2 John 1 - Muklom

¹ Phokho walang ching wang: Talchol miqnu etho usa tang ma, utang ma nga asing tinma ang. Etho nga chen ang mong, etharin asing samtey thaji miqtang atho nang ma tinma aa.

² Chammatakoi asing sha hiqtang jamna tong na etho salwet angna.

³ Hiqtang wa Shkewa etho Wa Miqwasa Jesu Khristo ching kowang hiqtang ma manchan, tinshit etho nungmay cham ang aa; iri tang raa hiqtang ma asing nia tinmat jamoq cham ang aa.

Asing nia Tinmat

⁴ Hiqwa raaqkhat kot taphi thimal, ba sa tang wang chamtey asing rollung na tong aa ta nga tat eq rapney sungrang ang.

⁵ Etho i tinmat miqnu, nga nang ma anal raaqkhat wit eq bat phang ta ang moq; iri raaqkhat raa phang wang hun. Iri raaqkhat ira, ashey eq ashey ma tinmat inn.

⁶ Iri tinmat raa ira, Shkewa raaqkhat raa tat eq tongching. Chamal nim aa jakho wang hun tat tin thimal, nim tinmat o tong sha hunpiq raaqkhat.

⁷ Daqhan miqtang barey dip eq taqhat tey mingkang náng ka tapha, ning aa Jesu Khristo miqna ang eq ka tapha ta han moq; irimal ning sha udip eq taqhat tey tang nia Khristo ralwa tang.

⁸ Iri wang rangtun inn, irimal ang eq hiqtang aa chamlang somlo ti sha nim aa nakthamat chak inn, etharin nim aa thaji kongpha shi cham kap inn.

⁹ Utang Khristo tatal na tong hung aa adak tatal konáng kattey tinmong na Shkewa ahung. Utang iri tatal na tongtey tinmong na Wa nia Miqwasa thani atha.

¹⁰ Req chamtey miq eq iri tatal raa som moq ang eq ba relnáng thu ajo, piq shi ba him mong náng thawan ma nak kot u; piq jamoq jak shi tho nak tachap u.

¹¹ Utang eq piq jamoq jaktachap ajo, piq sha ujashit som shina rumtey.

Uthun raaq

¹² Nga nim ma daqhan raaq bat ching, etharin cheylap ni uka ching wang ang moq. Nga nim jamoq tachong ma tungmang ang etho miikthim khangrim wan ma nuk ang; irimal ang i jo hiqtang sungrang sha tahom angna.

¹³ Shkewa talchol ba no miqnu sa tang aa jaktachap kot aa.