1 Peter 1 - Muklom

¹ Iri likwit raa Jesu Khristo apostle Peter ching kowang. Pontus, Galatia, Cappadocia, Asia, etho Bithynia mung na pholchal eq, adak mung wang miq mal tongtey Shkewa talchol miqtang ma iri likka raa wit ang.

² Wa Shkewa thung aa tal wang nim raa tal taphin, etho Asang Tsija eq nim sha tasang taphin, irimal ang eq nim Jesu Khristo raaq sha tat ching etho utahi o sang nin. Nim aa ráng manchan nia nungmay ahan cham kap inn.

Atharang tungmang

³ Hiqtang Teyhungwa Jesu Khristo Wa Shkewa ma kechu ajong. Piq aa Jesu Khristo sha amáng wang thajey eq, piq ajong manchan wang hiqtang rangma anal rollung kot taphi. Etho iri raaq rey hiqtang ma atharang tungmang kot phi.

⁴ Etho Shkewa umiqtang rangma ajong sunmaan mungtan na tashing aa eshirangma hiqtang tungmang shing i, bara baluk otho thun moq angna, baluk otho mitmoq angna etho baluk otho shiqti moq angna.

⁵ Iri tang raa nim rangma, nim kam tungkang o Shkewa tarong wang nim raa uthun rangham o takhi lunwan rangma thalun phin.

⁶ Iri rangma nim sungrang ang inn. Thanga chomwey rangma tsamnang daqhan tari wang nim tinshit ching.

⁷ Nim kam sha chamtan asing sha thak siin rangma iri tang raa angta. Nim kam sha hun aa cha phey náng thangchan. Hun aa cha sha uthun ang ajo tho wal eq ira hun tasang aa, irimal nim kam raa tho ang ang ching. Irimal ang ajo Jesu Khristo sha takhi saal o, nim rangma tasapsey, phun amun etho rangka nim aa kap nin.

⁸ Nim aa Jesu Khristo sha khi min otho piq ma tinmat ang inn, nim aa thanga khi min otho piq o han inn etho iri rangma nim rapney sungrang ang inn, iri sungrang raa raaq eq jin baat min.

⁹ Chammatakoi nim aa kam tungkang o tsija eq lunwan kap chey inn.

¹⁰ Iri lunwan tung aa raaq raa rangsamal tang aa jaqhal bi eq pitta etho nim ma ukap eq ma ta nin ráng manchan tung aa raaq ning aa tóng ta.

¹¹ Ning aa iri lunwan raaq baluk o angna etho chamal angna ta bita. Etho bara Khristo Tsija eq ning tin na tasam ta iri tung aa raaq raa ning aa sam ma tathin ta. Khristo tsamnang tung aa raaq etho eshi jio phun amun thupha na ta Khristo Tsija raaq batta.

¹² Shkewa iri rangsamal tang ma ning jaksom sha ning rangma ang moq etharin nim rangma ta takhi ta. Etho ning aa bara batta tha thanga nim aa utat eq tin; esha mungtan wang Asang Tsija tarong tungkang o takat ta thoksil tattey tang aa tungtang qhal phanchan ta. Iri raaq tang raa rangkamwa tang atho khi eq unuk ang aa.

Asang angma hal aa

¹³ Irimal ang ajo jaksom rangma nim thung shi kacha inn. Rangtun eq tong inn etho, Jesu Khristo kat rangham o nim aa kap ma ta inn eshi ráng manchan rangma nim aa tungmang shing eq tong inn.

¹⁴ Raaq tat tey nijang mey tang mal ang inn etho jakho cham tho sam min rangham tho chamli ahut alik jaksom som eq tong tin eshimal thanga nim tong ching ang moq.

¹⁵ Etharin chamal nim haltey asang, eshimal hun nim tho thaji somlo alot na asang ang ching.

¹⁶ Asang likwit na thawit ang aa, “Asang ang inn, chammatakoi nga asang.”

¹⁷ Nim aa Shkewa shima iwa ta raaq eq piq ching wang romtam chu inn, barey arum aa thaji jaksom sha kara phung aa, iri rangma nim mingkang ro adak mung miqtang mal piq ma cho eq tong inn.

¹⁸ Nim aa tey aa wa wang kap tin thanghung jaksom wang Shkewa nim thalun taphin ta nim aa sam eq inn. Iri tang raa hun aa cha mal ang moq bara shittik ang aa.

¹⁹ Etharin Khristo thangchan tahi wang iri thalun raa kotta, piq raa jaqmoq etho ngarey ahung kelwut sa mal.

²⁰ Khristo sha Shkewa mingkang phanghun jakho wang talta, etharin thanga uthun neynap ro nim rangma takhi ta.

²¹ Khristo tungkang o Shkewa ma nim aa han tin, barey Khristo tha amáng wang wey thajey ta etho piq ma phun amun kot ta. Irimal ang eq nim kam nia tungmang Shkewa na ang aa.

²² Thanga nim aa asing sha tat tungkang o nim ni nim sha tasang tin. Etho nim adak hantey tangma tinmat inn, eshirangma nim thaji tin wang ashey eq ashey ma tinmat ching.

²³ Chammatakoi nim takshey wey chang tin etho ira ushit phan uli wang ang moq etharin shit moq phan uli wang, bara atharang nia pattuk Shkewa raaq.

²⁴ Asang likwit na batta, “Thaji miqna namrun mal, etho ning thaji phun amun sha jaat pilpung mal: Namrun sha khuk tik aa, pilpung sha sho wang ang aa.

²⁵ Etharin Teyhungwa raaq sha pattuk angna.” Etho iri raaq raa hun tungtang qhal, bara nim ma phanchan ti.