma lam shi tachal inn!’”

²⁴ Phorisi tang aa chamtey thoksil tattey tang tha takat ta.

²⁵ Etho John ma pittta, “Nang Khristo ang mu, Elijah tho ang mu etho Rangsamal tho ang mu ang ujo jung shi chamma thalam kot u?”

²⁶ John aa thawel batta, “Nga jung eq jungthalam kot ang, etharin nim jakthung na miq ashey, bara nim aa sam min.

²⁷ Piq sha ijio kapha na, u jaaqhong ru qhangkot rol tho nga ang mong.”

²⁸ Iri raaq tang raa Bethany na angta, eshi haq sha Jordan jungku adak kona angta, barina John aa jungthalam kotta.

Shkewa Kelwut sa

²⁹ Inapmal tho John aa Jesu tha piq ching náng kat tha khi eq batta, “Siin inn, ira Shkewa Kelwut sa, barey mingkang miqtang ngarey tha tun som chuwan aa.

³⁰ Nga batta phang tha ira, ‘Ashey miqwa ijio kapha na, etharin piq nga phey náng eq tho ajong chammatakoi nga chang wey mong jakho piq atha angta.’

³¹ Nga hun tho piq tha sam mong ang táng, etharin piq sha Israel tang aa cham sam aa ta nga jungthalam kotma thuta phang.”

³² John aa iri miikkhi raa kota, “Tsija tha wotopin mal rangkang wang kapha tha khi táng, etho piq haan sho dang ta.

³³ Nga hun piq sha sam mong ang táng, etharin barey nga jungthalam kot ma takat taphang, piq aa ngama batta phang, ‘Utang khom o Tsija kat eq lang kat khi u, piq sha hun Asang Tsija eq jungthalam kottey.’

³⁴ Piq raa hun Shkewa Miqwasa ta nga khi eq miikkhi kotáng.”

Jesu phang jiphantey tang

³⁵ Inapmal tho, John etho ujiphantey tang wang ani eshina wey lang chey ta.

³⁶ Jesu qhingchey ang atha piq aa siin eq batta, “Siin inn, ira Shkewa Kelwut sa.”

³⁷ Ujiphantey ni they iri raaq raa tat eq Jesu jiphan ta.

³⁸ Jesu ngik eq ningni tha piq jio kapha tha khi eq ning ni ma batta, “Nim ni aa chamlang bi shin?” Ning ni aa thawel batta, “Rabbi, nang barina tong u.” (Rabbi ta tatalteywa).

³⁹ Piq aa ningni ma batta, “Kat eq siin shin.” Eshi rangham sha rangja bali tanrol angta esho ningni ka eq piq tongching tha khita, ethi saal tho piq jamna tong ta.

⁴⁰ John raaq tat eq Jesu jiphantey ning ni wang ashey sha Andrew angta, piq sha Simon Peter pho angta.

⁴¹ Piq aa jakho upho Simon jamoq tachong eq piq ma batta, “Í aa Messiah kap khiti.” (Messiah ta Khristo).

⁴² Piq aa Simon Peter tha Jesu relnáng solkat ta. Jesu aa piq tha siin eq batta, “Nang John miqwasa Simon; nang raa Cephas ta hal pha nu.” (Cephas ta Peter; Peter ta ajong long).

Jesu aa Philip nia Nathanael tha hal aa

⁴³ Inapmal tho, Jesu Galilee náng katma nuk ta. Piq aa Philip jamoq tachong eq batta, “Iji náng kaphu.”

⁴⁴ Philip Bethsaida samhaq na tongtey angta. Eshi samhaq sho Andrew nia Peter tho utong angta.

⁴⁵ Philip sha Nathanael jamoq tachong eq piq ma batta, “Eshi miq sha hiqtang aa kapti, Moses aa thong na etho rangsamal tang aa piq tung aa raaq witta; piq Nazareth samhaq na tongtey Joseph miqwasa Jesu.”

⁴⁶ Nathanael aa piq ma batta, “Jaqhal tangwang Nazareth wang jin thalat angna i? Jin thalat moq.” Philip aa piq ma batta, “Ka eq siin kaphu.”

⁴⁷ Jesu aa Nathanael piq ching náng kapha tha khita piq tung aa raaq batta, “Siin u, piq raa asing Israel miq: piq ro chamtho alik akuk ahung!”

⁴⁸ Nathanael aa piq ma batta, “Nang aa nga chamal eq samphu?” Jesu aa piq ma thawel batta, “Jakho Philip aa halta phu tho, nang phokbang bang khungna angtu tho, nga nang ukhi eq taphang.”

⁴⁹ Nathanael aa piq ma thawel batta, “Tatalteywa, nang raa Shkewa Miqwasa; nang Israel tang Lungwang!”

⁵⁰ Jesu aa piq ma thawel batta, “Nga nang phokbang bang khungna khita phang ta bat tungkang o nang aa nga han phu i? Nang aa iri phey náng eq tho ajong jaksom khi nu.”

⁵¹ Piq aa ning ma batta, “Nga nim ma asing sing batphang, nim aa mungtan alak khi nin, etho Shkewa rangkamwa tang Miqna Sa sho kawáng aa sha khi nin.”