James 1 - Muklom

¹ Iri likwit raa James iching kowang, bara Shkewa nia Tangteywa Jesu Khristo sanga. Asi ani phan ajat ma bara thaji mingkang ro taphal ang eq tong aa, nim ma jak tachap.

Kam nia thunglam

² I no nia pho tang, nim uphan phan tsamnang na ang inn jo, esha sungrang raaq ta tathin inn,

³ chammatakoi nim kam thaktal wang nim thanan qhong aa ta usam eq inn.

⁴ Nim thaji jaksom na thanan ang ching, irimal ang ajo nim khakla ang nin, nim kam sha tahom ang na etho chamlang raaq o tho akum ang moq angna.

⁵ Nim wang chamtey ma thunglam akum ang ajo, Shkewa ching wang chuk ching, piq aa nim ma ukot eq na; chammatakoi Shkewa utin kot eq, aja bi hunga thaji ma ko aa.

⁶ Etharin nim aa baluk o romtam inn jo, kam eq chu inn etho chamtho nak nan inn; chammatakoi unantey sha jung kok mal, bara rangpong wang mot aa.

⁷ Irimal miq eq, Teyhungwa ching wang chamlilang ukap eq náng ta tathin ching ang moq.

⁸ Eshi miq sha ani atom tathin taktey etho piq thaji jaksom na adak adak thung shingtey.

Tangshit nia tanglom

⁹ Tangshit uhantey tang sungrang ang ching, chammatakoi Shkewa ning sha tunsol na.

¹⁰ Etho tanglom uhantey tang sungrang ang inn, chammatakoi Shkewa ning sha tinin angma kona. Tanglom sha jat pilpung mal maqwang na.

¹¹ Rangsal thalat eq, achan rangmay ajo naamrum sha takhuk chak aa, etho pilpung sha sho wang ang aa etho pilpung qhalmay sha shiti aa; ning jaksom som eq shitti na.

Shkewa uhantey ma tari kot moq

¹² Bari miq raa tsamnang na tong aa, eshi miq sha Shkewa sunmaan aa; chammatakoi piq tari wang thalat eq rollung cha khopok kap na, eshi cha khopok shima Teyhungwa piq tinmat tang shima kotma rangtum ta.

¹³ Chamtey tari na ang ajo, “Nga ma tari sha Shkewa ching kowang ang aa” ta piq raaq ching ang moq; chammatakoi jashit raaq wang Shkewa sha tari moq etho piq aa utang tho tari moq.

¹⁴ Etharin chamtey miqna ning anaan ngikjuk na manti eq tari náng thu aa.

¹⁵ Anaan ngikjuk sha khong eq ngarey sha chang aa etho ngarey sha chan ajo utik sha chang aa.

¹⁶ I no nia pho tang, nak cham dip phin.

¹⁷ Thaji jaqhal nia khakla jakkot sha mungtan wang thupha, esha rangmungtan wang alit Wa ching kowang kap aa, piq jakhang mal kaley tong moq.

¹⁸ Piq aa umongtham wang hiqtang sha asing raaq tungkang o tsija rollung kot ta, irimal eq piq aa taqhong dang ta atharang phan jaktung na hiqtang phang uti ungo mal ang ni.

Utat nia usom

¹⁹ I no nia pho tang, iri raaq ri tasik inn. Thaji miq eq photla tat ching etho uraaq na karel etho tinqhat na karel ang ching.

²⁰ Chammatakoi miq tinqhat eq Shkewa asing sha jin kap moq.

²¹ Eshirangma thaji jashit dangjang etho jashit jaksom shi alo náng hel chak inn. Etho tinnin ang eq nim tin na bari raaq raa Shkewa shing ta, eshi kam inn bara nim rollung sha jin thalun na.

²² Shkewa raaq tat tey tang ma chen ang eq, nim ni nim shi nak dip inn etharin eshi raaq shimal som inn.

²³ Bara utat tey chen ang eq esha somlo moqtey ang ajo, piq aa usham sha shamshok na siintey mal.

²⁴ Piq aa piq ni piq sham sha siin eq qhing chuwang aa etho piq chamal angta sha kalo lak chak aa.

²⁵ Etharin bari miq rey thikla thong barey aqhap ko aa, eshi konáng tathin tak aa etho piq esha tat eq lak chak moq, etharin bara tat ta shimal hun jaksom sha som aa, eshimal ang ajo piq aa sunmaan kap na.

²⁶ Chamtey tang eq ning ni ning sha asing phong miq ta tathin aa, etharin ning phali sha jin táng moq ang ajo, ning aa ning ni ning sha dip aa etho ning phong sha thanghung.

²⁷ Hiqtang Shkewa etho Wa shey irimal phong sha asang nia khakla phong ta tathin aa, noti tang etho notinu tang tsamnang shina rimrang etho ning ni ning sha mingkang aja tang wang asang shing aa.