2 Peter 1 - Muklom

¹ Iri likwit raa Jesu Khristo sanga nia apostle Simon Peter ching kowang: Hiqtang aa kapti mal thangchan kam kaptey miq ma iri likwit raa wit ang, Shkewa nia thaluntey Jesu Khristo asing tungkang wang.

² Shkewa nia hiqtang Teyhungwa Jesu sam tungkang o nim aa ráng manchan nia nungmay ahan cham kap inn.

Shkewa hal nia raaq

³ Shkewa utarong wang hiqtang asing ang eq tong ma chamlang ràa ta tha eshi thaji tang tha kota. Hiqtang sha piq phun amun nia jaqhal tungkang o hiqtang raa hal taphi, piq sam tungkang o piq aa iri tang raa kot taphi.

⁴ Eshi tungkang o piq aa hiqtang ma ajong nia thangchan rangtum kot ta, irimal ang eq iri rangtum tungkang o hiqtang sha mingkang jashit tinthin bara hiqtang tathun chak phani, iri thaji wang lun eq etho Shkewa dangjang mal ang ni.

⁵ Iri rangma nim thaji kacha ang inn, nim kam jamoq jaqhal shi tachat lot inn, jaqhal jamoq thunglam shi tachat lot inn

⁶ Thunglam jamoq tinthanan shi tachat loi inn, tinthanan jamoq tinthaman shi tachat lot inn, tinthaman jamoq Shkewa mal dangjang shi tachat lot inn,

⁷ Shkewa mal dangjang jamoq miq dak tang sha rimrang shi tachat lot inn, etho miq dak tang ma tinmat shi tachat lot inn.

⁸ Nim irimal chalot ang chey inn jo, hiqtang Teyhungwa Jesu Khristo usam rangma irey nim raa unong eq phanin.

⁹ Etharin barima iri tang raa ahung ang jo, ning miikduk nia amun khi aa etho ning ma jakho ngarey tang tasang ta tha lakchak ta.

¹⁰ Iri rangma, ipho nia no tang, Shkewa nim hal nia talta ta takhi rangma chamlang jin somlo inn eshi thaji tang sha usomlot eq ching. Irimal somlo inn jo, nim baluk o tho ngarey náng qhat min ang nin;

¹¹ Irimal nim hiqtang Teyhungwa nia thaluntey Jesu Khristo pattuk mung shina rangka jamoq thanop phani.

¹² Iri rangma nim aa iri raaq tang raa usam eq inn etho iri asing raa aching eq shing inn, etho nga nim ma iri raaq tang raa salwet tasik bat phanáng.

¹³ Baluk náng thula nga atharang, eshináng thula iri raaq tang raa nim ma tasik bat raa khakla ta nga tathin ang.

¹⁴ Chammatakoi hiqtang Teyhungwa Jesu Khristo ngama alang eq batta shimal, nga kalo ihanphung shing eq uwang sey ang náng ta nga usam eq ang.

¹⁵ Iri rangma, nga mingkang wang chuwang jio nim aa iri raaq tang raa salwet tasik shing rangma nga thaji sha somlo náng.

Khristo phun amun miikkhi

¹⁶ Nim ma hiqtang Teyhungwa Jesu Khristo tarong eq wey kat raaq bat taphi tho, alik manphan mal bat phami angta phi. Etharin í aa piq ajong ta miikkhi kot ti.

¹⁷ Baluk o Ajong phun amun Shkewa wang iri raaq thu tapha, “Ira i tinmat sa, nga piq ma sungrang ang ang!” Eshi tok o piq aa piq Shkewa wang rangka etho phun amun kapta.

¹⁸ Í piq jamoq asang haqkan na angti tho, mungtan wang iri raaq raa kap tatti.

¹⁹ Iri rangma rangsamal tang raaq sha asing ta í aa jaqhal eq sam i. Iri tang raa jaqhal eq tat inn, chammatakoi iri raaq tang raa wallit mal, bara rangnap ang wey moq náng thula etho rangnap taset bara Khristo, nim tin tang na pháng wey moq náng duk, rangnak na lip na.

²⁰ Etharin iri usam eq inn, asang likwit na raaqtóng sha ashey tho ning tinthin o wit moq angta.

²¹ Raaqtóng sha baluk o tho miq tinthin o ang moq angta, etharin rangsamal tang aa Asang Tsija tungkang o Shkewa ching kowang raaq ta.