Mark 1 - Ambrym North

Yafukon te sene Ntin ge lon te jejee sene te yen ge Asaya te fe myarin.

¹ Ge a be sarōan hu ge rrō fe rral ge rrwu ne Iyesu Mesaya, Terere Mleng Genti Yafukon.

² Sarōan ge a te tang barite bone ge Jon Babtaes te rrō nangnangne hal mwena Iyesu en ōrr ge be meha. Mwi ling baritean mwe yen ge Asaya, vanten ge te rrō fe tolo Yafukon, ge te rrhu lon Tuuankon myarin konkon. Te rrhu ha ge Yafukon te fe byanen ge, “Ō lhe, nam rrō sene mweneng abhyobhyor eb rrumō tebyan ge eb nangnangne hal tebyam.” Malakae 3:1

³ “Vanten ge a rrō ii en meha, rrō fe, ‘Mi rrwene hal eb nangnang tōne Mesaya; mi rrwene hal nan eba knon tebyan ge eb yel en!’ “ Asaya 40:3

⁴ Abhyobhyor ge a, Jon. Jon te tamtee en ōrr ge be meha, te rrō rrno nyer, te te rrō jefne ge, “Emi kilhi gimi metenen mwenami hakbean, te eba rrno gimi an. Te Yafukon mōn eb taōkuku mwenami hakbean te eb rrumyune.”

⁵ Ngate vanten te e lol ge te e lol besaō nyer ne ōrr Jutia krinen besaō ge rrlam Jerrusalem, err vya ne nge. Te err rrō survyōvyō mwenar rruan hakbe. Te Jon te rrō tonton nyer lon Wehal Jotan.

⁶ Bone ge le, Jon te rru en ōrr ge te e meha. Te kro ul ge tōlōn fyaa ge te rrwene an ne woulun kamel, krinen atotoō ge te rrwene an ne lun leleebrereō ge te rru goro teban. Te an meyee nge kil te hani. Rruan mwena Jon te yen rruan mwena Elaeja myarin.

⁷ Te nge te rrō suuto byanen vanten ge nyer a ge, “Vanten ge eb nga rrutōng me, mwenan helan mwe saavi ni. Ni narr rrlō ngrengre ena mlimling te na tirrku mwenan fyarrbala.

⁸ “Ni nam rrō rrno gimi lon we, a nge eb nga rrno gimi ne Nin Myuran Kon.”

⁹ Telōn ve myarin, Iyesu te yel metenen ōrr Nasarret, besaō hu rrlam ne ōrr Kalili, ngate Jon te rrno nge lon Wehal Jotan.

¹⁰ Bone ge Iyesu te tōl lon we, nge te lhe tōngtōng te kutaō byaho nga, te te lhe ge Nin Myuran Kon te rrō me ran te yen mar.

¹¹ Ngate rral hu te metene Yafukon lon tōngtōng, te fe, “Neng ōm be mweneng terere ge long mwe jejee sene neng. Ni nam rongne mu wu ten tebyam.”

Lonle ge a be renge te ge ma knon e ge vanten eb rrinkete Iyesu.

¹² Ngate Yafukon te sur byanen te byaho nga Nin Myuran Kon te rrwene ge te vya en ōrr hu ge te e meha.

¹³ Te rru en ōrr ge le, wobung te e 40 ge Setan te rrō rrwekya he ne murr lon mwenan rrinketean ne Yafukon. En ōrr ge le Iyesu te rru krinen sesebno nyer ge err ve rrubōr ho, te abhyobhyorkon nyer err me roōne nge.

¹⁴ Ngate bone ge ete lngi Jon bya lon im ne jenjenan, te nga e te nan, Iyesu te vya ran vere ge rrlam Kalili te te rrō suuto rral ge rrwu ge ma me metenen Yafukon.

¹⁵ Iyesu te rrō fe, “Yafukon te hrene ge renge limhian mwena Yafukon ma knon, mwe tamtee. Mi kilhi gimi metenen mwenami rruan hakbe te mi rrinkete rral ge rrwu a.”

Bone ge Iyesu rrō je vanten hu, vanten ge le eba rrma te eba lngilngi sese bonga te eb rrutōn.

¹⁶ Bone ge Iyesu te rrō yeyel to fya Tee Kakre Kalili, nge te lhe vanten ne kokoōan te e ru, Saemon te taalan ge Antrru, terō rrō kokoō koo ne myaalo.

¹⁷ Ngate Iyesu te fe byane nyerō, “Mōrō rrutōng, te na whure gōmōrō ge emrō sene vanten.”

¹⁸ Byaho nga terō lngilngi mwenarō koo ne myaalo te terō rrutōn.

¹⁹ Te yel roroō mōn bya, te te a lhe teere mwena Sebeti nyerō, sarō nge Jemes te Jon. Terō taa ho ran afloo kakae ne kokoōan, te terō rrō bsiktekte mōle mwenarō koo ne myaalo.

²⁰ Ngate te je nyerō; byaho nga terō totor, terō lngilngi temyarō ge Sebeti krinen mwenan vanten ne ōman nyer, err mang ho ran afloo ne kokoōan, te terō rrutō Iyesu.

Iyesu te whure vanten nyer lon mwenan helan, te te hubsine ge nge mwe saavi helan mwenan sōnhal nyer.

