Hebrews 1 - Muklom

Shkewa uthun raaq: Usa

¹ Nimpang ning aa Shkewa hiqtang tey aa wa tang jamoq rangsamal tang tungkang o juk daqhan adak adak lam o wanta,

² etharin iri uthun saal tang o hiqtang jamoq Usa tungkang o wan aa. Usa sha Shkewa thaji tangwang tangtey ma hunta etho piq tungkang o Shkewa thaji mingkang sha hunta.

³ Usa sha Shkewa phun amun wallit etho thaji na Shkewa mal, etho piq aa thaji tangwang tang sha utarong wang rimrang aa. Piq aa ngarey tang sha khol jio mungtan náng wang eq Ajong Uwa jakqkha kho sho tong ta.

⁴ Eshirangma piq rangkamwa tang phey náng eq ajong ma angta chammatakoi piq aa kapta miing sha ning miing wang ajong angta.

Usa sha rangsamal tang wang ajong

⁵ Shkewa rangkamwa tang wang chamtey ma irimal baluk o tho bat moq angta, “Nang isa Miqwasa; Thaney aa nga ba Wa ma ang táng.” Etha ang moq o irimal tho bat moq angta, “Nga Uwa ang náng, Etho piq isa Miqwasa angna.”

⁶ Shkewa phang chang Miqwasa sha mingkang náng sol kat pha jo, bat aa, “Shkewa thaji rangkamwa tang aa piq shi cham shumnuk aa.”

⁷ Rangkamwa tang tung aa raaq ira bat aa, “Shkewa urangsamal tang sha rangpong ma hunta, etho usanga tang sha wal ma hunta.”

⁸ Etharin Miqwasa tung aa raaq bat aa, “Shkewa, ba lungwang tongching sha pattuk rangma angna, Ba mung na asing wang khaphung na.

⁹ Nang asing shima tinmat tu etho lajak tang shima miiksuk shing tu. Iri rangma Shkewa, ba Shkewa nang sha tal taphu, ba nokwa tang phey náng eq nang sha tasungrang eq rangka taphu.”

¹⁰ Piq aa ira tho ubat eq aa, “Teyhungwa, phang tho nang aa mingkang thòng sha thalang hun tu, etho nang aa mungtan raa ba jak eq huntu.

¹¹ Iri tang raa uthun angna, etharin nang sha udak ang nu, iri tang thaji raa khat mal kìng tina.

¹² Nang aa eshi tang sha khatnup mal waksam nu, iri tang raa khat mal kaley tina. Etharin nang esha hun angnu, Etho ba rollung sha thun moq angna.”

¹³ Shkewa rangkamwa tang wang chamtey ma baluk o tho irimal bat moq angta, “Nga ba ralwa tang sha, ba jaakhung o shing mu náng duk, nang i jakqhat ko o tong u.”

¹⁴ Irimal ang ajo, rangkamwa tang utang aa? Ning sha Shkewa sanga tang etho thalun kaptey tang sha nong rangma takattey tsija tang.