²¹ Ngate Iyesu krinen mwenan vanten nyer, err vya bsaō hu Kabeneam. Te ran Wobungkon, nge te yel konon bya lon imkon kakae ne tamtamyaōan, te te rrō whure vanten nyer.

²² Vanten ge err rrō rongtane, err non metenen mwenan wuhuran. Tebyan ge mwenan wuhuran telōn yen vanten ne wuhuran ne lingsenean ta Isrrel nyer, te nge te rrō whur krinen helan.

²³ Bone ge Iyesu te mang rrō whure nyer nga bwe, vanten hu ge sōnhal te hone rru te me vya lon imkon kakae ne tamtamyaōan ge a te rrō fwifwir bya mre, te te rrō fe ge,

²⁴ “Iyesu ta Nasarret, fō yel metene gemya! Ōm temelole fō rrwene ha ne gemya? Ō me tebyan ge fō mlone gemya? Ni nam yekya neng rru burr, neng ōm be Mesaya mwena Yafukon.”

²⁵ Iyesu te sur te hel byane sōnhal ge a te fe, “Ō rru rongrong, te ō roō metenen vanten ge a!”

²⁶ Ngate sōnhal ge a te rrwene vanten ge a te rurur, te te fwifwir, ngate byaho nga te roō metenen.

²⁷ Vanten bonga err non metenen ha ge te rrwe, te rrwene err rrō susur e nyer ge, “Ha nge mwi yi a? Wuhuran vivi worhu mnii mōn? Vanten ge a ma ktu helan hu ge sōnhal, em rrō rongtafyan.”

²⁸ Sese ge le te rrwene ge rral e Iyesu te roō en ōrr bonga ran vere nyer ne ōrr Kalili.

Iyesu ma ktu helan bonga rru ge rrō kone mesean bonga te rrō korku sōnhal nyer.

²⁹ Ngate Iyesu te mwenan vanten nyer, krine Jemes te Jon, err yel metenen imkon kakae ne tamtamyaōan, te err yel konon bya lon im ma Saemon te Antrru.

³⁰ Bone ge le, rahe tarirr mwena Saemon te fu rru ran tōnyōn, myalaa te rru ran. Te bone ge Iyesu te tamtee, err vya fe mesean ge a byanen.

³¹ Ngate Iyesu te vya biirin vehen ge a, te te halen veran, te rrwene ge te fyarr. Ngate myalaa ge a te nong ran, te te totor, te te roōne nyer ge te sene meyee byane nyer.

³² Bone ge yal te rrō ror te hohor te rrō je je, vanten nyer ete rrya mesean nyer, te ge nyer ge sōnhal te ho rar, err me ne Iyesu.

³³ Vanten bonga ne ōrr besaō ge le ete kru houre bon taō ne im ge Iyesu te rru en.

³⁴ Ngate Iyesu te kone vanten err ve lol ge err rrō mse ne mesean minimnii, te te kor helale sōnhal te e lol metene nyer. Te Iyesu te rrwene ge sōnhal ge nyer a err lōn susur, tebyan ge nyer err yekya ge nge te e Mesaya rru.

³⁵ Ran wobung sōn, lon wowobung nga, Iyesu te totor te te yel metenen ōrr besaō ge a, te te a hobōn en ōrr ge vanten nyer err rranga ho en, te te rrō tamtamyaō.

³⁶ Bone ge Iyesu te mang rrō tamtamyaō nga bwe, Saemon krinen mwenan byulbyulan nyer err vya rrō teene.

³⁷ Te bone ge err homnen, err fe byanen ge, “Yafu, vanten bonga em rrō teene neng.”

³⁸ Ngate Iyesu te fe byane nyer ge, “Eyi yel mōn bya bsaō rrute ge em ho fyaasi. Ena suuto byane nyer, tebyan ge sese ge le nge, ni nam me rrbyan.”

³⁹ Te nge te rrō yel bonga ōrr Kalili, te rrō suuto lon mar imkon kakae ne tamtamyaōan nyer te te rrō korku sōnhal nyer.

⁴⁰ En ōrr besaō hu mōn, vanten hu mnii mōn te ktu mesean hakbe ne lun vanten, te te me lhe Iyesu, te te singrrur bya fyan te whu roōnean te nen. Te fe, “Kabria, he te e mwenam temelolean, lo fō rrwene ni na mgal.”

⁴¹ Iyesu te lol hane, te te hune veran, te te tongve vanten ge a. Ngate te surmōl byanen te fe, “Teha, nam temelole. Fō mgal.”

⁴² Byaho nga, mesean ge a te roō metenen, te te mgal.

⁴³ Ngate Iyesu te rrnyorrnyo vanten ge a, te fe,

⁴⁴ “Fō lōn fe sese ge a byanen vanten te hu. A fō yel konon nga byane brris te eba lhe ge ōm mgal rru burr. Ngate fō nga rrwene fnefnean ge Mosis te fe rru, eb yi le e fyaara byanen vanten bonga ge neng ōm mgal burr.”

⁴⁵ Te nge te a saarōne ge Iyesu te kone nge. Sarōan ge le, te rrwene ge Iyesu telōn e ngrengre ne nga yel lon besaō nyer. Nge te nga rru hobōn nga en ōrr ge vanten err rrlō ho en, te vanten nyer err rrō me ne nge en ōrr bonga.